गोंदिया जिल्हा परिषदेच्या स्थायी समितीत भाजप पदाधिकाऱ्यांमध्येच जुंपली, माजी अध्यक्षांची बांधकाम सभापतींवर

गोंदिया जिल्हा परिषदेच्या स्थायी समितीच्या बुधवारी झालेल्या बैठकीत सत्ताधारी भारतीय जनता पक्षातील अंतर्गत कलह आणि समन्वयाचा अभाव उघड झाला. बांधकाम विभागाच्या तब्बल १९ कामांच्या करारांवरून माजी जिल्हा परिषद अध्यक्ष आणि विद्यमान बांधकाम सभापती यांच्यात थेट शाब्दिक बाचाबाची झाली आणि बैठकीत एकच खळबळ उडाली. जिल्हा परिषदेत भाजपची एकहाती सत्ता असतानाही पक्षाच्याच वरिष्ठ पदाधिकाऱ्यांमध्ये असा उघड वाद झाल्याने उपस्थित सर्वांचेच लक्ष या घटनेकडे वेधले गेले.

मिळालेल्या माहितीनुसार, बैठकीचे कामकाज सुरू होताच बांधकाम विभागाच्या विविध विकासकामांवर चर्चा सुरू झाली. बांधकाम सभापती डॉ. लक्ष्मण भगत यांनी आपल्याच विभागाच्या कार्यकारी अभियंत्यांना पत्र लिहून तब्बल १९ कामांचे करारनामे थांबवण्याचे आणि निविदा प्रक्रिया रद्द करण्याचे निर्देश दिले होते. याच पत्रावरून सभेत अचानक वातावरण तापले. रद्द करण्यात आलेली बहुतांश कामे माजी जिल्हा परिषद अध्यक्ष पंकज रहांगडाले यांच्याशी संबंधित असल्याचा मुद्दा समोर येताच, रहांगडाले जागेवर उभे राहून या मनमानी कारभारावर कडक शब्दांत आक्षेप घेतला. आपल्याशी संबंधित कामांचेच करार रद्द करण्यात आल्याचा मुद्दा मांडत त्यांनी बांधकाम सभापतींच्या निर्णयावर तीव्र नाराजी व्यक्त केली.

भाजपची जिल्हा परिषदेत एकहाती सत्ता असतानाही पक्षाच्याच वरिष्ठ पदाधिकाऱ्यांमध्ये सुरू असलेल्या या वर्चस्ववादाने उपस्थितांचे लक्ष वेधून घेतले. शांत आणि संयमी स्वभावाचे मानले जाणारे बांधकाम सभापती डॉ. लक्ष्मण भगत यांना माजी अध्यक्षांच्या आक्रमक पवित्र्यापुढे आपली बाजू प्रभावीपणे मांडता आली नाही आणि ते बॅकफूटवर गेल्याचे दिसून आले. यातच माजी बांधकाम सभापती आणि विद्यमान जिल्हा परिषद सदस्य संजय टेंभरे यांनीही पंकज रहांगडाले यांची बाजू घेत, बांधकाम सभापती चुकीचे व मनमानी निर्णय घेत असल्याचा घणाघाती आरोप केला. त्यामुळे एकाच वेळी दोन ज्येष्ठ पदाधिकारी विद्यमान सभापतींच्या विरोधात उभे राहिल्याचे चित्र बैठकीत दिसून आले.

हा संपूर्ण थरार जिल्हा परिषद अध्यक्ष लायकराम भेंडारकर, महिला व बालकल्याण सभापती पौर्णिमा ढेंगे, कृषी व पशुसंवर्धन सभापती दीपा चंद्रिकापुरे आणि समाजकल्याण सभापती रजनी कुंभरे यांच्यासह विविध विभागांच्या वरिष्ठ अधिकाऱ्यांच्या समक्ष घडला. जिल्हा परिषदेच्या या सर्व प्रमुख पदाधिकाऱ्यांसमोरच सत्ताधारी पक्षातील अंतर्गत मतभेद उघडपणे समोर आल्याने प्रशासकीय वर्तुळातही याबाबत चर्चा रंगली. विकासकामांवरून सत्ताधारी पक्षातच जुंपल्यामुळे आणि अंतर्गत गटबाजी उघडी पडल्याने, आगामी काळात याच १९ कामांच्या मुद्द्यावरून गोंदिया जिल्हा परिषदेचे राजकारण आणखी तापण्याचे स्पष्ट संकेत मिळत आहेत.