गणेशोत्सवात मुंबईत आंदोलने नकोत, बावनकुळेंचे आवाहन; दुष्काळग्रस्त शेतकऱ्यांसाठी सरकार सज्ज

गणेशोत्सवाच्या दिवसांत मुंबईत आंदोलने करून कायदा-सुव्यवस्थेचा प्रश्न उभा करू नये, असे आवाहन महसूलमंत्री आणि नागपूरचे पालकमंत्री चंद्रशेखर बावनकुळे यांनी केले आहे. मुंबई हायकोर्टाने दिलेले निर्णय लक्षात घेऊन सर्व आंदोलकांनी सध्याच्या परिस्थितीचे भान ठेवावे, अशी विनंतीही त्यांनी केली.

नागपुरात प्रसारमाध्यमांशी बोलताना बावनकुळे यांनी सांगितले की, मुंबई आणि महाराष्ट्रातील गणेशोत्सव हा देशातील सर्वात मोठ्या उत्सवांपैकी एक आहे. त्यामुळे या काळात आंदोलने टाळणे राज्याच्या हिताचे ठरेल, असे मत त्यांनी मांडले.

मनोज जरांगे यांच्या आंदोलनाबाबत विचारले असता, ओबीसी असो वा मराठा समाज, कोणाच्याही हक्कांवर गदा येणार नाही, असे बावनकुळे यांनी स्पष्ट केले. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे हे मराठा समाजाच्या मागण्यांसाठी सातत्याने प्रयत्न करत असून, त्यांच्या कार्यकाळात याआधी न झालेले अनेक निर्णय घेतले गेल्याचा दावाही त्यांनी केला. मराठा समाजाला न्याय मिळवून देण्याच्या दिशेने सरकार काम करत असून, त्यासाठी सरकारला पुरेसा वेळ द्यायला हवा, असेही ते म्हणाले.

राज्यातील दुष्काळसदृश स्थितीबाबत बोलताना बावनकुळे यांनी सध्या कोणत्याही आंदोलनापेक्षा शेतकऱ्यांची अवस्था अधिक महत्त्वाची असल्याचे नमूद केले. राज्यातील सुमारे १८ जिल्ह्यांत पावसाचे प्रमाण कमी असून अनेक भागांत पिके करपत असल्याचे त्यांनी सांगितले. या परिस्थितीचा आढावा घेण्यासाठी सर्व जिल्हाधिकाऱ्यांची बैठक आधीच झाली असून, जिल्हानिहाय आढावा घेण्यासाठी पुन्हा एक बैठक घेतली जाणार आहे. दुष्काळाच्या काळात शेतकऱ्यांना आवश्यक ती मदत मिळावी आणि कोणत्याही शेतकऱ्यावर आत्महत्येची वेळ येऊ नये, हे सरकारचे सर्वोच्च प्राधान्य असल्याचे बावनकुळे यांनी सांगितले.

मुख्यमंत्री देवेंद्र फडणवीस यांनी राज्यातील परिस्थितीची तातडीने पाहणी करून सर्वेक्षण सुरू करण्याच्या सूचना दिल्या असून, जिल्हानिहाय आढावा घेऊन आवश्यक उपाययोजना राबवण्याचे निर्देशही दिल्याचे बावनकुळे यांनी सांगितले. प्रत्येक जिल्ह्यात जिल्हाधिकारी, पालकमंत्री आणि संबंधित प्रशासकीय यंत्रणा प्रत्यक्ष पाहणी करणार असून, आपणही काही ठिकाणी स्वतः भेट देणार असल्याचे त्यांनी सांगितले. संपूर्ण अहवाल आगामी मंत्रिमंडळ बैठकीत सादर केला जाणार आहे.

याचबरोबर नागपूर शहरातील OYO हॉटेल्सबाबतही बावनकुळे यांनी चिंता व्यक्त केली. अशा हॉटेल्सच्या आसपास राहणाऱ्या नागरिकांकडून तक्रारी येत असल्याचे त्यांनी सांगितले. या विषयावर पोलीस आयुक्तांसोबत चर्चा झाली असून मुख्यमंत्र्यांनाही याची माहिती दिल्याचे त्यांनी नमूद केले. OYO हॉटेल्ससाठी कडक नियमावली तयार करण्यात आली असून, हॉटेलमध्ये येणाऱ्या-जाणाऱ्या ग्राहकांची नोंद व रेकॉर्ड ठेवणे बंधनकारक करण्यात आले आहे. नियमांचे उल्लंघन करणाऱ्या हॉटेल्सवर कारवाई केली जाईल, असा इशारा त्यांनी दिला. नागपूर शहराची सांस्कृतिक आणि सामाजिक परंपरा अबाधित राहावी, यासाठीच ही उपाययोजना करण्यात आल्याचे बावनकुळे यांनी स्पष्ट केले.