नागपुरात गणेश विसर्जनासाठी पर्यावरणपूरक तयारी, 419 कृत्रिम कुंड सज्ज, QR कोडवरून मिळणार लोकेशन

नागपुरात गणेशोत्सवाच्या काळात पर्यावरण जपण्यासाठी महानगरपालिकेने यंदा मोठी तयारी केली आहे. गणेश मूर्तींचे विसर्जन पर्यावरणाला धक्का न लावता व्हावे, यासाठी शहरात तब्बल 419 कृत्रिम विसर्जन कुंड उभारण्यात आले आहेत.

याशिवाय गणेशोत्सवादरम्यान जमा होणाऱ्या निर्माल्याची शास्त्रोक्त आणि पर्यावरणपूरक पद्धतीने विल्हेवाट लावण्यासाठी 18 निर्माल्य रथ रस्त्यावर उतरवण्यात आले आहेत. फुटाळा तलाव परिसरात उभारलेल्या कृत्रिम विसर्जन कुंडांचे उद्घाटन महापौर नीता ठाकरे यांच्या हस्ते झाले.

मनपा मुख्यालय आवारात झालेल्या कार्यक्रमात महापौरांनी हिरवा झेंडा दाखवून निर्माल्य रथांना रवाना केले. यावेळी उपमहापौर लीला हाथीबेड, सत्तापक्ष नेते बाल्या बोरकर, शिवानी दाणी, अभिजीत झा, अतिरिक्त आयुक्त अंकित, उपायुक्त राजेश भगत आणि मुख्य स्वच्छता अधिकारी डॉ. गजेंद्र महल्ले उपस्थित होते.

लहान आकाराच्या गणेश मूर्तींच्या विसर्जनासाठी शहरातील विविध भागांत कृत्रिम विसर्जन कुंड तयार करण्यात आले आहेत. तर मोठ्या मूर्तींच्या विसर्जनासाठी शहरातील चार प्रमुख ठिकाणी मोठे कृत्रिम तलाव उभारण्यात आले आहेत. गोरेवाडा, पोलीस लाईन टाकळी, लकडगंज भागातील कच्छी वीसा तसेच कोराडी या भागांत मोठ्या मूर्तींसाठी स्वतंत्र कृत्रिम तलावांची व्यवस्था करण्यात आली आहे.

गणेश मूर्तींचे विसर्जन नैसर्गिक जलस्रोतांऐवजी या ठरवून दिलेल्या कृत्रिम कुंडांमध्ये केल्यास तलाव, नद्या, विहिरी आणि नाल्यांमधील जलप्रदूषण कमी होण्यास मदत होणार आहे. नैसर्गिक पाण्याच्या स्त्रोतांमध्ये विसर्जन झाल्यास होणारे प्रदूषण टाळण्याच्या उद्देशाने ही व्यवस्था करण्यात आली आहे.

महापौर नीता ठाकरे यांनी नागरिकांना आवाहन केले की, गणेश मूर्तींचे विसर्जन तलाव, विहीर किंवा नाल्यात करू नये. मनपाने मोठ्या संख्येने कृत्रिम विसर्जन कुंड तयार केले असून त्यांचा वापर केल्यास नैसर्गिक जलस्रोतांना प्रदूषणापासून वाचवता येईल, असे त्या म्हणाल्या. कृत्रिम विसर्जन कुंडांची माहिती डिजिटल माध्यमातूनही उपलब्ध करून दिली जात आहे, जेणेकरून जास्तीत जास्त नागरिकांपर्यंत ही माहिती पोहोचावी.

नागरिकांना आपल्या घराजवळील कृत्रिम विसर्जन कुंड शोधण्यासाठी भटकावे लागू नये, यासाठी मनपाने QR कोड आणि डिजिटल नकाशाची सुविधा उपलब्ध करून दिली आहे. QR कोड स्कॅन केल्यानंतर नागरिकांना त्यांच्या भागातील जवळच्या कृत्रिम विसर्जन कुंडाची माहिती मिळणार आहे.

यामध्ये झोननुसार विसर्जन स्थळांची माहिती आणि तिथे पोहोचण्यासाठी गूगल मॅपद्वारे दिशादर्शनही मिळणार आहे. यासाठी मनपाने स्वतंत्र वेबसाईटही तयार केली असून, त्याद्वारे नागरिक मोबाईलवरून विसर्जन कुंडांची माहिती मिळवू शकतात. अशा प्रकारे नागपूर महानगरपालिकेने यंदाच्या गणेशोत्सवात पर्यावरणपूरक विसर्जनासाठी सर्वंकष व्यवस्था उभारली आहे.