आझाद मैदानावरील उपोषणाला मुंबई पोलिसांचा पुन्हा नकार, जरांगेंची पुढील भूमिका काय?

मराठा समाजाच्या प्रलंबित मागण्या आणि सरकारने दिलेल्या आश्वासनांची अंमलबजावणी व्हावी यासाठी मनोज जरांगे पाटील मुंबईतील आझाद मैदानावर आमरण उपोषण करण्याच्या तयारीत होते. मात्र मुंबई पोलिसांनी त्यांना पुन्हा एकदा धक्का दिला आहे. रविवारी पहिला अर्ज फेटाळल्यानंतर जरांगे यांच्या वतीने नव्याने परवानगी मागण्यात आली होती, पण पोलिसांनी दुसऱ्यांदाही आझाद मैदानावरील उपोषणाला नकार दिला.

गणेशोत्सव संपल्यानंतर आझाद मैदान वगळून इतर एखाद्या ठिकाणी उपोषणाची परवानगी दिली जाऊ शकते, असे पत्र पोलिसांनी दिल्याचे समजते. त्यामुळे आता जरांगे पाटील पुढे काय निर्णय घेणार, याकडे सगळ्यांचे लक्ष लागले आहे.

जरांगे पाटील यांनी १९ सप्टेंबरपासून आझाद मैदानावर अनिश्चित काळासाठी उपोषण सुरू करण्याची घोषणा आधीच केली होती. त्यासाठी १५ सप्टेंबरला अंतरवाली सराटीहून मुंबईच्या दिशेने कूच करण्याचंही त्यांनी जाहीर केलं होतं. पण पोलिसांनी सलग दोनदा परवानगी नाकारल्यामुळे मुंबई मार्च आणि १९ सप्टेंबरपासूनचं उपोषण प्रत्यक्षात होणार की नाही, याबाबत आता अनिश्चितता निर्माण झाली आहे.

पोलिसांनी कायदा-सुव्यवस्था आणि वाहतुकीच्या संभाव्य अडचणींचं कारण देत परवानगी नाकारल्याचं सांगितलं जातं. गेल्या वर्षीच्या आंदोलनावेळी दक्षिण मुंबईत जवळपास पाच हजार वाहने बेकायदेशीरपणे उभी राहिली होती, त्यामुळे वाहतूक व्यवस्था कोलमडली आणि कायदा-सुव्यवस्थेचा प्रश्न निर्माण झाला होता, असं पोलिसांचं म्हणणं आहे.

आज १४ सप्टेंबरपासून मुंबईत गणेशोत्सवाला सुरुवात झाली आहे. या काळात शहरात मोठ्या प्रमाणात भाविकांची गर्दी होते, त्यामुळे सुरक्षेच्या दृष्टीने सध्याची परिस्थिती संवेदनशील असल्याचं पोलिसांचं म्हणणं आहे. नियमांनुसार आझाद मैदानातील साधारण सात हजार चौरस मीटर जागेत मर्यादित संख्येनेच आंदोलक सामावू शकतात. पण जरांगे पाटील यांनी मोठ्या संख्येने आंदोलकांना मुंबईत येण्याचं आवाहन केलं आहे. लाखो आंदोलक मुंबईत दाखल झाले तर दक्षिण मुंबईतील रुग्णालये, न्यायालये आणि आर्थिक केंद्रांच्या रोजच्या कामकाजावर परिणाम होऊ शकतो, अशी भीती पोलिसांनी व्यक्त केली आहे.

आझाद मैदानावर उपोषणाला परवानगी नाकारली गेली असली तरी आपण आपल्या भूमिकेवर ठाम आहोत, असं मनोज जरांगे पाटील यांनी स्पष्ट केलं आहे. आपण एकटेच मुंबईला जाणार असून आपल्यासोबत इतर कुणालाही मुंबईत येऊ देणार नाही, असं त्यांनी सांगितलं आहे.

मुंबई पोलिसांनी सलग दुसऱ्यांदा परवानगी नाकारल्यानंतर आता जरांगे पाटील आझाद मैदानाऐवजी अन्य एखाद्या ठिकाणी उपोषण करणार का, आपल्या भूमिकेवर ठाम राहत मुंबईतच येणार का, की परवानगीसाठी उच्च न्यायालयात दाद मागणार का, हे पाहणं महत्त्वाचं ठरणार आहे.