प्रांतिक तैलिक महासभेच्या महिला जिल्हाध्यक्षपदी पत्रकार सुषमा राऊत यांची चौथ्यांदा निवड

महाराष्ट्र प्रांतिक तैलिक महासभेच्या बुलढाणा जिल्हा कार्यकारिणीची बैठक नुकतीच पार पडली आणि या बैठकीत जिल्हाध्यक्ष सुभाष देव्हडे यांनी महिला आघाडी आणि युवा आघाडीची नवी कार्यकारिणी जाहीर केली. या घोषणेनुसार पत्रकार सुषमा राऊत यांची महिला जिल्हाध्यक्षपदी सलग चौथ्यांदा निवड करण्यात आली आहे. त्याचबरोबर युवा आघाडीच्या जिल्हाध्यक्षपदाची जबाबदारी तानाजी रामदास पैठणे यांच्याकडे सोपवण्यात आली, तर महिला जिल्हा उपाध्यक्षपदी अश्विनीताई क्षिरसागर यांच्या नावाची घोषणा करण्यात आली.

बुलढाणा जिल्हा महाराष्ट्र प्रांतिक तैलिक महासभेची ही बैठक नुकतीच पार पडली. संघटनेचा विस्तार वाढवण्यासोबतच महिला आणि युवकांना संघटनेशी अधिक प्रभावीपणे जोडण्याच्या उद्देशाने ही नवी कार्यकारिणी जाहीर करण्यात आल्याचे बैठकीत सांगण्यात आले.

चौथ्यांदा महिला जिल्हाध्यक्षपदी निवड झालेल्या सुषमा राऊत या गेल्या अनेक वर्षांपासून हे पद समर्थपणे सांभाळत आहेत. त्यांच्याच पुढाकाराने शेगाव येथे राज्यस्तरीय वधू-वर मेळावा घेण्यात आला होता, ज्यातून अनेक विवाह जुळून आले. याशिवाय बुलढाणा जिल्ह्यातील विविध गावांना भेटी देत त्यांनी महाराष्ट्र प्रांतिक तैलिक महासभेची भूमिका समाजबांधवांपर्यंत पोहोचवली असून, तेली समाजाला एकत्र आणण्यासाठी त्यांचे सातत्याने प्रयत्न सुरू असतात.

पत्रकारितेसोबतच सुषमा राऊत यांनी अलीकडेच वकिली व्यवसायातही पाऊल टाकले आहे. त्या उच्चशिक्षित असून समाजातील प्रश्नांची जाण आणि प्रबोधनाची प्रभावी शैली यामुळे त्यांनी समाजात स्वतःचे नाव कमावले आहे. देऊळगाव राजा तालुका प्रतिनिधी म्हणून त्या गेल्या अनेक वर्षांपासून दैनिक देशोन्नती या वृत्तपत्रात निर्भीडपणे पत्रकारिता करत आहेत. त्यांच्या या चौथ्या निवडीमुळे संघटनेच्या महिला आघाडीला अधिक बळ मिळेल, अशी चर्चा सध्या सुरू आहे.

महिला जिल्हा उपाध्यक्षपदी निवड झालेल्या अश्विनीताई क्षिरसागर यादेखील प्रभावी वक्त्या म्हणून ओळखल्या जातात. महिलांना संघटित करण्याच्या त्यांच्या आजवरच्या अनुभवाचा आणि कामाचा फायदा संघटनेला होणार आहे.

दुसरीकडे, युवा आघाडीच्या जिल्हाध्यक्षपदी बुलढाणा तालुक्यातील कोलवड गावचे तानाजी रामदास पैठणे यांची निवड झाली आहे. युवकांना संघटनेशी जोडण्यासोबतच समाजाच्या विविध प्रश्नांवर युवकांची भूमिका ठामपणे मांडण्याची जबाबदारी आता त्यांच्यावर येऊन पडली आहे. संघटनेतील नव्या पिढीचे प्रतिनिधित्व करत, युवकांचे प्रश्न आणि मागण्या जिल्हा कार्यकारिणीसमोर मांडण्याचे काम त्यांना करावे लागणार आहे.