वाईत नगराध्यक्ष अनिल सावंत रस्त्यावर उतरले, व्यापाऱ्यांच्या कट्ट्यावर बसून ऐकल्या अडचणी

वाई नगरपरिषदेच्या माध्यमातून शहरात सध्या अनेक विकासकामे वेगाने सुरू आहेत. या कामांचा दर्जा राखला जावा यासाठी नगराध्यक्ष अनिल सावंत यांनी ऑफिसमध्ये बसून आढावा घेण्याऐवजी थेट रस्त्यावर उतरून पाहणी करण्याचा मार्ग निवडला. काम सुरू असलेल्या ठिकाणी जाऊन बारकाईने तपासणी करण्याची त्यांची ही पद्धत शहरातील नागरिकांचे लक्ष वेधून घेत आहे.

मंडई परिसरात सुरू असलेल्या कामाच्या पाहणीदरम्यान नगराध्यक्ष सावंत यांनी रस्त्याच्या बांधकामात वापरल्या जाणाऱ्या स्टीलच्या प्रमाणात किंवा गुणवत्तेत कोणतीही तडजोड होता कामा नये, अशा स्पष्ट सूचना संबंधित यंत्रणेला दिल्या. "विकासकामे जनतेच्या पैशातून होत असल्यामुळे ती मजबूत, दर्जेदार आणि दीर्घकाळ टिकणारी असायला हवीत," असे मत त्यांनी यावेळी मांडले.

वाई शहरासह तालुक्यातील नागरिकांची मंडईत नेहमीच मोठी गर्दी असते. खरेदीसाठी येणाऱ्या नागरिकांना त्रास होऊ नये आणि वाहतुकीला अडथळा निर्माण होऊ नये, या दृष्टीने मंडई परिसरातील बैठक व्यवस्था आणि वाहतूक नियोजन अशा पद्धतीने आखले जात आहे की एखादे वाहन जेमतेम दोन मिनिटांत सहजपणे बाहेर पडू शकेल. या नियोजनाचीही नगराध्यक्षांनी प्रत्यक्ष जागेवर जाऊन खातरजमा केली.

या पाहणीदरम्यान एक प्रसंग विशेष लक्षवेधी ठरला. नगराध्यक्ष अनिल सावंत हे मंडईतील व्यापाऱ्यांच्या कट्ट्यावर जाऊन थेट त्यांच्यासोबत बसले आणि त्यांच्या अडचणी व समस्या ऐकून घेतल्या. सत्तेच्या खुर्चीवर असलेला पदाधिकारी आपल्या कट्ट्यावर येऊन बसतो, विचारपूस करतो आणि अडचणी मनापासून ऐकतो, हा अनुभव व्यापाऱ्यांसाठी भावनिक ठरला. "आमच्या व्यथा समजून घेण्यासाठी आमच्या कट्ट्यावर, हातगाडीवर येऊन बसणारा हा पहिलाच नगराध्यक्ष असावा," अशी प्रतिक्रिया काही व्यापाऱ्यांनी दिली.

नगराध्यक्षांनी केवळ अडचणी ऐकून घेतल्या नाहीत, तर ग्राहकांना अधिक चांगली सेवा कशी द्यावी, त्यांच्याशी आपुलकीने कसे वागावे आणि मंडई परिसर अधिक शिस्तबद्ध व स्वच्छ कसा ठेवता येईल, याबाबतही मार्गदर्शन केले. पदाचा कोणताही बडेजाव न बाळगता व्यापाऱ्यांच्या कट्ट्यावर बसून सुख-दुःखाची चौकशी करणाऱ्या नगराध्यक्षांच्या या कृतीमुळे व्यापाऱ्यांच्या चेहऱ्यावर समाधान दिसून आले. "आमच्यासाठी काम करणारा नगराध्यक्ष आमच्यात येऊन बसतो, आमचे म्हणणे ऐकून घेतो, हीच आमच्यासाठी मोठी गोष्ट आहे," असे व्यापाऱ्यांनी सांगितले.

या पाहणीच्या वेळी विरोधी पक्षनेते विजय ढेकाने, नगरसेवक अजित शिंदे, प्रवीण जाधव-भुसारी, निखिल जाधव-भुसारी, निलेश मोरे आणि संतोष जमदाडे उपस्थित होते. विकासकामांचा दर्जा तपासताना दाखवलेली कडक भूमिका आणि व्यापाऱ्यांच्या समस्या ऐकताना दाखवलेली आपुलकी, या दोन्ही गोष्टींचा मेळ आजच्या मंडई पाहणीत दिसून आला.