राज्यात पावसाचा पुन्हा जोर वाढणार; विदर्भ, मराठवाड्यासह कोकणातही मुसळधार बरसणार

गेल्या काही दिवसांपासून पावसाने ओढ दिल्यामुळे राज्यातील शेतकरी चिंतेत होते. सतत पाऊस लांबल्याने शेतीच्या कामांवर परिणाम होत असल्याने शेतकऱ्यांमध्ये अस्वस्थता होती. मात्र आता त्यांच्यासाठी दिलासादायक बातमी समोर आली आहे. राज्यात मान्सून पुन्हा सक्रिय होण्याची शक्यता असून, 17 सप्टेंबरदरम्यान विविध भागांत पावसाचा जोर वाढेल, असा अंदाज हवामान तज्ज्ञ पंजाबराव डख यांनी वर्तवला आहे.

पंजाबराव डख यांच्या अंदाजानुसार, राज्यात एक कमी दाबाचा पट्टा तयार झाला आहे. हा पट्टा विदर्भातून मराठवाडा, उत्तर महाराष्ट्र आणि त्यानंतर कोकणाच्या दिशेने सरकण्याची शक्यता आहे. म्हणजेच हा पट्टा जसजसा पुढे सरकेल, तसतसे राज्यातील निरनिराळे भाग पावसाच्या टप्प्यात येतील. त्यामुळे राज्यातील अनेक भागांत पाऊस पडण्याची शक्यता निर्माण झाली आहे. विदर्भात 11 सप्टेंबरपासूनच पावसाला सुरुवात झाली आहे. चंद्रपूर, वर्धा, नागपूर, भंडारा आणि गोंदिया या जिल्ह्यांत हलका ते मध्यम पाऊस पडेल, असा अंदाज आहे. याशिवाय अकोला, बुलढाणा, अमरावती आणि इतर जिल्ह्यांतही चांगला पाऊस होण्याची शक्यता वर्तवण्यात आली आहे. मराठवाड्यातील नांदेड, हिंगोली, छत्रपती संभाजीनगर, बीड आणि लातूर या जिल्ह्यांत, तर उत्तर महाराष्ट्रातील नाशिक आणि अहिल्यानगर जिल्ह्यांत पावसाचा जोर वाढू शकतो. एकूणच विदर्भापासून सुरू झालेला हा पावसाचा प्रवास टप्प्याटप्प्याने राज्याच्या इतर भागांतही पोहोचणार असल्याचे या अंदाजावरून दिसते.

दरम्यान, नागपूर शहर आणि परिसरात शनिवारी, म्हणजे 12 तारखेला विजांच्या कडकडाटासह जोरदार पाऊस झाला. त्या दिवशी दुपारपर्यंत आकाश निरभ्र होते, म्हणजे ढगांचा मागमूसही नव्हता. दुपारी दोन वाजल्यानंतर मात्र ढग जमा होऊ लागले आणि काही मिनिटांतच पावसाने हजेरी लावली. सुरुवातीच्या काही तासांत पावसाने चांगलाच जोर धरला, त्यानंतर संध्याकाळपर्यंत रिमझिम पाऊस सुरू होता. या पावसामुळे हवामानातही बदल जाणवला. रात्रीचे तापमान नेहमीपेक्षा दोन अंशांनी जास्त नोंदवले गेले, तर किमान तापमान 24.2 अंश सेल्सिअस इतके होते.

राज्यातील 11 जिल्ह्यांना हवामान विभागाने यलो अलर्ट जारी केला आहे. गेल्या काही दिवसांत वातावरणात मोठा बदल पाहायला मिळत आहे. विदर्भात हलका ते मध्यम, तसेच काही ठिकाणी जोरदार पावसाची शक्यता वर्तवण्यात आली आहे. राज्यातील अनेक भागांत अजूनही अपेक्षित पाऊस झालेला नाही, त्यामुळे तिथे शेतकरी अजूनही पावसाची वाट पाहत आहेत. मात्र आता हवामानात बदल होण्याची शक्यता हवामान विभागाने व्यक्त केली असून, राज्यातील विविध भागांत पावसाच्या सरी पाहायला मिळतील, असा अंदाज आहे.