भंडाऱ्यात भीषण अपघात! ट्रॅक्स अन् आयशर ट्रकच्या धडकेत 8 मजुरांचा घटनास्थळीच मृत्यू

भंडारा जिल्ह्यातून एक अत्यंत दुर्दैवी घटना समोर आली आहे. जिल्ह्याच्या लाखनी साकोली तालुक्यातील पिंपळगावजवळ आयशर ट्रक आणि ट्रॅक्स गाडीची भीषण धडक झाली, आणि या अपघातात 8 जणांचा घटनास्थळीच मृत्यू झाला. मृत्यू झालेले सर्व जण छत्तीसगड राज्यातील मजूर असल्याची माहिती समोर आली आहे. या मजुरांचा मृत्यू अत्यंत दुर्दैवी परिस्थितीत झाल्याने भंडारा जिल्ह्यात हळहळ व्यक्त केली जात आहे.

मिळालेल्या प्राथमिक माहितीनुसार, छत्तीसगडमधील हे मजूर ट्रॅक्स गाडीतून नागपूरच्या दिशेने प्रवास करत होते. पिंपळगाव इथल्या एका पेट्रोल पंपावरून एक आयशर ट्रक रस्त्यावर निघत असताना, मागून येणाऱ्या ट्रॅक्स चालकाचं गाडीवरचं नियंत्रण सुटलं. भरधाव वेगातली ही ट्रॅक्स थेट आयशर ट्रकवर जाऊन आदळली. धडक इतकी जोरदार होती की ट्रॅक्स गाडीचा अक्षरशः चक्काचूर झाला. या भीषण धडकेमुळे गाडीतील प्रवाशांना बचावाची कोणतीही संधी मिळाली नाही.

या अपघातात ट्रॅक्समधील 8 जणांचा जागीच मृत्यू झाला. घटनेची माहिती मिळताच नॅशनल हायवे पोलीस आणि स्थानिक प्रशासनाने तातडीने घटनास्थळी धाव घेऊन मदतकार्य सुरू केलं. अपघातातील गंभीर जखमींना तातडीने रुग्णवाहिकेतून भंडारा इथल्या शासकीय वैद्यकीय महाविद्यालयात उपचारासाठी दाखल करण्यात आलं. घटनास्थळी मोठ्या प्रमाणात नागरिकांनी आणि प्रशासकीय यंत्रणेने गर्दी केली होती.

मिळालेल्या माहितीनुसार, मृत्यू झालेले सगळे जण छत्तीसगडचे मजूर होते आणि ते नागपूरच्या दिशेने जात असतानाच हा भीषण अपघात झाला. पेट्रोल पंपावरून निघणाऱ्या आयशर ट्रकला मागून आलेल्या मजुरांच्या ट्रॅक्सने धडक दिल्यामुळे ही घटना घडली. प्राथमिक माहितीनुसार चालकाचं नियंत्रण सुटल्यामुळेच हा अपघात झाल्याचं बोललं जात आहे. आठ जणांचा घटनास्थळीच मृत्यू झाल्याची माहिती नॅशनल हायवे पोलिसांनी दिली आहे. उरलेल्या गंभीर जखमींना भंडारा मेडिकल कॉलेजमध्ये उपचारासाठी दाखल करण्यात आलं आहे, आणि त्यांच्यावर उपचार सुरू आहेत.

या भीषण अपघातामुळे महामार्गावरील वाहतूक काही काळ विस्कळीत झाली होती. मात्र पोलिसांनी अपघातग्रस्त वाहनं बाजूला काढून वाहतूक पूर्ववत केली. या प्रकरणी पोलिसांनी अपघाताची नोंद केली असून पुढील तपास सुरू आहे. अपघाताचं नेमकं कारण आणि जबाबदारी पोलिसांच्या तपासातून स्पष्ट होणार आहे.