शिक्षक हे समाजाच्या जडणघडणीचे शिल्पकार, भेंडारकर यांचे गौरवोद्गार

गोंदिया जिल्हा परिषदेच्या शिक्षण विभागाने (प्राथमिक) आयोजित केलेला जिल्हा शिक्षक पुरस्कार व गुणवंत विद्यार्थी सत्कार समारंभ 9 सप्टेंबर रोजी स्व. वसंतराव नाईक सभागृहात उत्साहात पार पडला. या कार्यक्रमाच्या अध्यक्षस्थानी जिल्हा परिषद अध्यक्ष लायकराम भेंडारकर होते.

शिक्षण क्षेत्रात उल्लेखनीय काम करणाऱ्या आणि विद्यार्थ्यांच्या सर्वांगीण विकासासाठी योगदान देणाऱ्या शिक्षकांना यावेळी सन्मानचिन्ह आणि प्रमाणपत्र देऊन गौरवण्यात आले. त्याचबरोबर गोंदिया जिल्ह्यात शैक्षणिक क्षेत्रात चांगली कामगिरी करणाऱ्या गुणवंत विद्यार्थ्यांचाही सन्मानचिन्ह व प्रमाणपत्र देऊन सत्कार करण्यात आला. या सत्कारामुळे शिक्षक आणि विद्यार्थी दोघांमध्येही उत्साहाचे वातावरण तयार झाले.

यावेळी बोलताना लायकराम भेंडारकर म्हणाले की, शिक्षक हे समाजाच्या जडणघडणीतील महत्त्वाचे शिल्पकार आहेत. विद्यार्थ्यांना योग्य दिशा, संस्कार आणि प्रेरणा देण्याबरोबरच त्यांच्या सर्वांगीण विकासासाठी शिक्षकांनी सतत प्रयत्न करावेत, असे त्यांनी सांगितले. बदलत्या काळात ज्ञान आणि तंत्रज्ञानाचा प्रभावी वापर करून शिक्षणाचा दर्जा उंचावण्याची गरज असल्याचेही त्यांनी नमूद केले. विद्यार्थ्यांमध्ये गुणवत्ता, सर्जनशीलता आणि आत्मविश्वास वाढवण्यासाठी शिक्षकांनी नवनवीन उपक्रम राबवावेत, असे आवाहनही त्यांनी केले.

प्रतिकूल परिस्थितीतही जिद्द, मेहनत आणि सातत्याच्या जोरावर यश मिळवणाऱ्या गुणवंत विद्यार्थ्यांचे या समारंभात कौतुक करण्यात आले. विद्यार्थ्यांच्या यशामागे शिक्षकांचे मार्गदर्शन आणि पालकांचे सहकार्य महत्त्वाचे असते, आणि गुणवंत विद्यार्थ्यांचा असा सन्मान त्यांना पुढे जाण्यासाठी प्रेरणा देतो, असे भेंडारकर यांनी सांगितले. शिक्षकांच्या कामाला प्रोत्साहन देण्यासाठी आणि विद्यार्थ्यांच्या गुणवत्तेला चालना देण्यासाठी असे कार्यक्रम सातत्याने व्हायला हवेत, असेही त्यांनी अधोरेखित केले.

या कार्यक्रमाला जिल्हा परिषदेच्या मुख्य कार्यकारी अधिकारी झेनिथ चंद्रा दोन्तुला, जिल्हा परिषद उपाध्यक्ष सुरेश हर्षे, अर्थ व बांधकाम सभापती डॉ. लक्ष्मण भगत, समाज कल्याण सभापती रजनी कुंभरे, महिला व बालकल्याण सभापती पोर्णिमा ढेंगे आणि पशु व कृषी सभापती दिपा चंद्रिकापुरे यांची प्रमुख उपस्थिती होती.

यासोबतच जिल्हा परिषद सदस्य विमल कटरे, तुमेश्वरी बघेले, लक्ष्मी तरोणे, चतुर्भुज बिसेन, हनवंत वट्टी, अश्विनी पटले, जयश्री देशमुख, अनंदा वाढीवा, वैशाली पंधरे, रीतेष मलघाम, छबुताई उके, प्रिती कतलाम, उषाताई शहारे, वंदना काळे तसेच पंचायत समिती सदस्य हुपराज जमईवार उपस्थित होते. शिक्षणाधिकारी (प्राथमिक) पवन खंडारे, शिक्षणाधिकारी (माध्यमिक) सुधीर महामुनी, सर्व गट शिक्षणाधिकारी यांच्यासह मोठ्या संख्येने शिक्षक, विद्यार्थी, पालक आणि शिक्षण विभागातील अधिकारी-कर्मचारी या कार्यक्रमाला उपस्थित होते.

शिक्षकांच्या कामाचा गौरव आणि गुणवंत विद्यार्थ्यांच्या यशाचा सन्मान करणारा हा सोहळा शैक्षणिक क्षेत्रासाठी प्रेरणादायी ठरला. उपस्थितांनी या कार्यक्रमाला उत्स्फूर्त प्रतिसाद दिला. शिक्षकांच्या योगदानाबद्दल कृतज्ञता व्यक्त करणे आणि गुणवंत विद्यार्थ्यांच्या यशाची दखल घेणे, हा या उपक्रमामागचा उद्देश होता. यातून शिक्षण क्षेत्रात सकारात्मक स्पर्धा आणि उत्कृष्ट कामाची प्रेरणा निर्माण होण्यास मदत होणार असल्याचे सांगण्यात आले.