मक्केजवळ ड्रोन हल्ला हवेतच निष्फळ; पहिल्यांदाच आणीबाणीचा इशारा, येमेन युद्धात ५००हून अधिक मृत्यू

मध्य पूर्वेतील तणाव आणखी चिघळला असून सौदी अरेबिया आणि येमेनमधील हुथी बंडखोर यांच्यातील लष्करी संघर्ष टोकाला पोहोचला आहे. मुस्लिमांचे सर्वात पवित्र शहर मानल्या जाणाऱ्या मक्केवर ड्रोनने हल्ला करण्याचा प्रयत्न झाला. सौदी हवाई संरक्षण दलाने याबाबत माहिती दिली असून, येमेनच्या दिशेने मक्का शहराकडे येणारे एक स्फोटक ड्रोन वेळीच रोखून हवेतच नष्ट करण्यात आले.

सौदी लष्कराचे प्रवक्ते मेजर जनरल तुर्की अल-मलिकी यांनी या घटनेची अधिकृत माहिती दिली. १५ सप्टेंबरला संध्याकाळी साधारण ६.५० च्या सुमारास मक्का शहराच्या दक्षिण भागात एक अनोळखी ड्रोन घिरट्या घालताना दिसले. सौदी हवाई संरक्षण यंत्रणेने लगेच हालचाल करत ते ड्रोन मक्केच्या प्रतिबंधित आणि सुरक्षित हवाई हद्दीत घुसण्याआधीच पाडले. सौदी प्रशासनाने या घटनेचे वर्णन मक्का शहराला लक्ष्य करण्याचा दुसरा मोठा प्रयत्न असे केले आहे. यापूर्वी २०१७ मध्येही हुथी बंडखोरांनी मक्केच्या दिशेने बॅलिस्टिक क्षेपणास्त्र डागल्याचा आरोप सौदीने केला होता, जरी हुथींनी तो आरोप फेटाळला होता.

या घटनेनंतर खबरदारी म्हणून सौदी नागरी संरक्षण दलाने मक्का, जेद्दा आणि ताइफ या तीन प्रमुख शहरांत आणीबाणीचा इशारा जारी केला. सध्याचे मध्य-पूर्व युद्ध सुरू झाल्यापासून मक्का शहरात अशा प्रकारचा धोक्याचा इशारा मिळण्याची ही पहिलीच वेळ आहे. प्रशासनाने नागरिकांना तात्काळ सुरक्षित ठिकाणी जाण्याचे, शांतता राखण्याचे आणि उघड्या जागा, खिडक्या, बाल्कनी किंवा छतांवर न जाण्याचे आवाहन केले होते. थोड्याच वेळात संपूर्ण परिसर सुरक्षित असल्याची खात्री पटल्यानंतर हा इशारा मागे घेण्यात आला.

मक्केजवळ घडलेली ही घटना येमेनमध्ये सुरू असलेल्या भीषण युद्धाचाच एक भाग आहे. येमेनमध्ये हुथी बंडखोर आणि सौदी अरेबियाच्या पाठिंब्यावर लढणारे सरकारी सैन्य यांच्यातील संघर्ष अचानक अत्यंत तीव्र झाला आहे. ताज्या माहितीनुसार, या संघर्षात ५०० हून अधिक लोकांचा मृत्यू झाला आहे. युद्धाच्या भीषण सावटामुळे ९४,००० हून अधिक येमेनी नागरिकांना आपली घरे सोडून पलायन करावे लागले आहे. हजारो लोक सुरक्षिततेसाठी दक्षिण येमेनकडे जात असून, २,००० हून अधिक नागरिक समुद्रमार्गे जिबूती या देशात आश्रयाला गेले आहेत.

जगभरातील कोट्यवधी मुस्लिमांचे श्रद्धास्थान असलेल्या मक्केजवळ लष्करी कारवाई होणे आणि सायरन वाजणे ही घटना अत्यंत गंभीर मानली जात आहे. यामुळे संपूर्ण मध्य पूर्वेत तणाव आणखी वाढला असून आंतरराष्ट्रीय पातळीवर शांततेचे आवाहन केले जात आहे.