जरांगेंचा तिसऱ्यांदा परवानगीसाठी अर्ज; पोलिसांच्या सर्व अटी मान्य, मुंबईत उपोषणाला परवानगी मिळणार?

मराठा आरक्षणाच्या मागणीसाठी अंतरवाली सराटी इथे मनोज जरांगे पाटील यांचं आंदोलन सुरू आहे आणि आज त्यांच्या उपोषणाचा 17 वा दिवस आहे. मुंबईतील आझाद मैदानावर उपोषणाला बसण्याच्या त्यांच्या निर्णयावर जरांगे पाटील अजूनही ठाम आहेत, पण या उपोषणाला मुंबई पोलिसांकडून अजून परवानगी मिळालेली नाही.

याआधी दोन वेळा पोलिसांनी परवानगी नाकारली होती. आता जरांगे पाटील यांच्या वतीने तिसऱ्यांदा परवानगीसाठी अर्ज करण्यात आला आहे. या नव्या अर्जात, पूर्वी ज्या मुद्द्यांवरून परवानगी नाकारण्यात आली होती, त्या सगळ्या अटी पाळण्याची तयारी जरांगे पाटील यांनी दाखवली आहे.

मराठा समाजाच्या प्रलंबित मागण्यांकडे सरकारचं लक्ष वेधण्यासाठी आझाद मैदानावर शांततेच्या मार्गाने आंदोलन केलं जाणार असल्याचं या अर्जात नमूद करण्यात आलं आहे. आंदोलन पूर्णपणे लोकशाही आणि घटनात्मक चौकटीत राहून होईल, आणि त्यामुळे कायदा-सुव्यवस्थेचा प्रश्न उभा राहणार नाही, याची पूर्ण काळजी आयोजक घेतील, असंही अर्जात स्पष्ट करण्यात आलं आहे.

पोलिसांनी घातलेल्या एकूण 20 अटी या अर्जात मान्य करण्यात आल्या आहेत. यातील एका महत्त्वाच्या अटीनुसार, कर्तव्यावर असलेल्या कोणत्याही पोलीस अधिकाऱ्याने मागितल्यास आंदोलनाच्या परवानगीची मूळ प्रत सोबत बाळगली जाणार आहे. म्हणजेच, परवानगीचा कागद कुठे आहे असं कोणी पोलीस अधिकारी विचारला, तर तो लगेच दाखवता यावा, अशी व्यवस्था आयोजकांकडून केली जाणार आहे. तसंच अर्जात नमूद केलेल्या आंदोलकांच्या संख्येची मर्यादाही कायम पाळली जाईल, म्हणजे ठरवून दिलेल्या संख्येपेक्षा जास्त लोक आंदोलनस्थळी जमणार नाहीत, याची काळजी घेतली जाईल.

आंदोलनात सहभागी झालेल्या कोणीही चिथावणीखोर भाषण किंवा जमावाला भडकवणारं वक्तव्य करणार नाही, असं आश्वासन देण्यात आलं आहे. आंदोलनस्थळी कुठल्याही प्रकारचं वाहन आणलं जाणार नाही, असंही अर्जात म्हटलं आहे. यात ट्रॅक्टर, ट्रॉली, बैलगाडी, सायकल रिक्षा आणि हातगाडी यांसारख्या वाहनांचा समावेश आहे. म्हणजे आंदोलनासाठी कोणत्याही स्वरूपाची वाहतूक साधनं मैदानावर आणली जाणार नाहीत, हे स्पष्टपणे नमूद करण्यात आलं आहे.

याशिवाय आंदोलनाच्या ठिकाणी कुठलेही प्राणी आणले जाणार नाहीत. पक्षी, घोडे, हत्ती, उंट, कोंबड्या असे प्राणीही आंदोलनस्थळी नेले जाणार नसल्याचं जरांगे पाटील यांच्या अर्जात स्पष्ट करण्यात आलं आहे. मराठा समाजाच्या न्याय्य आणि प्रलंबित मागण्यांकडे सरकारचं लक्ष वेधण्यासाठी हे आंदोलन शांततेच्या मार्गाने, लोकशाही आणि घटनात्मक चौकटीत राहून केलं जाणार असल्याचं अर्जात पुन्हा एकदा नमूद आहे.

पोलिसांनी आधी उपस्थित केलेल्या सगळ्या आक्षेपांवरील अटी मान्य करून आता तिसऱ्यांदा अर्ज करण्यात आल्यामुळे, यावेळी मुंबई पोलीस काय निर्णय घेतात, याकडे सगळ्यांचं लक्ष लागलं आहे.