महाराष्ट्र बहुभाषिक असल्याच्या अमित शाह यांच्या वक्तव्यावर मनसेचा आक्षेप

महाराष्ट्रातील भाषेचा मुद्दा पुन्हा एकदा चर्चेत आला आहे. गृहमंत्री अमित शाह एका कार्यक्रमात बोलताना महाराष्ट्र हा बहुभाषिक प्रदेश आहे असं म्हणाले, आणि त्यावरून महाराष्ट्र नवनिर्माण सेनेने जोरदार नाराजी व्यक्त केली आहे. मनसेचे प्रवक्ते गजानन काळे यांनी या वक्तव्यावर सडकून टीका करत महाराष्ट्र हे मराठी भाषिक राज्य आहे याची आठवण करून दिली.

'अमित शाह यांनी महाराष्ट्रात येऊन मराठीचा अपमान करू नये, कारण महाराष्ट्र हे मराठी भाषिक राज्य आहे,' असं काळे यांनी थेट सांगितलं. गरज पडली तर संयुक्त महाराष्ट्राच्या लढ्याचा इतिहास सांगणारं पुस्तक अमित शाह यांना पाठवू, असंही त्यांनी बोलून दाखवलं.

काळे यांच्या मते, महाराष्ट्र बहुभाषिक आहे असं सांगताना मराठी माणूस आणि महाराष्ट्राचा इतिहास विसरता कामा नये. हिंदी भाषा शिकण्याला कोणाचाही विरोध नाही, पण हिंदीच्या नावाखाली मराठी भाषेवर आक्रमण होऊ नये, अशी त्यांची स्पष्ट भूमिका आहे. 'ज्याला हिंदीत व्यवहार करायचा आहे, तो हिंदी शिकेलच. पण हिंदी भाषा संमेलनाच्या नावाखाली मराठी भाषेवर हल्ला करून महाराष्ट्राचा अपमान केला, तर महाराष्ट्र ते खपवून घेणार नाही,' असा इशारा त्यांनी दिला.

यावेळी काळे यांनी तामिळनाडू, आंध्र प्रदेश आणि दक्षिणेतील इतर राज्यांचाही उल्लेख केला आणि अमित शाह अशा प्रकारचं वक्तव्य त्या राज्यांमध्ये करू शकतील का, असा सवाल उपस्थित केला. संयुक्त महाराष्ट्राच्या लढ्यामुळेच महाराष्ट्र राज्य तयार झालं, हे लक्षात घेऊन महाराष्ट्राची ओळख आणि मराठी भाषेचं महत्त्व समजून घेण्यासाठी अमित शाह यांना संयुक्त महाराष्ट्राच्या इतिहासाचं पुस्तक पाठवू, असं काळे यांनी सांगितलं.

दुसऱ्या बाजूला, अमित शाह यांनी आपल्या भाषणात छत्रपती शिवाजी महाराज, स्वराज्य, स्वभाषा आणि मराठी भाषेच्या योगदानाचा उल्लेख केला होता. महाराष्ट्राच्या बहुभाषिक संस्कृतीला आपण प्रणाम करतो, असं त्यांनी स्पष्ट केलं होतं. महाराष्ट्रात मराठीसोबत कोकणी, गुजराती, हिंदी, सिंधी, वारली अशा अनेक भाषांचा विकास झाला असून त्यांचा सन्मान झाला पाहिजे, असंही शाह म्हणाले होते. पंतप्रधान नरेंद्र मोदी यांनी मराठीला अभिजात भाषेचा दर्जा दिल्याचा उल्लेखही त्यांनी केला.

गुजरातचं उदाहरण देत अमित शाह यांनी सांगितलं की गुजरातमध्ये गुजराती भाषा बोलली जाते आणि हिंदी बोलली जात नाही. राष्ट्रीय पातळीवर काम करताना आपल्याला हिंदी समजत आणि बोलता येत असल्यामुळे कोणतीही अडचण आली नाही, असंही त्यांनी नमूद केलं. स्वातंत्र्यवीर सावरकर यांनी मराठी भाषेच्या शुद्धीकरणासाठी केलेल्या कामाचाही अमित शाह यांनी उल्लेख केला आणि भारतातील प्रत्येक भाषा समृद्ध करण्याची गरज असल्याचं सांगितलं.

मात्र या वक्तव्यानंतर मनसेने घेतलेल्या आक्रमक भूमिकेमुळे मराठी विरुद्ध हिंदी भाषेचा मुद्दा पुन्हा महाराष्ट्राच्या राजकारणात तापण्याची चिन्हं दिसत आहेत.