चंद्रपुरात सागवान लाकडाच्या वस्तूंचे फिरते विक्री केंद्र सुरू; माविम आणि एफडीसीएमचा संयुक्त उपक्रम

चंद्रपुरात आज सागवान लाकडापासून बनवलेल्या वस्तूंचे फिरते विक्री केंद्र सुरू करण्यात आले. महिला आर्थिक विकास महामंडळ म्हणजेच माविम आणि महाराष्ट्र वन विकास महामंडळ म्हणजेच एफडीसीएम यांनी एकत्र येऊन हा उपक्रम सुरू केला. जिल्हाधिकारी वसुमना पंत यांच्या हस्ते या केंद्राचे उद्घाटन पार पडले.

चंद्रपूर जिल्ह्यात सागवानाची मोठी वनसंपदा असून या वनसंपदेचा उपयोग करून महिलांच्या कौशल्याला व्यावसायिक रूप देणे आणि त्यांना रोजगार तसेच त्यांच्या उत्पादनांसाठी हक्काची बाजारपेठ मिळवून देणे, हा या उपक्रमामागचा मुख्य उद्देश आहे. सागवान लाकडापासून तयार केलेल्या दर्जेदार आणि आकर्षक वस्तू या केंद्रावर विक्रीसाठी ठेवण्यात आल्या आहेत. जिल्ह्यातील वनसंपदेचा योग्य वापर करून महिलांच्या कौशल्याला व्यावसायिक स्वरूप देण्याचा प्रयत्न या उपक्रमातून करण्यात येत आहे.

उद्घाटन कार्यक्रमाला एफडीसीएमच्या प्रादेशिक व्यवस्थापक दिव्य भारती, विभागीय व्यवस्थापक गणेश मोटकर, सहायक विभागीय व्यवस्थापक रुपेश पाटील, वन संरक्षण अधिकारी संभाजी कोंडेवार उपस्थित होते. त्याचबरोबर माविमचे जिल्हा समन्वय अधिकारी प्रदीप काठोळे, जिल्हा प्रकल्प सल्लागार भूषण मुंजेकर, नरेंद्र बनकर, अमित चवरे यांनीही हजेरी लावली. खुशिया लोकसंचालित साधन केंद्राच्या अध्यक्षा सुनिता गणफाडे आणि व्यवस्थापक शारदा हुसे याही या वेळी उपस्थित होत्या.

चंद्रपूरच्या दर्जेदार सागवानाची ओळख आणखी व्यापक करणे आणि त्याचवेळी महिलांना रोजगार व विक्रीच्या संधी उपलब्ध करून देणे, हे या उपक्रमाचे उद्दिष्ट माविम आणि एफडीसीएमने ठेवले आहे. जिल्ह्यातील वनसंपदेचा योग्य वापर करून महिलांच्या हाताला काम आणि त्यांच्या कौशल्याला बाजारपेठ मिळावी, यासाठी दोन्ही संस्था एकत्रितपणे काम करत आहेत.

या फिरत्या विक्री केंद्रावर सागवान लाकडापासून बनवलेल्या आकर्षक मूर्ती, विविध प्रकारचे फर्निचर, खुर्च्या, टेबल, दरवाजे, कटिंग बोर्ड, मोमेंटो, नेमप्लेट तसेच शोभेच्या आणि कलाकुसरीच्या वस्तू विक्रीसाठी उपलब्ध आहेत. उत्तम दर्जाचे सागवान लाकूड, आकर्षक डिझाईन आणि महिलांच्या हातातील कलाकुसर यामुळे या वस्तूंना वेगळे वैशिष्ट्य मिळाले आहे.

या उपक्रमामुळे महिलांच्या कौशल्याला बाजारपेठ मिळण्यासोबतच स्थानिक पातळीवर रोजगारनिर्मिती होणार आहे. तसेच महिलांच्या कौशल्य विकासाला आणि महिला बचत गटांच्या छोट्या व्यवसायांना चालना मिळणार आहे. नागरिकांनी आपल्या गरजेनुसार सागवान लाकडापासून बनवलेल्या दर्जेदार वस्तू खरेदी करून या महिला उद्योजकांना प्रोत्साहन द्यावे, असे आवाहन करण्यात आले आहे.

या वस्तूंबाबत अधिक माहिती हवी असल्यास माविम संचालित खुशिया लोकसंचालित साधन केंद्र, चंद्रपूर येथे संपर्क साधता येईल.