झेप्टो, IRCTC किचनसह मुंबई-पुण्यातील १८ आस्थापनांचे FDA कडून परवाने निलंबित

महाराष्ट्र अन्न व औषध प्रशासनाने म्हणजेच FDA ने मुंबईत अन्न सुरक्षेच्या मुद्द्यावरून मोठी मोहीम राबवली असून, गुणवत्ता आणि स्वच्छतेच्या नियमांत हलगर्जीपणा आढळल्याने सहा मोठ्या ब्रँड्सचे परवाने निलंबित केले आहेत. यात झेप्टोच्या मालाड येथील आवाराचा समावेश आहे. त्याचबरोबर पुणे विभागातही बारा आस्थापनांवर कारवाई झाली आहे.

महाराष्ट्र FDA ने ८ सप्टेंबर रोजी काढलेल्या प्रसिद्धीपत्रकात म्हटले आहे की, अधिकाऱ्यांनी विविध ठिकाणी पाहणी केली असता स्वच्छता, अन्न हाताळणी, तापमान नियंत्रण आणि कर्मचाऱ्यांच्या वैयक्तिक स्वच्छतेत गंभीर त्रुटी दिसून आल्या. त्यामुळे थेट परवाने रद्द करण्याचा निर्णय घेण्यात आला.

रेल्वे प्रवाशांना जेवण पुरवणाऱ्या IRCTC च्या बेस किचन आणि फूड प्लाझांचीही तपासणी करण्यात आली. एकूण पाच ठिकाणी पाहणी झाली, त्यापैकी कुर्ला पश्चिम येथील आर. के. असोसिएट्स अँड हॉटेलियर्स प्रायव्हेट लिमिटेडचा अन्न परवाना निलंबित करण्यात आला, तर उरलेल्या चार आस्थापनांना सुधारणा नोटिसा देण्यात आल्या. कुर्ला येथील बेस किचनमध्ये झुरळांचा वावर, उघड्यावर अन्न साठवणे, कचऱ्याजवळ अन्न तयार करणे आणि स्वयंपाकघराची वाईट अवस्था असे प्रकार आढळले.

मालाड पश्चिम येथील Drogheria Sellers Pvt. Ltd. या झेप्टोच्या आवारातही अशाच त्रुटी सापडल्या. मोठ्या प्रमाणात झुरळे, बिघडलेली कोल्ड चेन, अस्वच्छ गटार आणि कर्मचाऱ्यांच्या स्वच्छतेतील उणिवा तपासणीत उघड झाल्या. सर्वात मोठी त्रुटी नाशवंत पदार्थांच्या तापमानाबाबत होती - दूध, चीज आणि दही असे पदार्थ १४ ते १५ अंश सेल्सिअस तापमानात ठेवले जात होते, प्रत्यक्षात हे पदार्थ २ ते ६ अंश सेल्सिअस तापमानात साठवणे बंधनकारक असते. यानंतर FDA ने झेप्टोच्या आवाराचा परवाना तात्काळ निलंबित केला असून विक्री, साठवणूक, वितरण आणि ऑनलाइन ऑर्डर पूर्ततेवरही बंदी घातली आहे.

खारघर येथील मातेश्वरी मिल्कवरही कारवाई झाली. दुधाच्या तापमान नियंत्रणात, स्वच्छतेत, कीटक नियंत्रणात आणि कर्मचाऱ्यांच्या वैद्यकीय तपासणीत त्रुटी आढळल्या. ग्राहकांना दिलेली माहिती आणि दुधाच्या टाक्यांवरील तपशिलात तफावत दिसली, तसेच पाश्चरायझेशनची सुविधा नसतानाही पाश्चराइज्ड दूध पुरवले जात असल्याचे उघड झाले. ७ सप्टेंबर रोजी सुनावणी झाल्यानंतर परवाना निलंबित करण्यात आला.

जुहू येथील इस्कॉन कॅम्पसमधील तीन फूड युनिट्सवरही कारवाई झाली. पाण्याच्या नियमित गुणवत्ता तपासणीच्या नोंदी गहाळ आढळल्या, कच्चे आणि तयार अन्न चुकीच्या पद्धतीने साठवलेले आढळले, तसेच कीटकांचा प्रादुर्भाव आणि कर्मचाऱ्यांच्या वैद्यकीय तपासणी व प्रशिक्षणाच्या नोंदींचा अभाव दिसून आला. यानंतर तिन्ही युनिट्सचे परवाने निलंबित करण्यात आले.

पुणे विभागातही FDA ने बारा आस्थापनांवर कारवाई केली. यातील आदिती व्हेज ही आस्थापना वैध अन्न परवान्याशिवाय सुरू असल्याचे आढळल्याने ती बंद करण्याचा आदेश देण्यात आला. काका वडा पाव, क्रिस्टल गोरमेट, गुरुकृपा चिकन प्लांट, हॉटेल यशराज, श्री गणेश हॉटेल, हॉटेल सह्याद्री, सावनगिरी लोणी डोसा, गोल्डन चाहा, जॅक्सन डेअरी आणि खडा वडा पाव सेंटर या अकरा आस्थापनांचे परवाने निलंबित करण्यात आले.

अन्न व्यवसायातील सर्व आस्थापनांनी अन्न सुरक्षा आणि स्वच्छतेच्या नियमांचे पालन करणे बंधनकारक असल्याचे FDA ने स्पष्ट केले आहे. हॉटेल असो, डेअरी असो, ऑनलाइन डिलिव्हरी वेअरहाऊस असो किंवा रेल्वे बेस किचन असो, अन्न गुणवत्तेत तडजोड केल्यास कारवाई होणार असल्याचा इशारा FDA ने दिला आहे. अशा आस्थापनांची तपासणी आणि कारवाई पुढील काळातही सुरू राहणार असल्याचे संकेत FDA ने दिले आहेत.