अमित शहांचा महाराष्ट्र दौरा की 'मेवा संकल्प अभियान'? हर्षवर्धन सपकाळांचा घणाघात

केंद्रीय गृहमंत्री अमित शहा यांच्या महाराष्ट्र दौऱ्यावरून राज्यात पुन्हा एकदा राजकारण तापलं आहे. महाराष्ट्र काँग्रेसचे प्रदेशाध्यक्ष हर्षवर्धन सपकाळ यांनी या दौऱ्यावर जोरदार टीका केली असून, हा दौरा 'सेवा संकल्प अभियान' नसून 'मेवा संकल्प अभियान' असल्याचं म्हटलं आहे.

सपकाळ यांच्या मते, मुंबई ही देशाची आर्थिक राजधानी आहे. त्यामुळे महाराष्ट्रात येऊन भाजपला राजकीय आणि आर्थिक फायदा कसा मिळवता येईल, यासाठीच हा दौरा आखला गेला आहे, असा आरोप त्यांनी केला. त्यांच्या या टीकेमुळे सत्ताधारी आणि विरोधकांमधली जुगलबंदी आणखी वाढण्याची शक्यता आहे.

राज्यातल्या शेतकऱ्यांच्या परिस्थितीवरून सपकाळ यांनी अमित शहांना थेट सवाल केला. महाराष्ट्रात दुष्काळाचं संकट गंभीर असताना शेतकरी मोठ्या अडचणीत आहे, असं सांगत त्यांनी अमित शहांना थेट आव्हान दिलं. खरंच महाराष्ट्राची सेवा करायची असेल तर सरसकट कर्जमाफी द्यावी आणि हेक्टरी ५० हजार रुपयांची नुकसानभरपाई जाहीर करावी, अशी मागणी त्यांनी केली.

याशिवाय राज्यातल्या जमीन व्यवहारांवरही सपकाळ यांनी सरकारला जाब विचारला. उद्योगपतींना कोणकोणत्या जमिनी दिल्या गेल्या, त्यातून किती पैसा जमा झाला आणि या व्यवहारांमध्ये काही गैरव्यवहार झाला का, याचा हिशोब जनतेसमोर मांडावा, अशी मागणी त्यांनी केली.

कुंभमेळ्याच्या खर्चाचा मुद्दाही सपकाळ यांनी उपस्थित केला. हजारो कोटी रुपये खर्च झाले असताना त्याचा नेमका हिशोब जनतेला मिळायला हवा, असं ते म्हणाले. या पैशांमध्येही गैरव्यवहार झाल्याचा आरोप त्यांनी केला.

सपकाळ यांनी यावेळी राष्ट्रीय स्वयंसेवक संघाच्या भूमिकेवरही निशाणा साधला. संघाचं सध्याचं 'लिबरल' रूप हे केवळ दिखाव्यासाठी असल्याची टीका त्यांनी केली. संविधान, तिरंगा आणि मुस्लिम समाजाबाबत संघानं आपली भूमिका स्पष्टपणे मांडावी, अशी मागणी त्यांनी केली.

सरसंघचालक मोहन भागवत यांनी या मुद्द्यांवर स्वतः खुलासा करावा, असंही सपकाळ यांनी सांगितलं. अमित शहांच्या या दौऱ्यामुळे भाजप आणि काँग्रेसमधला जुना वाद पुन्हा एकदा पेटण्याची चिन्हं दिसत आहेत.