भूमिका अभिनय व लोकनृत्य स्पर्धेतील प्रथम क्रमांकाचे संघ करणार नागपूर विभागात गोंदिया जिल्ह्याचे प्रतिनिधित्व

गोंदिया येथील जिल्हा शिक्षण व प्रशिक्षण संस्थेच्या (डायट) सभागृहात 9 सप्टेंबर रोजी जिल्हास्तरीय भूमिका अभिनय व लोकनृत्य स्पर्धा उत्साहात पार पडल्या. केंद्र शासनाच्या लोकसंख्या शिक्षण उपक्रमांतर्गत ही स्पर्धा घेण्यात आली. राज्य शैक्षणिक संशोधन व प्रशिक्षण परिषद, महाराष्ट्र, पुणे या संस्थेच्या मार्गदर्शनाखाली आणि त्यांनीच घालून दिलेल्या निर्देशांनुसार स्पर्धेचे नियोजन करण्यात आले होते.

जिल्ह्यातील आठही तालुक्यांमध्ये आधी तालुकास्तरावर स्पर्धा झाल्या होत्या. त्यामध्ये प्रथम क्रमांक पटकावलेले संघ या दोन्ही स्पर्धांसाठी डायटमध्ये एकत्र आले होते. दोन्ही प्रकारांत म्हणजे भूमिका अभिनय आणि लोकनृत्य या दोन्ही स्पर्धांत प्रथम क्रमांक मिळवणारे संघ आता नागपूर विभागस्तरावर गोंदिया जिल्ह्याचे प्रतिनिधित्व करणार आहेत, असे डायटचे प्राचार्य राजकुमार हिवारे यांनी सांगितले. संपूर्ण स्पर्धेचे आयोजन प्राचार्य हिवारे यांच्याच मार्गदर्शनाखाली करण्यात आले होते.

उद्घाटन कार्यक्रमाच्या अध्यक्षस्थानी डायटचे ज्येष्ठ अधिव्याख्याता व लोकसंख्या शिक्षण विभागप्रमुख डॉ. नरेश वैद्य होते. यावेळी विषय सहाय्यक सुनील हरिणखेडे व संदीप सोमवंशी, तसेच सहविभागप्रमुख व साधन व्यक्ती उर्मिला वैद्य आणि अनिता ठेंगडी उपस्थित होते. गोंदियातील अध्यापक विद्यालयाच्या अध्यापकाचार्य श्रद्धा निनावे व टीना ठाकरे यांनी परीक्षक म्हणून काम पाहिले. कार्यक्रमाचे सूत्रसंचालन विषय साधन व्यक्ती वशिष्ठ खोब्रागडे यांनी केले, तर आभार विशेष शिक्षक प्रमोद खोब्रागडे यांनी मानले.

भूमिका अभिनय स्पर्धेत जिल्हा परिषद हायस्कूल, करटी बुद्रुक (ता. तिरोडा) या शाळेने प्रथम क्रमांक पटकावला. पी. एम. श्री शहीद जाण्या तिम्या जिल्हा परिषद हायस्कूल, गोरेगाव (ता. गोरेगाव) या शाळेला द्वितीय क्रमांक मिळाला, तर जिल्हा परिषद हायस्कूल, सौंदड (ता. सडक अर्जुनी) या शाळेला तृतीय क्रमांक मिळाला.

लोकनृत्य स्पर्धेत अनुसूचित जाती व नवबौद्ध मुलांची शासकीय निवासी शाळा, नंगपुरा/मुर्री (ता. गोंदिया) या शाळेने प्रथम क्रमांक मिळवला. अनुसूचित जाती व नवबौद्ध मुलींची शासकीय निवासी शाळा, डव्वा (ता. सडक अर्जुनी) या शाळेला द्वितीय क्रमांक आणि अनुसूचित जाती व नवबौद्ध मुलींची शासकीय निवासी शाळा, सरांडी (ता. तिरोडा) या शाळेला तृतीय क्रमांक मिळाला.

भूमिका अभिनयातून विद्यार्थ्यांनी वेगवेगळ्या सामाजिक व शैक्षणिक विषयांवर भाष्य केले, तर लोकनृत्याच्या सादरीकरणातून महाराष्ट्राची समृद्ध लोककला व संस्कृती पाहायला मिळाली. विद्यार्थ्यांच्या उत्स्फूर्त सादरीकरणामुळे सभागृहात उत्साहाचे वातावरण होते. उपस्थित मान्यवरांनी सर्व विजेत्या संघांचे अभिनंदन केले असून, नागपूर विभागस्तरीय स्पर्धेसाठी निवड झालेल्या दोन्ही प्रथम क्रमांकाच्या संघांना शुभेच्छा देण्यात आल्या.