मुंबईत अमित शाह-शिंदे यांची अर्धा तास भेट; UCC आणि सुरक्षा धोरणावर शाहांचे वक्तव्य
केंद्रीय गृहमंत्री अमित शाह यांच्या मुंबई दौऱ्यात उपमुख्यमंत्री एकनाथ शिंदे यांच्यासोबत झालेल्या भेटीने राजकीय वर्तुळात चर्चा सुरू झाली, तर माध्यमांशी बोलताना शाह यांनी समान नागरी संहिता आणि सुरक्षा धोरणाबाबत भाष्य केले.
राज्यातील राजकीय समीकरणे आणि नव्या आघाड्यांबाबत चर्चा सुरू असतानाच रविवारी केंद्रीय गृहमंत्री अमित शाह यांनी उपमुख्यमंत्री एकनाथ शिंदे यांची भेट घेतली. ही भेट सुमारे ३० मिनिटे चालली आणि त्यामुळे भाजपच्या गोटात अस्वस्थतेची चर्चा रंगू लागली आहे. भेटीनंतर शाह आणि शिंदे एकाच गाडीतून एशियाटिक सोसायटीच्या कार्यालयात पोहोचले.
अमित शाह सध्या तीन दिवसांच्या महाराष्ट्र दौऱ्यावर आहेत. या दौऱ्यादरम्यान ते भाजप नेते आशिष शेलार यांनी आयोजित केलेल्या गणेशोत्सव कार्यक्रमालाही उपस्थित राहणार आहेत. पक्षातील काही विश्वसनीय सूत्रांच्या माहितीनुसार, शाह हे शेलार यांच्या गणेशोत्सव कार्यक्रमाला हजेरी लावण्याची संधी सहसा सोडत नाहीत. त्यामुळे राज्यातील सध्याच्या राजकीय गोंधळाच्या पार्श्वभूमीवर शाह आणि शिंदे यांच्या या भेटीकडे विशेष लक्ष वेधले जात आहे.
याच दौऱ्यात रविवारी मुंबईत माध्यमांशी बोलताना अमित शाह यांनी मोठी घोषणा केली. ते म्हणाले, आम्ही अनेक राज्यांमध्ये समान नागरी संहिता आधीच लागू केली आहे आणि २०२९ पूर्वी भाजपच्या नेतृत्वाखालील एनडीए सरकारांच्या काळात सर्व २१ राज्यांमध्ये समान नागरी संहिता लागू केली जाईल, असा विश्वास त्यांनी व्यक्त केला. सर्जिकल स्ट्राईक, हवाई हल्ले आणि ऑपरेशन सिंदूर यांसारख्या कारवायांमुळे देशाने सुरक्षेच्या विविध आघाड्यांवर दहशतवादाविरोधात शून्य सहिष्णुतेचे धोरण प्रस्थापित केल्याचेही ते म्हणाले.
दहशतवादी हल्ले, सर्जिकल स्ट्राईक, हवाई हल्ले आणि ऑपरेशन सिंदूर या मोहिमांचा उल्लेख करत शाह म्हणाले की, दहशतवादी हल्ल्यांना प्रत्युत्तर देण्याच्या धोरणामुळे भारताने जगाला आपली ताकद दाखवून दिली आहे. कलम ३७० रद्द करणे, नक्षलवादावर नियंत्रण मिळवणे आणि ईशान्य भागातील समस्या सोडवणे या सरकारच्या निर्णयांमुळे देशाला तीन मोठ्या संकटांपासून दिलासा मिळाल्याचेही त्यांनी सांगितले.
मुंबईत झालेल्या ५२ व्या इंडिया जेम्स अँड ज्वेलरी अवॉर्ड्स सोहळ्यात बोलताना गृहमंत्री शाह यांनी सांगितले की, एखाद्या दहशतवादी हल्ल्याला पाकिस्तानच्या हद्दीत घुसून प्रत्युत्तर दिले जाईल आणि असा कठोर निर्णय घेणारे पंतप्रधान देशाला मिळतील याची आधी कोणी कल्पनाही केली नव्हती. सर्जिकल स्ट्राईक असो, हवाई हल्ला असो किंवा ऑपरेशन सिंदूर असो, पंतप्रधान नरेंद्र मोदी यांनी असे संरक्षण धोरण अवलंबले आहे की, भारतावर हल्ला करण्याचा विचार करण्यापूर्वीही शत्रू दोनदा विचार करेल आणि थरथर कापेल, असे शाह म्हणाले. रामजन्मभूमी मंदिराचे बांधकाम, काशी विश्वनाथ कॉरिडॉर, केदारनाथचे पुनरुज्जीवन आणि महाकाल लोक या गोष्टींचा उल्लेख करत, ज्याबद्दल लोक अनेक दशके बोलण्याचे धाडसही करत नव्हते असे भारताने साध्य केल्याचे त्यांनी नमूद केले.
