ठाणे वाहतूक अपडेट: ठाणेकरांच्या अडचणीत वाढ; महत्त्वाचा उड्डाणपूल अनिश्चित काळासाठी बंद, पाहा पर्यायी मार्ग

ठाणे शहरातील घोडबंदर मार्गावरील कासारवडवली उड्डाणपूल एमएमआरडीएने तांत्रिक तपासणीसाठी अनिश्चित काळासाठी पूर्णपणे बंद केला आहे. हा मार्ग ठाण्यातील अत्यंत वर्दळीचा मार्ग समजला जातो आणि या मार्गावर नेहमीच मोठी वाहतूक असते. गणेशोत्सव तोंडावर असल्याने या काळात वाहनचालकांना मोठ्या वाहतूक कोंडीला सामोरे जावे लागण्याची शक्यता निर्माण झाली आहे.

हा उड्डाणपूल मेट्रो प्रकल्पाचा एक भाग म्हणून बांधण्यात आला होता आणि कासारवडवली जंक्शनवरील वाहतूक कोंडी सोडवण्यासाठी तो सुरू करण्यात आला होता. मात्र पूल सुरू झाल्यानंतर अवघ्या वर्षभरातच पुलाच्या जोडणीच्या भागात आणि एका खांबात तांत्रिक त्रुटी आणि दोष आढळून आले. शनिवारी रात्री पुलाच्या संरचनेबाबत तक्रार प्राप्त झाल्यानंतर कंत्राटदाराने प्राथमिक स्वरूपाची दुरुस्ती केली होती. त्यानंतर रविवारी एमएमआरडीएच्या पथकाने पुलाची पाहणी केली असता प्रवाशांच्या सुरक्षेचा मुद्दा समोर आला. पुलात त्रुटी आढळून आल्यामुळे प्रशासन आणि कंत्राटदाराच्या कामकाजावर नागरिकांमधून तीव्र नाराजी व्यक्त होत असून पुलाच्या बांधकामाच्या गुणवत्तेबाबत गंभीर प्रश्न उपस्थित झाले आहेत.

ठाणे वाहतूक विभागाचे पोलीस उपायुक्त पंकज शिरसाट यांनी काढलेल्या आदेशानुसार 15 सप्टेंबर 2026 रोजी रात्री 12 वाजल्यापासून पुलावरील सर्व प्रकारची वाहतूक पूर्णपणे बंद करण्यात आली आहे. तांत्रिक तपासणी पूर्ण होऊन त्याचा अहवाल येण्यासाठी किमान आठवडाभराचा कालावधी लागण्याची शक्यता वर्तवण्यात आली आहे. तोपर्यंत या मार्गावरील वाहतूक स्लिप रोड आणि पर्यायी मार्गांवरून वळवण्यात आली आहे.

ठाण्याकडून घोडबंदर गुजरात रोडच्या दिशेने जाणाऱ्या सर्व प्रकारच्या वाहनांना कासारवडवली ओव्हर ब्रिजवर सुरुवातीलाच प्रवेश बंद करण्यात आला आहे. जड अवजड वाहनांसाठी स्वतंत्र व्यवस्था करण्यात आली असून अशी वाहने कासारवडवली ओव्हर ब्रिजलगतच्या स्लिप रोडमार्गे पुढे जाऊन आपल्या इच्छित स्थळी पोहोचू शकतील.

हलक्या वाहनांसाठी दोन स्वतंत्र पर्यायी मार्ग जाहीर करण्यात आले आहेत. ठाण्याकडून घोडबंदर गुजरात रोडच्या दिशेने जाणारी छोटी वाहने म्हणजेच कार, ऑटो रिक्षा, मोटरसायकल, पोलीस वाहने, फायर ब्रिगेड, रुग्णवाहिका, गणेश मूर्ती विसर्जनातील वाहने आणि इतर अत्यावश्यक वाहने ही विजय गार्डन डी मार्ट, कासारवडवली पोलीस स्टेशनवरून पुढे उजवीकडे वळण घेऊन सरळ ग्रँड स्क्वेअर चौक, विहंग व्हॅली चौक आणि टायटन हॉस्पिटलवरून डावीकडे वळून ठाणे घोडबंदर मुख्य वाहिनीवरून पुढे जातील. तर ठाण्याकडून घोडबंदर रोडच्या दिशेने जाणारी अशीच छोटी आणि अत्यावश्यक सेवेतील वाहने आनंद नगर सिग्नलवरून डावीकडे वळून ग्रँड स्क्वेअर चौक, विहंग व्हॅली चौक आणि टायटन हॉस्पिटलवरून डावीकडे वळून ठाणे घोडबंदर मुख्य वाहिनीवरून पुढे आपल्या इच्छित स्थळी जातील.