जमीन वादावरून 81 वर्षीय असगरअली वोरा थेट पंतप्रधान मोदींना भेटले, CBI चौकशीची मागणी

मीरा-भाईंदरमधील जमीन वादात वर्षानुवर्षे न्यायाच्या प्रतीक्षेत असलेल्या 81 वर्षीय असगरअली वोरा यांनी अखेर थेट पंतप्रधान नरेंद्र मोदी यांचीच भेट घेतली. या भेटीत त्यांनी मीरा-भाईंदरमधील कथित जमीन गैरव्यवहाराची केंद्रीय अन्वेषण विभाग म्हणजेच CBI मार्फत चौकशी करावी, अशी मागणी पंतप्रधानांकडे केली. या भेटीची दखल स्थानिक प्रशासनानेही घेतली आहे.

वोरा यांच्या सांगण्यानुसार, त्यांनी 1989 साली भायंदर पूर्वेकडील नवघर परिसरात सुमारे 2,810 चौरस मीटर एवढी जमीन एका रजिस्टर्ड कराराद्वारे खरेदी केली होती. काही वर्षांनी या जमिनीवर अतिक्रमण झाल्याचा आरोप त्यांनी केला असून, यात स्वयं बिल्डर्स आणि भाजपचे माजी आमदार नरेंद्र मेहता यांच्याशी संबंधित असलेल्या सेवन इलेवन कंस्ट्रक्शन या कंपनीचे नाव त्यांनी घेतले आहे.

वोरा यांच्या दाव्याप्रमाणे 2011 च्या सुमारास त्यांच्या जमिनीवर अतिक्रमण करण्यात आले आणि जमीन व्यवहाराशी संबंधित बनावट कागदपत्रेही तयार करण्यात आली. या कागदपत्रांबद्दल मूळ मालकाला काहीही कल्पना दिली गेली नव्हती, असे त्यांचे म्हणणे आहे. जमिनीचे दोन भाग करून एका भागावर स्वयं बिल्डर्सचा तर दुसऱ्या भागावर सेवन इलेवन कंस्ट्रक्शनचा ताबा असल्याचे दाखवण्यात आल्याचा आरोपही वोरा यांनी केला आहे. या संपूर्ण प्रकरणाची सखोल चौकशी व्हावी, अशी त्यांची मागणी आहे.

या जमीन वादाबाबत 2015 साली FIR दाखल करण्यात आली होती आणि सध्या हे प्रकरण न्यायालयात प्रलंबित आहे. महसूल विभाग, महानगरपालिका आणि पोलिसांकडे अनेक वर्षे तक्रारी करूनही अपेक्षित न्याय मिळाला नाही, असे वोरा सांगतात. प्रशासकीय पातळीवर सतत पाठपुरावा करूनही प्रश्न न सुटल्याने अखेर त्यांनी थेट पंतप्रधान नरेंद्र मोदी यांची भेट घेण्याचा निर्णय घेतला.

वोरा यांच्या माहितीनुसार 8 सप्टेंबर रोजी पंतप्रधान मोदींसोबत त्यांची भेट झाली आणि आपली बाजू मांडल्यानंतर सकारात्मक प्रतिसाद मिळाल्याचा दावा त्यांनी केला. परिवहन मंत्री प्रताप सरनाईक यांनीही या भेटीची छायाचित्रे आणि प्रेस नोट प्रसिद्ध केली आहे.

पंतप्रधानांशी झालेल्या या भेटीनंतर मीरा-भाईंदर महानगरपालिका प्रशासनानेही या जमीन वादाची दखल घेतली असून, संबंधित प्रकरणावर सुनावणी निश्चित करण्यात आली आहे. ही सुनावणी 16 सप्टेंबर रोजी होणार आहे. महापालिका प्रशासनाने सेवन इलेवन कंस्ट्रक्शन आणि स्वयं बिल्डर्स या दोन्ही कंपन्यांच्या प्रतिनिधींना सुनावणीसाठी हजर राहण्याचे निर्देश दिले आहेत.

या प्रकरणात संबंधित बांधकाम कंपन्या तसेच इतर पक्षांची अधिकृत भूमिका अद्याप समोर आलेली नाही. त्यामुळे असगरअली वोरा यांनी केलेले आरोप व दावे यांची पडताळणी अधिकृत चौकशी आणि सुनावणी प्रक्रियेतच होणे अपेक्षित आहे. 16 सप्टेंबरच्या सुनावणीत काय समोर येते आणि CBI चौकशीच्या मागणीवर पुढे काय निर्णय होतो, याकडे सगळ्यांचे लक्ष लागले आहे.