मोबाईलने घात केला! स्क्रीनमध्ये गुंतला अन् थेट छतावरून खाली कोसळला तरुण; अंगावर काटा आणणारा व्हिडिओ व्हायरल

मोबाईल फोन आता आपल्या रोजच्या जगण्याचा इतका भाग बनला आहे की, अनेकदा त्याच्या वापरामुळे लोक स्वतःच्याच जीवाशी खेळताना दिसतात. आधी फक्त कॉल आणि मेसेजपुरता मर्यादित असलेला हा फोन आता मनोरंजनाचं मोठं साधन झाला आहे. फोनमध्ये आलेल्या अनेक स्मार्ट फिचर्समुळे आणि सुविधांमुळे लोकांचा त्यावर घालवला जाणारा वेळ कैकपटीने वाढला आहे. यामुळे लोक तासनतास आपला वेळ मोबाईलवर घालवतात, अगदी रस्त्याने चालतानाही त्यांचं लक्ष स्क्रीनवरच खिळलेलं असतं आणि त्यातूनच अपघाताची स्थिती निर्माण होते. याच सवयीमुळे किती मोठा धोका ओढवू शकतो, याचं ताजं उदाहरण सध्या सोशल मीडियावर व्हायरल होत असलेल्या एका व्हिडिओतून समोर आलं आहे.

या व्हिडिओत एक तरुण छतावरून चालताना दिसतो. चालताना त्याचं पूर्ण लक्ष हातातल्या मोबाईलमध्ये गुंतलेलं असतं, त्यामुळे तो समोर काय आहे हे बघतच नाही आणि याचाच पश्चाताप त्याला पुढे भोगावा लागतो. मोबाईलमध्ये डोकं खुपसून चालणाऱ्या या तरुणाच्या पुढ्यात एक मोठी मोकळी जागा असते, पण स्क्रीनमध्ये गुंतलेल्या त्याच्या नजरेला ती दिसत नाही. परिणामी त्याचा पाय त्या मोकळ्या जागेत पडतो आणि तो क्षणार्धात धाडकन खाली कोसळतो. स्वतःला सावरण्याची किंवा वाचवण्याची कोणतीही संधी मिळण्याआधीच ही दुर्घटना घडते आणि तरुण अपघाताला बळी पडतो.

तरुण इतक्या जोरात खाली कोसळतो की आजूबाजूला असलेले सगळे लोक हा प्रकार बघून हादरून जातात. व्हिडिओच्या शेवटच्या भागात लोक शिडीवरून घाईघाईने खाली उतरून त्या तरुणाच्या मदतीसाठी धावताना दिसतात. वरच्या मजल्यावरून खाली पडल्यामुळे त्याला निश्चितच गंभीर दुखापत झाली असण्याची शक्यता आहे, मात्र त्याच्या प्रकृतीबाबत अद्याप कोणतीही अधिकृत माहिती समोर आलेली नाही.

ही घटना @gharkekalesh या एक्स अकाऊंटवरून शेअर करण्यात आली असून, पोस्टमध्ये लिहिण्यात आलं आहे की एक व्यक्ती वरच्या मजल्यावरून खाली पडला असून चालताना खाली बघून चालण्याचं आवाहन करण्यात आलं आहे. या व्हिडिओला आतापर्यंत ७ लाखांहून अधिक व्ह्यूज मिळाले असून, अनेक युजर्सनी यावर आपापल्या प्रतिक्रिया कमेंट्समधून मांडल्या आहेत. एका युजरने लिहिलं की, फ्लोअरची रचना अत्यंत वाईट असून मधोमध अशी रिकामी जागा ठेवण्याची काहीच गरज नव्हती. दुसऱ्या एका युजरने प्रश्न उपस्थित केला की तिथे ती मोकळी जागा नेमकी कशासाठी ठेवण्यात आली आहे. तर आणखी एका युजरने उपरोधाने लिहिलं की, या विचित्र डिजाईनसाठी इंटिरियर डिझायनर किंवा आर्किटेक्टलाच लगेच अटक करायला हवी.