चंद्रपुरात चिचपल्लीच्या विद्यार्थ्यांनी साकारला बांबूचा बाप्पा; पर्यावरणपूरक मूर्तीसह जागतिक बांबू सप्ताहाचा

चंद्रपूर जिल्ह्यातील चिचपल्ली इथल्या बांबू संशोधन केंद्रात एक वेगळाच उपक्रम पाहायला मिळाला. इथल्या विद्यार्थ्यांनी चक्क बांबूपासून गणेशमूर्ती साकारली आणि 'बीआरटीसी चिचपल्ली बांबू गणपती' या उपक्रमाने संपूर्ण चंद्रपूर जिल्ह्याचं लक्ष वेधून घेतलं.

'बांबूटूबाप्पा' असं या अभिनव उपक्रमाचं नाव. यातून तयार झालेल्या मूर्तीची विधिवत प्रतिष्ठापना करण्यात आली. या पर्यावरणपूरक उपक्रमामुळे केंद्रात 'जागतिक बांबू सप्ताह २०२६'ची सुरुवात उत्साहात झाली.

महाराष्ट्र वन विभागाच्या बांबू संशोधन व प्रशिक्षण केंद्रात (बीआरटीसी) १४ ते १८ सप्टेंबर या काळात जागतिक बांबू सप्ताह आयोजित करण्यात आला आहे. सप्ताहाच्या पहिल्याच दिवशी 'डिप्लोमा इन बांबू टेक्नॉलॉजी' या अभ्यासक्रमाच्या विद्यार्थ्यांनी एकत्र येऊन तयार केलेली बांबूची गणेशमूर्ती हे या दिवसाचं खास आकर्षण ठरलं.

पर्यावरणपूरक आणि कलात्मक गणेशमूर्ती बांबूपासून घडवून विद्यार्थ्यांनी परंपरा, पर्यावरण संवर्धन आणि आधुनिक बांबू तंत्रज्ञान यांचा एक वेगळाच मेळ जमवून दाखवला. बांबूचा वापर फक्त पारंपरिक वस्तू बनवण्यापुरता मर्यादित राहिलेला नाही, तर आधुनिक डिझाईन, कलाकृती, शाश्वत उत्पादने आणि उद्योजकतेसाठीही तो तितकाच उपयोगी ठरू शकतो, हा संदेश या मूर्तीच्या माध्यमातून देण्यात आला.

यामुळे पर्यावरणपूरक गणेशोत्सवाच्या संकल्पनेलाही एक नवा आयाम मिळाला. निसर्गाशी जुळणाऱ्या बांबूचा कल्पकतेने वापर करून विद्यार्थ्यांनी घडवलेला हा 'बांबूचा बाप्पा' कार्यक्रमाला उपस्थित असलेल्या सगळ्यांचं लक्ष सतत वेधून घेत होता. विद्यार्थ्यांच्या या कल्पकतेचं आणि त्यांनी दाखवलेल्या कौशल्याचं उपस्थित मान्यवरांनी विशेष कौतुक केलं.

या कार्यक्रमाला बीआरटीसीचे संचालक उमेश वर्मा, वनक्षेत्रपाल सतीश शेंडे, चिचपल्लीचे सरपंच चंदन उचेकर, न्यू एरा क्लिनिक सोल्युशनचे सचिन धात्रक यांच्यासह बीआरटीसीचे अधिकारी, कर्मचारी आणि विद्यार्थी मोठ्या संख्येने हजर होते.

याप्रसंगी मान्यवरांनी बोलताना बांबूला 'हरित सोने' म्हटलं. बांबूवर आधारित पर्यावरणपूरक उत्पादने, कौशल्य विकास, रोजगारनिर्मिती आणि ग्रामीण उद्योजकता या सगळ्यांच्या माध्यमातून शाश्वत आर्थिक विकासाला मोठी चालना मिळू शकते, असं मत मान्यवरांनी मांडलं.

'जागतिक बांबू सप्ताह २०२६'अंतर्गत तांत्रिक सत्रे, तज्ज्ञांचं मार्गदर्शन, विद्यार्थ्यांचे उपक्रम, स्पर्धा आणि जनजागृती कार्यक्रम आयोजित करण्यात आले आहेत. या सप्ताहाची सांगता १८ सप्टेंबर रोजी 'जागतिक बांबू दिना'च्या खास कार्यक्रमाने होणार आहे. यंदाच्या सप्ताहाची संकल्पना 'बांबू फॉर द फ्युचर - फ्रॉम ट्रॅडिशन टू इनोव्हेशन' अशी आहे. बांबू संशोधन, नवोपक्रम, शाश्वत उपजीविका आणि हरित अर्थव्यवस्था यांना प्रोत्साहन देणे, हा यामागचा मुख्य उद्देश आहे.