नागपुरात हॉटेल-लॉजमध्ये अविवाहित जोडप्यांना रूम बुकिंगसाठी पोलिसांचे नवे नियम

नागपूर शहरात 18 वर्षे किंवा त्याहून अधिक वय असलेल्या अविवाहित जोडप्यांना आता हॉटेल, लॉज, गेस्ट हाऊस आणि होमस्टेमध्ये रूम बुक करता येणार आहे. नागपूर पोलिसांनी याबाबत नवीन निर्देश जारी केले आहेत.

या आदेशानुसार, दोन्ही व्यक्ती सज्ञान असतील आणि स्वतःच्या संमतीने रूम बुक करत असतील, तर केवळ अविवाहित असल्याच्या कारणावरून त्यांना हॉटेलमध्ये राहण्यापासून रोखता येणार नाही. हा आदेश 11 सप्टेंबरच्या रात्री 12:01 वाजल्यापासून लागू झाला असून सध्या 9 नोव्हेंबरपर्यंत प्रभावी राहणार आहे. पोलिसांच्या म्हणण्यानुसार, हॉटेल आणि लॉजमध्ये होणाऱ्या बेकायदेशीर कारवायांवर प्रभावीपणे नियंत्रण ठेवणे हा या मार्गदर्शक तत्त्वांचा उद्देश आहे.

नव्या नियमांनुसार हॉटेलमध्ये येणाऱ्या प्रत्येक पाहुण्याची ओळख पडताळणे बंधनकारक असणार आहे. ओळखीसाठी मूळ आधार कार्ड, पासपोर्ट किंवा ड्रायव्हिंग लायसन्स स्वीकारले जाईल. सर्वसाधारणपणे पॅन कार्ड वैध ओळखपत्र म्हणून स्वीकारले जाणार नाही.

हॉटेल संचालकांना प्रत्येक पाहुण्याचे नाव, पत्ता, मोबाईल नंबर, ओळखपत्राचा प्रकार आणि क्रमांक यासह अचूक चेक-इन आणि चेक-आउट वेळ नोंदवावी लागणार आहे. याशिवाय हॉटेल कर्मचाऱ्यांचे ओळखपत्र, पत्त्याचा पुरावा आणि अद्ययावत मोबाईल नंबरही रेकॉर्डमध्ये ठेवावा लागणार आहे.

हॉटेल, लॉज, गेस्ट हाऊस आणि होमस्टेमध्ये प्रवेशद्वार तसेच सार्वजनिक ठिकाणांसह ठरावीक जागी 24 तास सीसीटीव्ही कॅमेरे सुरू ठेवावे लागतील. या कॅमेऱ्यांचे रेकॉर्डिंग किमान एक वर्षभर सुरक्षित ठेवावे लागेल आणि पोलिसांनी मागितल्यास फुटेज उपलब्ध करून द्यावे लागेल. बंद पडलेले सीसीटीव्ही कॅमेरे तात्काळ दुरुस्त करून घेणे ही देखील संचालकांची जबाबदारी असेल. तसेच हॉटेल परिसरात मानवी तस्करी आणि इतर बेकायदेशीर कारवायांविरोधात 'झिरो टॉलरन्स'चा फलक ठळकपणे लावावा लागेल.

नव्या निर्देशांनुसार बनावट ओळखपत्रे, संशयास्पद बुकिंग किंवा कोणत्याही बेकायदेशीर कारवाईची माहिती हॉटेल संचालकांना पोलिसांना द्यावी लागेल. यामध्ये भांडण, संशयास्पद मृत्यू, आत्महत्येचा प्रयत्न आणि एखादी व्यक्ती बेपत्ता होणे यासारख्या घटनांचा समावेश आहे.

अल्पवयीन मुलांना फक्त आई-वडिलांसोबत आणि ओळख पडताळल्यानंतरच हॉटेलमध्ये प्रवेश दिला जाईल. या नियमांमुळे 'ऑपरेशन शक्ती' अंतर्गत मानवी तस्करी, वेश्याव्यवसाय आणि फसवणुकीसारख्या कारवायांना आळा घालण्यास मदत होईल, असे नागपूर पोलिसांचे म्हणणे आहे.

सूत्रांनुसार, पोलिसांनी OYO ब्रँडचा वापर करणाऱ्या 20 पेक्षा जास्त हॉटेलांवरील अनधिकृत साइनबोर्ड हटवले असून संबंधित प्रकरणांत कायदेशीर कारवाई सुरू आहे.

या संपूर्ण प्रकरणाची माहिती महसूल मंत्री चंद्रशेखर बावनकुळे यांनाही मिळाली होती. नागरिकांनी आपल्या परिसरातील हॉटेलांमध्ये सुरू असलेल्या कथित बेकायदेशीर कारवायांबाबत तक्रार केली होती, असे त्यांनी सांगितले.

त्यानंतर पोलीस आयुक्त विश्वास नांगरे पाटील यांच्याशी चर्चा करण्यात आली आणि हे प्रकरण मुख्यमंत्री देवेंद्र फडणवीस यांच्या निदर्शनास आणून देण्यात आले. नियमांचे उल्लंघन करणाऱ्या हॉटेल संचालकांवर भारतीय न्याय संहिता, 2023 च्या कलम 223 अंतर्गत कारवाई होऊ शकते.