चंद्रपुरात गुणवंत विद्यार्थी व आदर्श नागरिकांचा भव्य गौरव सोहळा संपन्न; आमदार डॉ. अभिजीत वंजारी यांचे

चंद्रपुरात रणरागिणी महिला नागरी सहकारी पतसंस्थेच्या वतीने गुणवंत विद्यार्थी आणि आदर्श नागरिकांचा गौरव सोहळा उत्साहात पार पडला. नागपूर विभाग पदवीधर मतदारसंघाचे आमदार डॉ. अभिजीत वंजारी यांच्या शुभहस्ते पालकांसह विद्यार्थ्यांचा सन्मान करण्यात आला. कार्यक्रमाच्या अध्यक्षस्थानी ज्येष्ठ समाजसेवक श्यामबाबू पुगलिया होते.

दहावीत ९० टक्क्यांपेक्षा जास्त आणि बारावीत ८० टक्क्यांपेक्षा जास्त गुण मिळविणाऱ्या विद्यार्थ्यांना यावेळी खास गौरवण्यात आले. सोबतच चंद्रपूरच्या सामाजिक व शैक्षणिक क्षेत्रात मोलाचे काम करणाऱ्या आदर्श नागरिकांचाही मान्यवरांच्या हस्ते सत्कार करण्यात आला. गुणवंत विद्यार्थ्यांसोबत त्यांचे पालकही यावेळी उपस्थित होते आणि त्यांचाही मान्यवरांच्या हस्ते सन्मान करण्यात आला.

संस्थेच्या संस्थापक अध्यक्ष सौ. चंदाताई मनोजराव वैरागडे यांनी प्रास्ताविकात पतसंस्थेच्या वाटचालीचा आढावा घेतला. अवघ्या १० महिलांच्या बचत गटापासून सुरू झालेला हा उपक्रम आज कोट्यवधींची उलाढाल असणाऱ्या रणरागिणी पतसंस्थेत रूपांतरित झाल्याचे त्यांनी सांगितले. महिलांचे आर्थिक सक्षमीकरण, वृक्षारोपण, रक्तदान शिबिरे आणि आरोग्य तपासणी यांसारखे उपक्रम राबवत असतानाच नागरिकांच्या सेवेसाठी आपण राजकीय व सामाजिक क्षेत्रातही कार्यरत असल्याचे त्यांनी नमूद केले. त्यांनी सत्कारमूर्तींना पुढील वाटचालीसाठी शुभेच्छाही दिल्या.

आमदार डॉ. अभिजीत वंजारी यावेळी म्हणाले की, आजचे गुणवंत विद्यार्थी हेच उद्याच्या सक्षम व सुजलाम्-सुफलाम् भारताचे खरे शिल्पकार आहेत. विद्यार्थ्यांनी फक्त पुस्तकी ज्ञानावर न थांबता सामाजिक बांधिलकीही जपावी, असे आवाहन त्यांनी केले. विद्यार्थ्यांनी शिक्षणासोबतच समाजाप्रती असलेली आपली जबाबदारी विसरू नये, असे मत त्यांनी या वेळी मांडले.

विशेष अतिथी शिवानीताई वडेट्टीवार यांनी विद्यार्थ्यांना गरजेच्या शिष्यवृत्ती व शैक्षणिक संधी मिळवून देण्यासाठी आपण कटिबद्ध असल्याचे सांगितले. तसेच शहरात महिलांचे मोठे संघटन उभे केल्याबद्दल त्यांनी चंदाताई वैरागडे यांच्या कार्याचा गौरव केला.

व्यासपीठावर डॉ. इंदूताई अग्रवाल, शहर काँग्रेस अध्यक्ष शिवाराव पोलशेट्टी, ज्येष्ठ नेते रामूभाऊ तिवारी, ॲड. विजयराव मोगरे, प्राचार्य नरेंद्र बोबडे, संतोषभाऊ कुचनकर, नगरसेविका संजीवनी वासेकर, अनिता चौखे, करिश्मा जंगम, अभिषेक डोइफोडे, वनश्री मेश्राम आणि सोनिया उंदिरवाडे हे मान्यवर उपस्थित होते.

लालपेठ, बाबूपेठ, माना टेकडी परिसरासह शहरभरातील नागरिक, महिला आणि विद्यार्थी मोठ्या संख्येने या कार्यक्रमाला हजर होते. सूत्रसंचालन सौ. सारिका कुचनकर यांनी केले, तर स्वाती जनबंधू यांनी आभार मानले.