गणेशोत्सवात योजनांची माहिती देण्यासाठी राज्यभर 'लोकसंवाद-2026' उपक्रम, 16 ते 24 सप्टेंबर दरम्यान
माहिती व जनसंपर्क विभागाकडून गणेश मंडळांच्या मंडपात जाऊन नागरिकांना शासकीय योजनांची थेट माहिती दिली जाणार आहे.
गणेशोत्सवाच्या निमित्ताने मोठ्या संख्येने नागरिक एकत्र येतात, याचाच फायदा घेत राज्य सरकारने शासकीय योजना लोकांपर्यंत पोहोचवण्याचे ठरवले आहे. माहिती व जनसंपर्क विभागाने यासाठी 'लोकसंवाद-2026' नावाचा विशेष उपक्रम आखला असून तो 16 ते 24 सप्टेंबर 2026 या काळात राज्यभर राबवला जाणार आहे. गणेशोत्सवाला आधीच 'राज्य महोत्सव' म्हणून घोषित करण्यात आलेले आहे.
या उपक्रमांतर्गत सरकारी अधिकारी थेट गणेश मंडळांच्या मंडपात जाऊन नागरिकांशी संवाद साधतील आणि विविध योजनांची माहिती देतील. फक्त माहिती देणे एवढाच उद्देश नसून, कोणत्या योजनेचा लाभ कोणाला मिळू शकतो आणि तो कसा घ्यायचा, याबाबत पात्र लाभार्थ्यांना मार्गदर्शनही केले जाणार आहे. यासाठी प्रत्येक जिल्ह्यातील मोठ्या आणि मानाच्या गणेश मंडळांची निवड करण्यात आली आहे.
या कार्यक्रमांमध्ये कृषी, महिला व बालविकास, शिक्षण, सामाजिक न्याय, सहकार, पणन, सार्वजनिक आरोग्य, कौशल्य विकास, तसेच क्रीडा व युवक कल्याण अशा जवळपास सर्वच खात्यांचा सहभाग असेल. शेतकऱ्यांसाठी शेतकरी सन्मान निधी, पीक विमा, शेततळे आणि कृषी औजारांवरील अनुदान यांची माहिती दिली जाईल. महिलांसाठी बचत गट योजना, तर विद्यार्थी आणि तरुणांसाठी उच्च शिक्षण, कौशल्य विकास, शिष्यवृत्ती आणि इतर सवलतींबाबत सांगितले जाणार आहे.
आरोग्य क्षेत्रात महात्मा ज्योतिराव फुले जन आरोग्य योजना, आयुष्मान भारत, हिंदुहृदयसम्राट बाळासाहेब ठाकरे आपला दवाखाना आणि मुख्यमंत्री वैद्यकीय सहायता कक्ष यांच्याबाबत माहिती दिली जाईल, ज्यात मोफत तपासणी आणि औषधोपचारांचाही समावेश आहे. कौशल्य विकासाच्या बाजूने कौशल्य विकास प्रशिक्षण, मुख्यमंत्री रोजगार प्रशिक्षण कार्यक्रम, स्वयंरोजगार कर्ज योजना, तसेच बार्टी, सारथी आणि महाज्योती या संस्थांच्या योजनांबाबत तरुणांना मार्गदर्शन केले जाणार आहे. याखेरीज महाडीबीटी, सायबर सुरक्षा, माहितीचा अधिकार आणि आपले सरकार या विषयांवरही जनजागृती केली जाईल.
हा उपक्रम नीट राबवण्यासाठी कृषी, आरोग्य, महिला व बालविकास, शिक्षण, क्रीडा व युवक कल्याण, सहकार, पणन, कौशल्य विकास, सामाजिक न्याय आणि पोलीस या सर्व विभागांमध्ये समन्वय ठेवला जाणार आहे. स्थानिक तसेच जिल्हास्तरीय वरिष्ठ अधिकारी आणि तज्ज्ञ स्वतः मंडपात उपस्थित राहून नागरिकांशी बोलणार आहेत, जेणेकरून लोकांना अधिकृत आणि थेट माहिती मिळेल.
जिथे शक्य असेल तिथे हे कार्यक्रम फेसबुक किंवा युट्यूबवर लाइव्ह दाखवले जाणार असून, सोशल मीडियावर #गणेशोत्सव2026 आणि #लोकसंवाद2026 हे हॅशटॅग वापरले जातील, जेणेकरून प्रत्यक्ष मंडपात जाऊ न शकणाऱ्या नागरिकांपर्यंतही ही माहिती पोहोचेल. ज्या गणेश मंडळांना या उपक्रमात सहभागी व्हायचे आहे, त्यांनी आपापल्या जिल्ह्याच्या जिल्हा माहिती कार्यालयाशी संपर्क साधावा, तर मुंबई शहर आणि उपनगरातील मंडळांनी मंत्रालयातील माहिती व जनसंपर्क विभागाशी संपर्क साधावा, असे आवाहन विभागाने केले आहे.
