पुण्यात आता परवानगी घेऊनच उडवा ड्रोन; नाहीतर पोलिसांकडून होणार मोठी कारवाई

गणेशोत्सव काळात परवानगी न घेता ड्रोन उडवणाऱ्यांवर पुणे पोलीस आता थेट कारवाई करणार आहेत. अशा ड्रोनची जप्ती केली जाणार असून संबंधितांवर कायदेशीर कारवाईदेखील होणार आहे. गणेश चतुर्थीच्या दिवशी शहराच्या मध्यवर्ती भागातील अनेक ठिकाणी विनापरवाना ड्रोनद्वारे चित्रिकरण होत असल्याचे पोलिसांच्या निदर्शनास आले, आणि याच पार्श्वभूमीवर पुणे पोलिसांनी 'अँटी ड्रोन पथक' स्थापन करण्याचे आदेश दिले आहेत.

गणेशोत्सवाच्या पहिल्या दिवशी शहरातील विविध भागांत गणेशमूर्तींच्या आगमन मिरवणुका आणि प्राणप्रतिष्ठा सोहळ्यांना मोठी गर्दी जमली होती. या गर्दीचा फायदा घेत अनेक व्लॉगर्स आणि फोटोग्राफर्सनी ड्रोन उडवून व्हिडिओ आणि रिल्स बनवल्याचे पोलिसांच्या लक्षात आले. विशेषतः मध्यवर्ती पुण्यातील गर्दीच्या भागांमध्ये अनेक ड्रोन ऑपरेटर सक्रिय असल्याचे आढळून आले. सोशल मीडियासाठी कंटेंट तयार करण्याच्या नादात हे ऑपरेटर कोणतीही परवानगी न घेताच गर्दीच्या ठिकाणी थेट ड्रोन उडवत होते, असे पोलिसांचे निरीक्षण आहे.

गणेशोत्सव काळात गर्दीचे व्यवस्थापन करणे, महत्त्वाच्या ठिकाणांची सुरक्षा राखणे आणि ड्रोनमुळे निर्माण होऊ शकणारा संभाव्य धोका लक्षात घेता पोलिसांनी हा मुद्दा गंभीरपणे घेतला आहे. परवानगीशिवाय ड्रोन उडवणाऱ्यांवर कारवाई करण्यासाठी अँटी ड्रोन पथक सक्रिय केले जाणार आहे. हे पथक संशयास्पद किंवा विनापरवाना ड्रोनच्या हालचालींवर लक्ष ठेवणार आहे. गर्दीच्या ठिकाणी असे पथक तैनात राहणार असून कुठेही परवानगीशिवाय ड्रोन उडताना दिसल्यास तात्काळ कारवाई केली जाणार आहे.

ड्रोन उडवण्यासाठी लागणारी आवश्यक परवानगी न घेता चित्रिकरण करणाऱ्या ऑपरेटरवर कायदेशीर कारवाई केली जाणार असून संबंधित ड्रोनही जप्त केला जाणार आहे. त्यामुळे केवळ सोशल मीडिया रिल्स, यूट्यूब व्हिडिओ किंवा गणेशोत्सवाचे चित्रिकरण करण्यासाठी नियम धाब्यावर बसवणाऱ्या व्लॉगर्सना आता पोलिसांच्या कारवाईला सामोरे जावे लागणार आहे. परवानगी न घेता ड्रोन उडवणे हे केवळ नियमांचे उल्लंघन नसून त्यामुळे गर्दीच्या ठिकाणी सुरक्षेला धोका निर्माण होऊ शकतो, असेही पोलिसांनी स्पष्ट केले आहे.

गणेशोत्सवातील गर्दीच्या ठिकाणी ड्रोन उडवल्यामुळे सुरक्षेचा प्रश्न निर्माण होऊ शकतो, असे पोलिसांचे म्हणणे आहे. त्यामुळे ड्रोन ऑपरेटर, व्लॉगर्स, फोटोग्राफर्स आणि इतर सर्वांनी नियमांचे पालन करावे, असे आवाहन पोलिसांनी केले आहे. उत्सवादरम्यान कोणालाही विनापरवाना ड्रोन उडवताना आढळल्यास त्यावर तात्काळ कारवाई केली जाईल, असेही पोलिसांनी बजावले आहे.