बुलढाणा: 'लेक लाडकी' योजनेतून १२,३०० कुटुंबांना लाभ, १४,६२० नोंदणी
बुलढाणा जिल्ह्यात मुलींच्या शिक्षणासाठी आणि आर्थिक सक्षमीकरणासाठी सुरू असलेल्या 'लेक लाडकी' योजनेला मोठा प्रतिसाद मिळत आहे.
बुलढाणा जिल्ह्यात मुलींच्या जन्माचे स्वागत करत त्यांच्या शिक्षणाला आणि भविष्यातील आर्थिक सक्षमीकरणाला बळ देण्यासाठी शासनाकडून राबवली जाणारी 'लेक लाडकी' योजना हजारो कुटुंबांसाठी मोठा आधार ठरत आहे. जिल्ह्यातील तब्बल १४ हजार ६२० कुटुंबांनी या योजनेच्या लाभासाठी नोंदणी केली होती, त्यापैकी सुमारे १२ हजार ३०० कुटुंबांना प्रत्यक्ष लाभ मिळाला आहे.
समाजात मुलींच्या जन्माबाबत सकारात्मक दृष्टिकोन रुजवणे, त्यांचे शिक्षण आणि संगोपन नीट व्हावे तसेच त्यांना आर्थिकदृष्ट्या सक्षम बनवणे, हा या योजनेचा मुख्य हेतू आहे. आर्थिकदृष्ट्या दुर्बल कुटुंबांतील मुलींना या योजनेमुळे वेगवेगळ्या टप्प्यांवर आर्थिक मदत दिली जाते. जिल्ह्यात योजनेबाबत जनजागृती केल्यानंतर मोठ्या प्रमाणात कुटुंबांनी आपल्या मुलींच्या नावे नोंदणी केली.
आतापर्यंत नोंदणी झालेल्या १४ हजार ६२० कुटुंबांपैकी १२ हजार ३०० कुटुंबांना प्रत्यक्ष लाभ मिळाला असून, उरलेल्या अर्जांची प्रक्रिया वेगवेगळ्या कारणांमुळे अजून सुरू आहे. आवश्यक कागदपत्रांची पूर्तता झाल्यावर पात्र लाभार्थ्यांनाही योजनेचा लाभ मिळेल, अशी अपेक्षा व्यक्त केली जात आहे.
मुलीच्या जन्मापासून तिच्या शिक्षणापर्यंत आर्थिक मदतीचा हात मिळत असल्याने अनेक कुटुंबांना दिलासा मिळत आहे. विशेषतः ग्रामीण भागातील आणि आर्थिकदृष्ट्या दुर्बल कुटुंबांसाठी ही योजना महत्त्वाची ठरत आहे. मुलींच्या शिक्षणात पैशाची अडचण येऊ नये आणि त्यांचे भविष्य अधिक सक्षम व्हावे, या हेतूने शासनाने ही योजना सुरू केली होती. यामुळे मुलगा-मुलगी असा भेदभाव कमी व्हावा, मुलींना समान संधी मिळावी, त्यांचे शिक्षण पूर्ण व्हावे आणि त्या स्वावलंबी बनाव्यात, अशी अपेक्षा आहे.
तालुका पातळीवरून महिला व बालविकास कार्यालयाकडे आलेल्या २२४५ अर्जांना मान्यता देऊन ते आयुक्त कार्यालयाकडे ऑनलाइन पाठवण्यात आल्याचे प्रशासनाकडून सांगण्यात आले.
योजनेसाठी पिवळे किंवा केशरी रेशन कार्ड, कुटुंबाचा वार्षिक उत्पन्न दाखला, महाराष्ट्र राज्य आदिवासी असल्याचा पुरावा अनिवार्य आहे. यासोबतच लाभार्थी मुलीचा जन्मदाखला, मुलीचे आधार कार्ड, आईचे आधार कार्ड, लाभार्थी व आईच्या संयुक्त बँक खात्याच्या पासबुकची छायांकित प्रत लागते. लाभार्थीची आई हयात नसल्यास मृत्यूचा दाखला व वडिलांचे आधार कार्ड द्यावे लागते, तसेच लाभार्थी व वडिलांचे संयुक्त बँक खाते आधारशी लिंक असणे आवश्यक आहे.
बुलढाण्याचे महिला व बालविकास अधिकारी प्रमोद एंडोले यांनी सांगितले की, या योजनेसाठी पात्र असलेल्या लाभार्थ्यांनी अंगणवाडी सेविकेशी संपर्क साधून नोंदणी करावी.
