अंतराळालाही पाझर फुटेल अशी दुर्दैवी घटना, हिंगणीत जावयाचा वीज पडून मृत्यू

सेलू तालुक्यातील हिंगणी गावात रविवारी, १३ सप्टेंबर रोजी दुपारी दीड वाजताच्या सुमारास एक काळीज हेलावणारी आणि कुटुंबाच्या तोंडाशी आलेला घास हिरावून नेणारी घटना घडली. सासरच्या शेतात पिकांच्या संरक्षणासाठी कुंपणाची तार दुरुस्त करत असताना महावितरणची मुख्य उच्च दाबाची वीज वाहिनी अचानक तुटून थेट अंगावर पडल्याने ३२ वर्षीय जावयाचा जागीच मृत्यू झाला.

मृत तरुणाचे नाव महेश टापरे (वय ३२, रा. हिंगणी) असे आहे. महेश हे हिंगणी येथील शेतकरी चंद्रभानजी मुडे यांचे जावई होते. ही दुर्घटना चंद्रभानजी मुडे यांच्या जुनेवाणी मौजातील शेतात घडली.

रविवारी दुपारी मुडे कुटुंबातील इतर सदस्यही शेतात हजर होते. त्याचवेळी महेश टापरे शेतातील पिकांना जनावरांपासून वाचवण्यासाठी कुंपणाच्या लोखंडी तारा नीट बसवण्याचे आणि जोडण्याचे काम करत होते. काम सुरळीत सुरू असतानाच शेतावरून गेलेली महावितरणची मुख्य उच्च दाबाची तार अचानक तुटली आणि ती दुर्दैवाने थेट खाली, पिकांच्या संरक्षणासाठी लावलेल्या लोखंडी कुंपणाच्या तारांवर जाऊन पडली.

त्या क्षणी महेश टापरे यांच्या हातात कुंपणाची तार होती, त्यामुळे त्यांना क्षणार्धात महावितरणच्या विजेचा तीव्र धक्का बसला. डोळ्यांसमोर घडलेल्या या भीषण प्रकाराने शेतात उपस्थित असलेल्या कुटुंबीयांच्या पायाखालची जमीनच सरकली. त्यांनी क्षणाचाही वेळ न दवडता तातडीने महावितरण विभागाला फोन करून वीज प्रवाह बंद करण्याची विनंती केली. मात्र वीज प्रवाह बंद होईपर्यंत बराच वेळ गेला आणि तोपर्यंत महेश यांना उपचाराची संधीच मिळाली नाही. तीव्र विद्युत प्रवाहामुळे त्यांचा जागीच करुण अंत झाला.

घटनेची माहिती मिळताच हिंगणीचे पोलीस पाटील मारुती चचाने यांनी तत्परता दाखवत तात्काळ सेलू पोलीस स्टेशनला याची माहिती दिली. घटनेचे गांभीर्य लक्षात घेऊन सेलू पोलीस स्टेशनचे ठाणेदार वाघोडे यांच्या मार्गदर्शनाखाली तपास अधिकारी उपनिरीक्षक धनंजय पांडे आपल्या पथकासह घटनास्थळी रवाना झाले. तसेच महावितरणचे अभियंता वाटकर हेदेखील तातडीने घटनास्थळी पोहोचले.

पोलिसांनी घटनास्थळी पंचनामा करून मृतदेह विच्छेदनासाठी पाठवला आहे. या प्रकरणाचा पुढील कायदेशीर तपास सेलू पोलिसांकडून सुरू आहे.

एका हसत्याखेळत्या तरुणाच्या अकाली मृत्यूमुळे हिंगणी परिसरात आणि मुडे-टापरे कुटुंबावर शोककळा पसरली आहे.