मराठवाडा दुष्काळमुक्तीसाठी सात वर्षांचा आराखडा, फडणवीसांकडून नदीजोड प्रकल्पांची माहिती

मराठवाड्याला कायमस्वरूपी दुष्काळापासून मुक्त करण्यासाठी दोन मोठे जलप्रकल्प हाती घेण्यात आले असून, पुढील सात वर्षांत टप्प्याटप्प्याने हे काम पूर्ण करण्याचा मानस मुख्यमंत्री देवेंद्र फडणवीस यांनी गुरुवारी बोलून दाखवला. कृष्णा खोऱ्यातील अतिरिक्त ३० टीएमसी पाणी भीमा खोऱ्यामार्गे मराठवाड्यात वळवण्याचे काम सध्या सुरू असल्याचे त्यांनी सांगितले. यासोबतच उल्हास खोऱ्यातील ७० टीएमसी पाणी गोदावरी खोऱ्यात आणण्याच्या नदीजोड प्रकल्पाचा सविस्तर प्रकल्प अहवाल म्हणजेच डीपीआर अंतिम टप्प्यात असल्याची माहितीही त्यांनी दिली. हे दोन्ही प्रकल्प मार्गी लागल्यास दुष्काळावर कायमचा तोडगा निघेल, असा विश्वास त्यांनी व्यक्त केला.

छत्रपती संभाजीनगर येथे मराठवाडा मुक्तिसंग्राम दिनानिमित्त आयोजित कार्यक्रमात फडणवीस यांनी हुतात्म्यांना अभिवादन केले. स्मृतिस्तंभाला पुष्पचक्र अर्पण केल्यानंतर त्यांच्या हस्ते ध्वजारोहण झाले. यावेळी बोलताना त्यांनी यंदाच्या पावसाळ्याचा आढावा घेतला. मराठवाड्यात सुरुवातीला चांगला पाऊस झाल्याने खरिपाची पेरणी वेळेत झाली होती, मात्र नंतर पावसाने मोठा खंड दिल्याने पिकांचे नुकसान झाले, याकडे त्यांनी लक्ष वेधले. अशा परिस्थितीत शेतकऱ्यांना एकटे सोडले जाणार नाही, असे आश्वासन त्यांनी दिले. एनडीआरएफच्या नियमांनुसार पंचनामे ५ ऑक्टोबरनंतरच सुरू होणार असले, तरी सरकार त्याआधीच शेतकऱ्यांपर्यंत मदत पोहोचवण्याचा प्रयत्न करेल, असे त्यांनी स्पष्ट केले.

याच भाषणात फडणवीस यांनी शिवसेना उद्धव बाळासाहेब ठाकरे गटाने राज्य सरकारविरोधात चालवलेल्या आंदोलनावर टीका केली. संधी मिळूनही ज्यांना काम करता आले नाही, त्यांनी आता केलेले हे आंदोलन नाकर्तेपणाचे लक्षण असल्याचे ते म्हणाले. तुम्ही फक्त विरोध करत राहा, आम्ही प्रत्यक्षात काम करून दाखवू, अशा शब्दांत त्यांनी उद्धव ठाकरे यांना उत्तर दिले.

शहराच्या पाणीपुरवठ्याबाबत बोलताना फडणवीस यांनी सांगितले की, छत्रपती संभाजीनगरची नवीन पाणीपुरवठा योजना अंतिम टप्प्यात असून लवकरच प्रत्येक घरात रोज पाणी मिळेल. समृद्धी महामार्ग आणि डीएमआयसी परिसरात टोयोटा, अथर आणि जेएसडब्ल्यू या कंपन्यांकडून इलेक्ट्रिक वाहनांचे उत्पादन होणार असून, त्यासाठी सुमारे आठ हजार एकर जमीन संपादित केली जाणार आहे. यातून मोठ्या प्रमाणावर रोजगारनिर्मिती होईल, असा विश्वास त्यांनी व्यक्त केला.

भाषणाच्या शेवटी फडणवीस यांनी यूपीआय प्रणालीचा उल्लेख करत काँग्रेस नेते राहुल गांधी यांच्यावरही टीका केली. यूपीआयमुळे शासकीय अनुदान थेट लाभार्थ्यांच्या बँक खात्यात जमा होत असल्याने भ्रष्टाचाराला आळा बसला आहे, असे ते म्हणाले. राहुल गांधी याच मुद्द्यावरून पंतप्रधान नरेंद्र मोदी यांच्यावर आरोप करतात, मात्र ते लिहून दिलेले भाषण वाचतात आणि सकाळी, संध्याकाळी व रात्री वेगवेगळी भूमिका मांडतात, अशी टीका फडणवीस यांनी केली.