मुंबई पोलिसांचा जरांगेंना पुन्हा नकार; तिसऱ्यांदा आंदोलनाची परवानगी नाकारली, आज सकाळी कूच

मराठा आरक्षणाच्या मागणीसाठी अंतरवाली सराटी येथे सुरू असलेल्या मनोज जरांगे पाटील यांच्या आंदोलनाला नवे वळण मिळाले आहे. मुंबईला जाण्याची घोषणा केल्यानंतर मुंबई पोलिसांनी आता तिसऱ्यांदा या आंदोलनाला परवानगी नाकारली आहे. त्यामुळे पुढे काय करायचे यावरून मराठा आंदोलकांमध्ये चर्चा सुरू झाली आहे. दरम्यान, जरांगे पाटील यांनी एकट्याने उपोषणाला बसण्यासाठी पुन्हा परवानगी मागावी, अशी सूचना त्यांच्या सहकाऱ्यांनी दिल्याचे समोर आले आहे.

जरांगे पाटील यांच्या सहकाऱ्यांनी सरकारला विनंती केली आहे की, त्यांच्या तब्येतीचा विचार करून सरकारने आपली भूमिका थोडी सैल करावी. सहकारी गंगाधर काळकुटे यांनी सांगितले की, जरांगे पाटील स्वतःहून दोन पावले मागे आले आहेत, आणि आता सरकारनेही दोन पावले मागे येऊन त्यांना उपोषणाची परवानगी द्यावी. मैदानावर उपोषणासाठी चार ते पाच जणच जाणार असल्याचेही काळकुटे यांनी सांगितले.

गेल्या 17 दिवसांपासून हे आंदोलन आणि उपोषण सुरू आहे. सरकारने मराठा आरक्षणाच्या मागण्या मान्य करून त्याबाबतचे लेखी पत्र द्यावे, त्यानंतरच जरांगे पाटील उपोषण मागे घेतील, असे काळकुटे यांनी स्पष्ट केले.

मुंबईला जाण्याची घोषणा केल्यानंतरही मुंबई पोलिसांनी तिसऱ्यांदा या आंदोलनाला परवानगी नाकारली. तरीही जरांगे पाटील आपल्या निर्णयावर ठाम असून, आज सकाळी 11 वाजता अंतरवाली सराटीतून मुंबईच्या दिशेने कूच करणार आहेत. परवानगी नाकारल्यानंतर जरांगे पाटील यांनी आक्रमक पवित्रा घेतला असून, सरकार वेगळाच डाव खेळत असल्याचा आरोप त्यांनी केला. मात्र आपण ठरलेल्या मार्गानेच मुंबईकडे जाणार असल्याचे त्यांनी ठामपणे सांगितले.

आंदोलकांना महत्त्वाच्या सूचना देताना जरांगे पाटील म्हणाले की, आपण एकटेच मुंबईला निघणार आहोत. पण याचा अर्थ मराठा आंदोलकांनी मुंबईत येऊ नये असा होत नाही, असेही त्यांनी स्पष्ट केले. "उद्या सकाळी मी अंतरवालीहून मुंबईला जायला निघेन," असे जरांगे पाटील यांनी सांगितले. त्यांच्या प्रवासातला पहिला मुक्काम बीड जिल्ह्यातील पाटोदा येथे असणार आहे. जिथे जिथे मुक्काम होईल, तिथे अंतरवाली सराटीसारखेच व्यासपीठ उभारण्याच्या सूचना कार्यकर्त्यांना देण्यात आल्या आहेत.

एका बाजूला मुंबई पोलिसांनी आंदोलनाला परवानगी नाकारली आहे, तर दुसरीकडे जरांगे पाटील मुंबईकडे जाण्याच्या निर्णयावर ठाम आहेत. त्यामुळे सरकार पुढे काय भूमिका घेणार, हा प्रश्न महत्त्वाचा बनला आहे. जरांगे पाटील यांच्या पुढील पावलाकडे मराठा समाजासह संपूर्ण राज्याचे लक्ष लागले आहे. सरकार आणि आंदोलकांमध्ये तोडगा निघतो की आंदोलन आणखी तीव्र होते, हे येत्या काही दिवसांत स्पष्ट होईल.