एसटी प्रवासात आता कंडक्टरकडूनच एनसीएमसी कार्ड टॉपअप, महिला-ज्येष्ठांना दिलासा

बाप्पाच्या आगमनाच्या पहिल्याच दिवशी एसटी प्रवाशांसाठी एक मोठी आणि दिलासादायक बातमी समोर आली आहे. राज्य रस्ते परिवहन महामंडळाने प्रवाशांच्या मार्गातील एक मोठा अडथळा दूर करणारा निर्णय घेतला आहे. एसटीच्या सवलतीचा लाभ घेणाऱ्या प्रवाशांना आता एनसीएमसी (NCMC) कार्डचे टॉपअप रिचार्ज थेट बसमधील वाहकाकडून म्हणजेच कंडक्टरकडूनच करून घेता येणार आहे.

या नव्या सुविधेमुळे कार्डमधील बॅलन्स संपल्यामुळे सवलत न मिळणे, रिचार्जसाठी डेपोंमध्ये लागणाऱ्या लांबलचक रांगा आणि त्यामुळे होणारी प्रवाशांची धावपळ हे प्रकार आता कायमचे थांबणार आहेत. महामंडळाच्या या निर्णयामुळे महिला आणि ज्येष्ठ नागरिकांना मोठा दिलासा मिळाला आहे.

एसटी महामंडळाने 1 सप्टेंबरपासून महिला आणि 65 ते 75 या वयोगटातील ज्येष्ठ नागरिकांसाठी सवलतीच्या प्रवासाकरता एनसीएमसी कार्ड अनिवार्य केले होते. मात्र कार्डमध्ये पुरेसा बॅलन्स नसेल तर प्रवाशांना अनेक अडचणींचा सामना करावा लागत होता. रिचार्जसाठी डेपो किंवा संबंधित केंद्रांवर चकरा माराव्या लागत असल्याने अनेकदा प्रवाशांना ऐनवेळी सवलतीऐवजी पूर्ण तिकीट काढावे लागत होते. काही ठिकाणी तर सुटे पैसे नसल्यामुळे प्रवाशांना बसमधून खाली उतरवण्याचे प्रकारही घडले होते. ही सगळी गैरसोय लक्षात घेऊन महामंडळाने आता ही टॉपअपची जबाबदारी वाहकांकडे सोपवली आहे. त्यामुळे प्रवास सुरू असतानाच बसमध्ये गरजेनुसार रक्कम भरता येणार असून रिचार्जसाठी वेगळी धावपळ करावी लागणार नाही.

गणेशोत्सवाच्या काळातच ही टॉपअप सुविधा सुरू झाल्याने गेल्या दोन आठवड्यांपासून प्रवाशांना सहन करावा लागणारा त्रास आता संपला आहे. गणेशोत्सवात एसटी गाड्यांमध्ये मोठी गर्दी असते, अशा वेळी रिचार्जच्या अडचणींमुळे गोंधळ उडण्याची शक्यता होती. मात्र ही सुविधा उपलब्ध झाल्याने प्रवासातील अडथळे दूर होणार असून महामंडळाच्या महसुलातही वाढ होणार आहे.

वाहकांकडून मिळणाऱ्या या सुविधेशिवाय प्रवाशांना भीम (BHIM) ॲपच्या मदतीनेही एनसीएमसी कार्ड टॉपअप करता येणार आहे. कार्डच्या मागच्या बाजूला दिलेला क्यूआर (QR) कोड वापरून ही प्रक्रिया पूर्ण करता येईल. त्यामुळे डिजिटल पेमेंट वापरणाऱ्या प्रवाशांनाही आता घरबसल्या कार्डमध्ये पैसे भरणे सोपे झाले आहे.

कार्डमधील बॅलन्स संपल्यानंतर तो रिचार्ज करण्यासाठी डेपो किंवा इतर केंद्रांवर जावे लागत असल्याने प्रवाशांची मोठी गैरसोय होत होती. आता थेट वाहकांकडूनच टॉपअपची सुविधा मिळाल्याने ही धावपळ पूर्णपणे थांबणार आहे. महिला आणि ज्येष्ठ नागरिकांना प्रवास सुरू असतानाच आवश्यक रक्कम भरता येणार असल्याने त्यांना सवलतीचा लाभ घेणे आता अधिक सोपे होणार आहे.