गणेशोत्सवात मुंबई मेट्रो रात्री १२.३० पर्यंत, १० ते १५ जास्त फेऱ्या

गणेशोत्सवाच्या काळात रात्री उशिरापर्यंत विविध गणेश मंडळांना भेट देऊन बाप्पाचे दर्शन घेणाऱ्या मुंबईकरांसाठी महा मुंबई मेट्रोने खास सुविधा जाहीर केली आहे. १४ सप्टेंबर ते २५ सप्टेंबर २०२६ या काळात मार्गिका २अ, ७, ९ आणि २ब वर मेट्रो सेवा रात्री १२.३० वाजेपर्यंत सुरू राहणार आहे.

सध्या या स्थानकांवरून शेवटची मेट्रो रात्री ११ वाजता सुटते. पण गणेशोत्सवाच्या काळात ही वेळ दीड तासाने वाढवण्यात आली आहे. अंधेरी पश्चिम आणि दहिसर पूर्व स्थानकांवरून मार्गिका २अ ची, गुंदवली आणि काशीगाव स्थानकांवरून मार्गिका ७ व ९ ची, तर महाराष्ट्र नगर-मंडाळे आणि चेंबूर स्थानकांवरून मार्गिका २ब ची शेवटची मेट्रो रात्री १२.३० वाजता सुटेल.

प्रवाशांची होणारी संभाव्य गर्दी लक्षात घेता नियमित फेऱ्यांशिवाय १० ते १५ जास्त फेऱ्यांचंही नियोजन करण्यात आलं आहे. सोमवार ते शुक्रवार या दिवसांत मार्गिका २अ वर एकूण २९९ फेऱ्या धावणार असून त्यात १० जास्त फेऱ्यांचा समावेश आहे. मार्गिका ७ आणि ९ वर एकूण २९० फेऱ्या असतील, त्यातल्या १४ जास्त असतील. मार्गिका २ब वर एकूण १८० फेऱ्यांचं नियोजन असून त्यातल्या १५ जास्त फेऱ्या असतील.

शनिवारी मार्गिका २अ वर १० जास्त फेऱ्यांसह एकूण २४१ फेऱ्या, मार्गिका ७ आणि ९ वर १४ जास्त फेऱ्यांसह एकूण २३७ फेऱ्या, तर मार्गिका २ब वर १५ जास्त फेऱ्यांसह एकूण १८० फेऱ्या धावतील.

रविवारी मार्गिका २अ वर एकूण २२३ फेऱ्या, मार्गिका ७ आणि ९ वर एकूण २१९ फेऱ्या, तर मार्गिका २ब वर एकूण १८० फेऱ्या असतील. यात अनुक्रमे १०, १४ आणि १५ जास्त फेऱ्यांचा समावेश असणार आहे.

मुंबईत गणेशोत्सवाच्या काळात रात्री उशिरापर्यंत प्रसिद्ध गणेश मंडळांच्या दर्शनासाठी मोठ्या संख्येने भाविक घराबाहेर पडतात. यामुळे रस्त्यांवर वाहतूक कोंडी होतेच, शिवाय सार्वजनिक वाहतूक व्यवस्थेवरही मोठा ताण येतो. वाढीव मेट्रो सेवेमुळे भाविकांना रात्री उशिरापर्यंत गणेशोत्सवाचा आनंद घेऊन नंतर सार्वजनिक वाहतुकीने घरी सहज परतता येईल.

महा मुंबई मेट्रोच्या या खास व्यवस्थेमुळे विविध गणेश मंडळे आणि उत्सवस्थळांपर्यंत सुरक्षित आणि सुरळीत प्रवासाची सोय होणार आहे. सार्वजनिक वाहतुकीचा जास्तीत जास्त वापर करून यंदाचा गणेशोत्सव वाहतूक कोंडीशिवाय आणि पर्यावरणपूरक पद्धतीने साजरा करण्याचं आवाहनही करण्यात आलं आहे.