सातारा बांधकाम विभागातील अजय देशपांडे, निलेश कोहाळे यांना 'उत्कृष्ट अभियंता' पुरस्कार

रस्ते, पूल, सरकारी इमारती आणि इतर मोठी बांधकामे उभी करण्याचं काम सार्वजनिक बांधकाम विभाग करत असतो. या विभागामार्फत विविध महत्त्वाची सार्वजनिक बांधकामे आणि विकास प्रकल्पही राबवले जातात. या कामांचा दर्जा चांगला राहावा, ती सुरक्षित व्हावीत आणि गुणवत्ता राखली जावी, यासाठी या विभागातल्या अभियंत्यांची जबाबदारी मोठी असते. आपल्या तांत्रिक कौशल्याचा आणि प्रशासकीय अनुभवाचा प्रभावी वापर करून उल्लेखनीय कामगिरी करणाऱ्या अभियंत्यांना राज्य सरकार दरवर्षी वैयक्तिक पुरस्कार देऊन गौरवतं. यंदा हा मान साताऱ्याच्या सार्वजनिक बांधकाम विभागातील अजय देशपांडे आणि निलेश कोहाळे या दोघांना मिळाला आहे.

अजय देशपांडे सध्या फलटणला उपअभियंता म्हणून काम बघतात, तर निलेश कोहाळे सातारा सार्वजनिक बांधकाम विभागात शाखा अभियंता आहेत. त्यांच्या उल्लेखनीय कामगिरीबद्दल राज्य सरकारकडून या दोघांना 'उत्कृष्ट अभियंता' म्हणून गौरवण्यात येणार आहे. भारतरत्न सर मोक्षगुंडम विश्वेश्वरय्या यांच्या जयंतीनिमित्त दरवर्षी १५ सप्टेंबरला देशभर 'अभियंता दिन' साजरा होतो. याच दिवशी आयोजित करण्यात येणाऱ्या खास कार्यक्रमात या दोघांना पुरस्कार देऊन गौरवण्यात येणार आहे.

अजय देशपांडे यांचं मुख्य योगदान आहे तापोळा केबल स्टे ब्रिजच्या कामात. महाबळेश्वरला उपअभियंता असताना त्यांनी तापोळ्याजवळच्या शिवसागर जलाशयावरच्या या पुलाच्या कामकाजाची जबाबदारी प्रभावीपणे सांभाळली. हा पूल जिल्ह्यातला पहिलाच केबल स्टे ब्रिज ठरला असून, यामुळे दुर्गम भागातल्या दळणवळणाला मोठी चालना मिळाली आहे. अभियांत्रिकीच्या दृष्टीने हे काम खूप आव्हानात्मक होतं. तांत्रिक बाबी, बांधकामाचा दर्जा, सुरक्षितता आणि कामाची अंमलबजावणी, या सगळ्यावर देशपांडे यांनी विशेष लक्ष दिलं. त्यांच्या याच तांत्रिक कौशल्याची आणि प्रशासकीय क्षमतेची दखल घेऊन त्यांची या पुरस्कारासाठी निवड झाली.

निलेश कोहाळे यांनीही सार्वजनिक बांधकाम विभागात शाखा अभियंता म्हणून काम करताना वेगवेगळ्या बांधकाम प्रकल्पांमध्ये जबाबदारीने काम केलं आहे. मेढा बांधकाम उपविभागातही त्यांनी आपल्या कार्यक्षमतेची छाप पाडली. विशेष म्हणजे सेवेला सुरुवात करून काही वर्षांचा कालावधी पूर्ण होत असतानाच त्यांची या पुरस्कारासाठी निवड झाली आहे, आणि म्हणूनच त्यांच्या कामाची ही विशेष दखल अधिक उठून दिसते.

अजय देशपांडे आणि निलेश कोहाळे यांच्या या निवडीबद्दल सार्वजनिक बांधकाम विभागातले अधिकारी, कर्मचारी आणि बांधकाम क्षेत्रातल्या इतर लोकांनीही त्यांचं अभिनंदन केलं आहे. अभियंता दिनाच्या निमित्ताने साताऱ्याच्या शिरपेचात या दोन्ही अधिकाऱ्यांनी आणखी एक मानाचा तुरा रोवला जाणार आहे, असं मानलं जात आहे.