शेती आणि पर्यावरण धोक्यात! बावधनसह १० गावांतील शेतकरी, महिला रस्त्यावर; खाण-क्रशर प्रकल्पाला एकजुटीने विरोध

वाई तालुक्यातील बावधन परिसरात प्रस्तावित असलेल्या खाण-क्रशर प्रकल्पाच्या विरोधात स्थानिक शेतकरी व ग्रामस्थांनी एकत्र येत आपला रोष व्यक्त केला. यासाठी बावधन चावडी येथे मोठी बैठक बोलावण्यात आली होती, ज्याला परिसरातील दहाहून अधिक गावांतील सुमारे दोन ते अडीच हजार शेतकरी, महिला, विद्यार्थी आणि ग्रामस्थ उपस्थित होते. एवढ्या मोठ्या संख्येने नागरिक एकत्र येणे हेच या भागातील प्रकल्पविरोधी भावना किती तीव्र आहे, हे दाखवणारे ठरले.

बावधनसह नागेवाडी, दरेवाडी, कनूर, अनपटवाडी, म्हातेकरवाडी, वाघजाईवाडी, पांढरेचीवाडी, शेलारवाडी आणि व्याजवाडी या गावांतील रहिवासी या बैठकीत सहभागी झाले होते. उपस्थित शेतकरी, महिला आणि विद्यार्थ्यांनी आपल्या भावना मांडत खाण-क्रशर प्रकल्पामुळे निर्माण होणाऱ्या अडचणी प्रशासनासमोर उघड केल्या.

ग्रामस्थांनी सांगितले की, सन २०२२ साली खासदार उदयनराजे भोसले यांच्या नावावर असलेल्या जमिनीलगतची मोजणी करण्यात आली होती. मात्र ही मोजणी करताना शेजारील जमीनमालकांना पुरेशी माहिती न दिल्याचा आरोप त्यांनी केला. तसेच बावधन, अनपटवाडी आणि वाघजाईवाडी या ग्रामपंचायतींनी खाण-क्रशरला विरोध करणारे ग्रामसभेचे ठराव आधीच मंजूर केलेले असतानाही या प्रकल्पाची पुढील प्रक्रिया सुरू राहिल्याबद्दल त्यांनी प्रश्न उपस्थित केले. आपल्याच ग्रामपंचायतींनी घेतलेल्या ठरावांना डावलून काम पुढे रेटले जात असल्याची भावना ग्रामस्थांमध्ये तीव्र होती.

काही शेतकऱ्यांनी मोजणी प्रक्रियेबाबत संबंधित अधिकाऱ्यांकडे हरकती नोंदवल्या असून मोजणीची फेरतपासणी करावी अशी मागणी केली आहे. २०२४ च्या लोकसभा निवडणुकीच्या वेळी, परिसरातील ग्रामस्थांचा विरोध असेल तर खाण सुरू केली जाणार नाही असा शब्द खासदार उदयनराजे भोसले यांनी दिला होता, असा दावा ग्रामस्थांनी यावेळी केला. मात्र त्यानंतरही प्रकल्पाबाबत हालचाली सुरूच असल्याने ग्रामस्थांमध्ये नाराजी पसरली आहे. निवडणुकीच्या वेळी दिलेला शब्द अद्याप पाळला गेला नसल्याचे सांगत ग्रामस्थांनी नाराजी बोलून दाखवली.

या मुद्द्यावरून गेल्या दहा दिवसांपासून काही तरुण शेतकरी वाई तहसील कार्यालयासमोर आमरण उपोषणाला बसले आहेत. उपोषण करणाऱ्यांची तब्येत ढासळत चालली असल्याचे सांगत, प्रशासनाने या प्रश्नाकडे तातडीने लक्ष द्यावे आणि तोडगा काढावा अशी मागणी बैठकीत करण्यात आली. दहा दिवस उलटूनही प्रशासनाकडून ठोस निर्णय न आल्याने ग्रामस्थांमधील अस्वस्थता वाढत चालली आहे.

खाण-क्रशर प्रकल्प सुरू झाल्यास परिसरातील शेती, पाण्याचे स्रोत, जमिनीची सुपीकता, रस्त्यांवरील वाहतूक तसेच शेतकऱ्यांच्या उत्पन्नावर विपरीत परिणाम होण्याची भीती ग्रामस्थांनी व्यक्त केली. त्यामुळे प्रशासनाने सर्व बाबींचा साकल्याने विचार करून ग्रामस्थांची बाजू समजून घ्यावी आणि प्रकल्पाबाबत योग्य निर्णय घ्यावा, अशी मागणी यावेळी करण्यात आली.

खाण-क्रशरला परवानगी देण्याची प्रक्रिया पुढे रेटली गेल्यास आंदोलन आणखी तीव्र करण्याचा इशारा ग्रामस्थांनी दिला. गरज भासल्यास थेट मुंबईतील मंत्रालयापर्यंत मोर्चा नेऊन आंदोलन करण्याचा निर्धारही या बैठकीत व्यक्त करण्यात आला.