Devendra Fadnavis : 'हिंदी माझी मावशी, मराठी माझी आई,' अमित शाहांसमोर फडणवीसांचं मोठं वक्तव्य

नवी मुंबईतील वाशी इथल्या सिडको एक्झिबिशन सेंटरमध्ये हिंदी दिवस आणि अखिल भारतीय राजभाषा संमेलनाच्या निमित्ताने एक खास कार्यक्रम झाला. या कार्यक्रमाला केंद्रीय गृहमंत्री अमित शाह, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यासह अनेक मोठी माणसं आली होती. त्यामुळे राजकीय आणि सामाजिक वर्तुळाचं लक्ष या कार्यक्रमाकडे लागलं होतं.

या कार्यक्रमात मुख्यमंत्री देवेंद्र फडणवीस यांनी हिंदी आणि मराठी भाषेच्या नात्यावर बोलताना काही महत्त्वाचे मुद्दे मांडले. हिंदी भाषेला राजभाषेचा दर्जा देण्याच्या प्रक्रियेचा उल्लेख करत त्यांनी मातृभाषेचं महत्त्व सांगितलं. आपल्या पंतप्रधानांनी असं म्हटलंय की प्रत्येकाने आपल्या राज्याची मातृभाषा शिकावी, कारण मातृभाषेतून मिळणारं ज्ञान आणि समज दुसऱ्या भाषेतून तितक्या सहज मिळत नाही, असं फडणवीस यांनी सांगितलं. आपली मातृभाषा शिकल्यानंतर तिच्यासोबत आणखी एक भाषा तरी शिकायलाच पाहिजे, अशी भूमिकाही त्यांनी या वेळी मांडली.

बोलताना फडणवीस यांनी मुन्शी प्रेमचंद यांच्या हिंदी साहित्याचा दाखला दिला आणि त्या निमित्ताने हिंदी भाषेची समृद्ध परंपराही अधोरेखित केली. हिंदी भाषेचा हा वारसा किती जुना आणि मोठा आहे, हे सांगण्यासाठी त्यांनी हा संदर्भ दिला.

पण या भाषणातल्या फडणवीसांच्या एका वाक्याची खरी चर्चा रंगली. 'मराठी भाषा माझी आई आहे, तर हिंदी भाषा माझी मावशी आहे,' असं ते म्हणाले. आईइतकाच मावशीचाही मान असतो, हे सांगत त्यांनी दोन्ही भाषांबद्दल आपला आदर व्यक्त केला. मराठी आणि हिंदी या दोन्ही भाषा आपल्यासाठी तितक्याच जवळच्या आहेत, हे या वाक्यातून त्यांनी स्पष्ट केलं.

याच कार्यक्रमात उपमुख्यमंत्री एकनाथ शिंदे यांनीही भाषण केलं आणि अमित शाह यांचं कौतुक केलं. जे अशक्य वाटत होतं ते अमित शाह यांनी शक्य करून दाखवलं, असं म्हणत त्यांनी कलम 370 हटवण्याचा उल्लेख केला. हिंदी आणि मराठी या केवळ देवनागरी लिपीतल्या भाषा नाहीत, तर त्या अभिमानाचा विषय आहेत, असंही शिंदे या वेळी म्हणाले. बोलताना त्यांनी संत नामदेवांच्या रचनांचा दाखला देत मराठी आणि हिंदी भाषेमधलं जुनं नातं अधोरेखित केलं.

अमित शाह काल पासून मुंबई दौऱ्यावर आहेत आणि गणेशोत्सवाच्या पार्श्वभूमीवर त्यांच्या या दौऱ्याकडेही राजकीय वर्तुळाचं लक्ष लागलंय. त्यामुळे हिंदी दिवसाचा हा कार्यक्रम फक्त भाषेपुरता मर्यादित न राहता राजकीयदृष्ट्याही चर्चेचा विषय बनला आहे.