कर्जमुक्ती योजनेची नवी यादी जाहीर; 16.96 लाख शेतकऱ्यांचे कर्ज माफ
पुण्यश्लोक अहिल्यादेवी होळकर शेतकरी कर्जमुक्ती योजना 2026 अंतर्गत नवी लाभार्थी यादी जाहीर, उर्वरित याद्याही लवकरच येणार.
राज्य सरकारच्या 'पुण्यश्लोक अहिल्यादेवी होळकर शेतकरी कर्जमुक्ती योजना 2026' अंतर्गत 16 लाख 96 हजार पात्र शेतकऱ्यांची नवी यादी जाहीर करण्यात आली आहे. उरलेल्या पात्र शेतकऱ्यांच्या याद्याही लवकरच जाहीर होणार असल्याचं सहकार मंत्री बाबासाहेब पाटील यांनी सांगितलं.
या योजनेतून राज्यातील जवळपास 56 लाख पात्र शेतकऱ्यांना कर्जमुक्तीचा फायदा मिळणार आहे. ज्यांना हा फायदा घ्यायचा आहे, त्या शेतकऱ्यांनी ॲग्रीस्टॅकवर नोंदणी करून आधार प्रमाणीकरणाची प्रक्रिया लवकरात लवकर पूर्ण करावी, असं आवाहन सहकार मंत्री बाबासाहेब पाटील यांनी केलं आहे.
पात्र लाभार्थ्यांची यादी बँकांनी महाआयटीनं तयार केलेल्या पोर्टलवर टाकली असून तिची पडताळणी झालेली आहे. आधार प्रमाणीकरणासाठी पात्र शेतकऱ्यांच्या नोंदणीकृत मोबाईल नंबरवर एसएमएसमधून सूचना पाठवली जाणार आहे. याशिवाय ग्रामपंचायत कार्यालयं, विविध कार्यकारी सेवा सहकारी संस्था आणि संबंधित बँकांच्या शाखांमध्येही लाभार्थ्यांच्या याद्या लावल्या जाणार आहेत.
प्रत्येक पात्र लाभार्थ्याला एक स्वतंत्र ओळख क्रमांक दिला जाणार आहे. आधार क्रमांक किंवा हा ओळख क्रमांक वापरून आधार प्रमाणीकरण करणं गरजेचं राहील. राज्यभरातल्या जवळपास 32 हजार 'आपले सरकार सेवा केंद्रां'मधून ही सुविधा शेतकऱ्यांना उपलब्ध करून देण्यात आली आहे.
ॲग्रीस्टॅकवरची नोंदणी आणि आधार प्रमाणीकरण झाल्यावर पात्र लाभार्थ्यांच्या कर्ज खात्यात डीबीटी पद्धतीनं कर्जमुक्तीची रक्कम जमा केली जाणार आहे. ही योजना फक्त कर्जमुक्तीपुरती मर्यादित नसून शेतकऱ्यांना आर्थिकदृष्ट्या सक्षम करून नव्या उमेदीनं शेती करण्यासाठी बळ देणारी योजना असल्याचं सहकार मंत्री बाबासाहेब पाटील म्हणाले.
महायुती सरकारनं शेतकऱ्यांच्या हिताला सर्वात जास्त महत्त्व देत 'पुण्यश्लोक अहिल्यादेवी होळकर शेतकरी कर्जमुक्ती योजना 2026' जाहीर केली आहे. शेतकऱ्यांवरचा कर्जाचा बोजा कमी करून त्यांना नव्या उमेदीनं शेती करण्यासाठी सक्षम करणं, आर्थिक स्थैर्य देणं आणि ग्रामीण अर्थव्यवस्थेला नवी उभारी देणं, हा या योजनेमागचा मुख्य हेतू आहे.
हजारो शेतकऱ्यांना दिलासा देणाऱ्या या योजनेतून कुठलाही पात्र लाभार्थी अटी-शर्तींमुळे वंचित राहू नये, यासाठी लगेच योजनेची व्याप्ती वाढवण्यात आली. मुख्यमंत्री देवेंद्र फडणवीस यांनी योजनेत आणखी काही महत्त्वाच्या सुधारणा जाहीर करून तिची व्याप्ती आणखी वाढवली आहे. त्यामुळे आता ही योजना फक्त कर्जमाफीपुरती मर्यादित न राहता, जास्तीत जास्त पात्र शेतकऱ्यांपर्यंत पोहोचणारी आणि न्याय्य योजना ठरली आहे.
या सुधारणांमधला सर्वात महत्त्वाचा निर्णय म्हणजे महात्मा ज्योतिराव फुले शेतकरी कर्जमुक्ती योजनेत आधीच लाभ घेतलेल्या शेतकऱ्यांसाठी असलेली 50 हजार रुपयांची मर्यादा पूर्णपणे रद्द करण्यात आली आहे. आधी अशा शेतकऱ्यांना नव्या योजनेत मर्यादित लाभ मिळत होता. आता ही अट काढल्यामुळे अशा सगळ्या पात्र शेतकऱ्यांनाही दोन लाख रुपयांपर्यंतच्या कर्जमुक्तीचा पूर्ण फायदा मिळणार आहे.
