वसई विरार बस संप: गणेशोत्सवातच बस सेवा ठप्प! कर्मचाऱ्यांचे काम बंद आंदोलन; हजारो प्रवाशांचे हाल

गणेशोत्सव सुरू असतानाच वसई-विरार महापालिकेची परिवहन सेवा पुन्हा एकदा पूर्णपणे कोलमडली. पूर्ण महिना काम करूनही अपुरे वेतन मिळाल्याचा आरोप करत परिवहन सेवेतील चालक-वाहकांसह इतर कर्मचाऱ्यांनी शनिवारपासून काम बंद आंदोलन सुरू केले. सकाळपासून एकही बस रस्त्यावर धावली नाही, त्यामुळे गणेशोत्सवाच्या खरेदीसाठी बाहेर पडलेले नागरिक, शाळेत जाणारी मुले, ज्येष्ठ नागरिक आणि नोकरीसाठी घराबाहेर पडणारे हजारो प्रवासी अडचणीत सापडले.

महापालिकेच्या परिवहन विभागाकडे सध्या १२० बसेस असून त्यापैकी ४० बसेस या ई-बसेस आहेत. महापालिकेच्या मालकीच्या या ताफ्यातून शहरातील ३८ मार्गांवर दररोज सुमारे २२०० फेऱ्या चालवल्या जातात आणि रोज ६० ते ६५ हजार प्रवासी या सेवेचा वापर करतात. इतक्या मोठ्या संख्येने प्रवासी अवलंबून असलेली सेवा अचानक बंद पडल्याने शहरातील सार्वजनिक वाहतुकीवर मोठा परिणाम झाला. यापूर्वी ११ ऑगस्ट रोजी देखील चालक-वाहकांनी विविध मागण्यांसाठी संप पुकारला होता. त्यावेळी वेतनवाढीसह इतर मागण्यांवर तोडगा काढण्याचे आश्वासन दिल्यानंतर हे आंदोलन मागे घेण्यात आले होते.

मात्र गणेशोत्सव सुरू होताच पुन्हा एकदा काम बंद आंदोलन सुरू झाल्याने परिवहन सेवेतील अडचणी अजूनही सुटलेल्या नाहीत, हे स्पष्ट झाले. ११ ऑगस्टला दिलेले आश्वासन प्रत्यक्षात न आल्यानेच कर्मचाऱ्यांनी पुन्हा हे पाऊल उचलले असल्याचे यावरून दिसते. बससेवा बंद असल्याने प्रवाशांना रिक्षा आणि खासगी वाहनांचा आधार घ्यावा लागला. गणेशोत्सवाच्या काळात बाजारपेठांमध्ये खरेदीसाठी गर्दी वाढलेली असतानाच बससेवा ठप्प झाल्याने नागरिकांची गैरसोय आणखी वाढली.

गणेशोत्सवामुळे खर्च वाढलेला असताना ठेकेदाराने पूर्ण महिन्याचे वेतन देण्याऐवजी निम्मेच वेतन दिल्याचा आरोप कर्मचाऱ्यांनी केला. आम्ही पूर्ण महिना काम करतो, सणासुदीच्या काळात आमच्याही कुटुंबाला खर्च असतो, असे असताना अपुरे वेतन मिळाले तर संसार कसा चालवायचा, असा संतप्त सवाल कर्मचाऱ्यांनी उपस्थित केला. वेतन ठेकेदाराकडून दिले जाते आणि तेच वेळेवर न मिळाल्याने ही परिस्थिती ओढवल्याचे कर्मचाऱ्यांचे म्हणणे आहे.

परिवहन व्यवस्थापक धैर्यशील जाधव यांनी सांगितले की, बससेवा पूर्ववत करण्यासाठी परिवहन विभागाकडून प्रयत्न सुरू आहेत. संबंधित ठेकेदाराला कर्मचाऱ्यांच्या मागण्यांवर योग्य तोडगा काढून सेवा तातडीने सुरू करण्याच्या सूचना देण्यात आल्या आहेत, असे त्यांनी स्पष्ट केले.

आगार व्यवस्थापक किरण शेरेकर यांनी सांगितले की, महापालिकेकडून विविध योजनांची देयके मिळालेली नसल्याने निधीची अडचण निर्माण होत आहे. तरीही कर्मचाऱ्यांना वेतन देण्यात आले असून, कर्मचाऱ्यांशी चर्चा करून मार्ग काढण्याचा प्रयत्न सुरू असल्याचे त्यांनी नमूद केले. महापालिकेकडून येणे असलेल्या देयकांअभावी ठेकेदारावर आर्थिक ताण येत असल्याचेही त्यांनी सूचित केले.