जरांगेंकडे झुकणाऱ्या मंत्र्यांवर वडेट्टीवारांची टीका, दुष्काळावर विशेष पॅकेजची मागणी

काँग्रेसचे नेते आणि आमदार विजय वडेट्टीवार यांनी नागपुरात पत्रकारांशी बोलताना राज्य सरकारवर जोरदार टीका केली. सरकारचे इतके मंत्री मान वाकवत मनोज जरांगेंकडे जातात, त्यांची मान कशी तुटत नाही, असे म्हणण्याची वेळ आली आहे, असे ते म्हणाले. पाळीव प्राण्याला लाजवेल अशा पद्धतीने मंत्री मान वाकवत जातात, त्यामुळे जरांगे पाटलांना आपण बादशहा झाल्यासारखे वाटते, अशी टीका त्यांनी केली. सरकार झुकते, त्यासाठी झुकवणारा लागतो, त्यामुळे सरकार झुकते, आता काय करायचे हा सरकार आणि मनोज जरांगे यांचा विषय आहे, ते बघून घेतील, असेही ते म्हणाले.

मराठा आंदोलक मुंबईत गेल्यास गणेशोत्सव असल्याने नक्कीच गर्दी होईल, मात्र सरकार ते आंदोलन कसे हाताळते हे महत्त्वाचे आहे, असे वडेट्टीवार म्हणाले. ओबीसी विरुद्ध हिंदू असा वाद निर्माण करण्याचे काम सरकारने केले असल्याचा आरोप त्यांनी केला. ओबीसींवर संकट आले असून हे सरकारचेच पाप आहे, सरकार ओबीसींकडे लक्ष देत नाही आणि त्यांचे प्रश्न सोडवत नाही, असे ते म्हणाले. ओबीसींच्या आरक्षणाबाबत त्यांनी सांगितले की नोकऱ्या देताना ऐंशी टक्के लोकांना केवळ पंधरा टक्के जागा मिळत आहेत आणि नोकरीत सगळीकडे आरक्षण आणून ठेवले आहे. जरांगे पाटलांच्या आंदोलनाला पुन्हा परवानगी घेऊ द्या, हे कसे हाताळायचे हा सरकारचा प्रश्न आहे, आमच्या मागण्या सरकारसमोर ठेवलेल्या आहेत, त्यामुळे सरकारने गांभीर्य ठेवावे, असे वडेट्टीवार म्हणाले.

राज्यात कोरड्या दुष्काळाची परिस्थिती निर्माण झाली असून महाराष्ट्र सरकारने तातडीने विशेष पॅकेज जाहीर करावे, अशी मागणी वडेट्टीवार यांनी केली. सगळे शेतकरी संकटात सापडले असून राज्यावर कधी नव्हे अशी बिकट परिस्थिती ओढवली आहे. अनेक धरणांत पाणीसाठा नसल्याने पिण्याच्या पाण्याचा प्रश्नही निर्माण होणार आहे. याबाबत राज्यपालांना पत्र पाठवले असल्याचे त्यांनी सांगितले. सरकारकडून काय अपेक्षा करावी, असा प्रश्न असल्याचेही ते म्हणाले. आपत्कालीन आराखडा तयार करून त्याची प्रभावी अंमलबजावणी करावी, पीक विमा नुकसान भरपाईची प्रक्रिया जलद व सुलभ करावी, नुकसान भरपाई द्यावी, खरीपासाठी घेतलेले कर्ज माफ करावे, व्याजावर सूट द्यावी, विशेष मोहीम राबवावी, हवामान आधारित कृती आराखडा तयार करावा, पशुधनासाठी उपाययोजना कराव्यात, चाऱ्याचे नियोजन करावे आणि विशेष आर्थिक पॅकेज जाहीर करावे, अशा मागण्या त्यांनी केल्या.

सरकारने गांभीर्याने निर्णय घ्यावा, नाहीतर शेतकरी जगणार नाही, असा इशारा वडेट्टीवार यांनी दिला. गणरायाने या दुष्काळातून शेतकऱ्यांना वाचवावे आणि सत्ताधाऱ्यांना सद्बुद्धी द्यावी, पेपरफुटी व बेरोजगारीकडे लक्ष द्यावे, शेतकऱ्यांच्या पाठीशी उभे राहावे, या संकटावर मात करण्यासाठी गणरायापुढे प्रार्थना करत असल्याचेही ते म्हणाले.

केंद्र असो की राज्य सरकार, कोणाकडून काही अपेक्षा नाही, उद्योगपतींचे चोचले पुरवले जात असल्याची टीका त्यांनी केली. सत्ताधारी पक्षाचा मंत्री हिंदू लोकांकडूनच सामान विकत घ्यावे असे म्हणतो, मंत्र्यांना हनुमान चालिसा म्हणता येते का असा सवाल करत, सत्ताधारी संविधानावर बोलत नाहीत, त्यांना संविधानाचे नाव घेण्याची लायकी नाही, सत्ताधारी मंत्री काहीही बोलतात, अशी टीका विजय वडेट्टीवार यांनी केली.