नाशिकमध्ये एफडीएची धडक कारवाई; १० दिवसांत ३६ ठिकाणी छापे, ५.४० कोटींचा भेसळयुक्त माल जप्त

सणासुदीचे दिवस जवळ आल्याने बाजारात खाद्यपदार्थांची मागणी मोठ्या प्रमाणात वाढली आहे आणि याच संधीचा फायदा घेत काही व्यापारी खाद्यपदार्थांमध्ये भेसळ करत असल्याचे निदर्शनास आले आहे. अशा भेसळ करणाऱ्या व्यापाऱ्यांना रोखण्यासाठी अन्न व औषध प्रशासनाने (एफडीए) नाशिक विभागात मोठी मोहीम हाती घेतली आहे. बाजारातील खाद्यपदार्थांची गुणवत्ता, शुद्धता आणि सुरक्षितता तपासण्यासाठी विभागातील विविध जिल्ह्यांत विशेष तपासणी पथके तैनात करण्यात आली आहेत.

गेल्या केवळ दहा दिवसांत या पथकांनी नाशिक विभागातील एकूण ३६ ठिकाणी छापे टाकले. या कारवाईत एकूण ५ कोटी ४० लाख १६ हजार ६२१ रुपये किमतीचा संशयित आणि भेसळयुक्त माल जप्त करण्यात आला. जप्त करण्यात आलेल्या वस्तूंमध्ये पाश्चराइज्ड बटर, देशी तूप, क्रीम, खाद्यतेल, मिठाई आणि फळांचा गर यांसह इतर अनेक दैनंदिन वापरातील खाद्यपदार्थांचा मोठ्या प्रमाणात समावेश आहे.

ही संपूर्ण कारवाई अन्न सुरक्षा आयुक्त तुकाराम मुंडे आणि सहायक आयुक्त (अन्न) मंगेश माने यांच्या थेट देखरेखीखाली राबवली जात आहे. सणासुदीच्या काळात मिठाई, दुग्धजन्य पदार्थ, मसाले, सुका मेवा आणि खाद्यतेल यांना असलेल्या वाढत्या मागणीचा गैरफायदा घेणाऱ्या व्यापाऱ्यांना अजिबात सोडले जाणार नाही, असे प्रशासनाने स्पष्ट केले आहे.

११ सप्टेंबरच्या पहाटे नाशिक शहरातील गर्दीच्या द्वारका चौकात दोन प्रवासी बसेस अडवून त्यांची तपासणी करण्यात आली, त्यावेळी तब्बल २,१५५ किलो संशयास्पद बर्फी जप्त करण्यात आली. यासोबतच संडे, करंजा, पंचवटी पेठ रोड आणि जेल रोड परिसरातील सुपरमार्केटमधूनही वनस्पती तेल, रिफाइंड सोयाबीन तेल, गूळ आणि तुपाचे संशयास्पद नमुने ताब्यात घेण्यात आले असून तो साठा सील करण्यात आला आहे. या व्यतिरिक्त अन्न सुरक्षा अधिकाऱ्यांच्या पथकांनी धुळे, जळगाव, पाचोरा, संगमनेर, श्रीरामपूर आणि सावेदी या ठिकाणीही छापे टाकून तपासणी केली.

जप्त करण्यात आलेल्या सर्व खाद्यपदार्थांचे कायदेशीर नमुने घेऊन ते तपासणीसाठी प्रयोगशाळेत पाठवण्यात आले आहेत. अन्न सुरक्षा आणि मानक कायद्याच्या कठोर तरतुदींनुसार भेसळ करणाऱ्यांवर फौजदारी गुन्हा दाखल करण्यात येणार आहे.

नाशिक विभागाच्या अन्न व औषध प्रशासनाने नागरिकांना महत्त्वाचे आवाहन केले आहे. नागरिकांच्या आरोग्याशी कोणत्याही प्रकारची छेडछाड खपवून घेतली जाणार नाही, असे प्रशासनाने म्हटले आहे. कोठेही भेसळयुक्त अन्न तयार केले जात असल्याचा किंवा विकले जात असल्याचा संशय आल्यास नागरिकांनी तात्काळ एफडीएच्या अधिकृत पोर्टलवर, https://complaints.mahafda.in या संकेतस्थळावर तक्रार नोंदवावी, असे आवाहन प्रशासनाने केले आहे.