कोल्हापूर अपघात: अंबाबाईच्या दर्शनानंतर घरी परतताना काळाचा घाला; प्रसिद्ध मेस्त्रीचा अपघाती मृत्यू

कोल्हापुरातील प्रसिद्ध ट्रक बॉडी मेस्त्री बाबुराव आप्पाजी लोहार (वय ७३) यांचा सोमवारी सकाळी अपघातात मृत्यू झाला. पश्चिम महाराष्ट्रात ट्रकची बॉडी तयार करणे आणि दुरुस्तीच्या कामासाठी ते ओळखले जायचे. कोल्हापुरातील श्री अंबाबाई मंदिरात दर्शन घेऊन चारचाकी गाडीतून घरी परतत असताना रंकाळा भागातील खराडे कॉलेजसमोर हा अपघात झाला. या प्रकरणाची नोंद जुना राजवाडा पोलीस स्टेशनमध्ये करण्यात आली आहे.

लोहार यांचे राधानगरी रोडवर जिवबानाना पार्क भागात ट्रक बॉडी तयार करण्याचे गॅरेज होते. या गॅरेजच्या मागच्या बाजूला असलेल्या बंगल्यात ते आपल्या कुटुंबासह राहत होते. ट्रकची बॉडी बनवण्याच्या आणि दुरुस्तीच्या कामातल्या त्यांच्या कौशल्यामुळे केवळ कोल्हापुरातच नव्हे तर संपूर्ण पश्चिम महाराष्ट्रात त्यांना चांगली ओळख होती.

सोमवारी सकाळी नेहमीप्रमाणे लोहार चारचाकी गाडीतून श्री अंबाबाई मंदिरात दर्शनासाठी गेले होते. अंबाबाईचे दर्शन घेतल्यानंतर त्यांनी बाबुजमाल दर्ग्यालाही भेट दिली. दर्शन आणि दर्गा भेट झाल्यावर रंकाळा टॉवरमार्गे ते घरी परतत होते. सकाळी साधारण सहा वाजण्याच्या सुमारास खराडे कॉलेजसमोर त्यांच्या चारचाकी गाडीला अज्ञात वाहनाने धडक दिल्याची प्राथमिक माहिती आहे.

अपघाताच्या वेळी मोठा आवाज झाल्याने त्यावेळी रंकाळा परिसरात फिरायला आलेले लोक तातडीने घटनास्थळी धावले. या अपघातात लोहार यांच्या डोक्याला गंभीर दुखापत झाली होती. घटनास्थळी जमलेल्या लोकांनी लगेच १०८ क्रमांकावर संपर्क करून त्यांना उपचारासाठी सीपीआर रुग्णालयात दाखल केले.

सीपीआर रुग्णालयात दाखल केल्यावर तिथे असलेल्या काही तरुणांनी लोहार यांना ओळखले. पण डॉक्टरांनी तपासणी केल्यावर उपचार सुरू करण्याआधीच त्यांचा मृत्यू झाल्याचे सांगितले. त्यांच्या या अचानक निधनामुळे ट्रक बॉडी बनवण्याच्या क्षेत्रातील त्यांच्या ओळखीच्या लोकांमध्ये आणि परिसरात हळहळ व्यक्त होत आहे.

या अपघातात लोहार यांच्या चारचाकी गाडीचे मोठे नुकसान झाले आहे. हा अपघात नेमका कसा झाला, धडक देणारे वाहन कोणते होते आणि त्याच्या चालकाची ओळख पटते का, याचा तपास पोलिसांकडून सुरू आहे. या घटनेची नोंद जुना राजवाडा पोलीस स्टेशनमध्ये करण्यात आली आहे.