PM मोदी वाढदिवस: पंतप्रधान मोदींना वाढदिवसानिमित्त क्रीडा जगतातून शुभेच्छांचा महावर्षाव, वैभव म्हणाला...

देशाचे पंतप्रधान नरेंद्र मोदी यांचा आज वाढदिवस आहे आणि देशभरातून त्यांना शुभेच्छांचा वर्षाव होतो आहे. भारताचे यशस्वी आणि सर्वात लोकप्रिय पंतप्रधान असलेले नरेंद्र मोदी आज आपला वाढदिवस साजरा करत आहेत. 'सेवा संकल्प' या उपक्रमासोबतच वाढदिवसानिमित्त देशभरात इतर वेगवेगळे कार्यक्रमही आयोजित करण्यात आले आहेत. देशातील क्रीडाविश्वातील अनेक दिग्गजांनी आणि नामांकित खेळाडूंनी सोशल मीडियाच्या माध्यमातून पंतप्रधान मोदींना वाढदिवसाच्या भरभरून शुभेच्छा दिल्या आहेत.

भारतीय ऑलिंपिक संघटनेच्या अध्यक्षा आणि भारताची माजी दिग्गज ॲथलीट पी. टी. उषा यांनी 'X' या सोशल मीडिया प्लॅटफॉर्मवर पंतप्रधान मोदींसोबतचा एक खास फोटो शेअर करत त्यांना वाढदिवसाच्या शुभेच्छा दिल्या. त्यांनी आपल्या संदेशात लिहिले, "पंतप्रधान नरेंद्र मोदी यांना ७६व्या वाढदिवसाच्या हार्दिक शुभेच्छा. ईश्वर त्यांना उत्तम आरोग्य, उदंड आयुष्य आणि देशाला शांतता, समृद्धी तसेच प्रगतीच्या पथावर पुढे नेण्यासाठी अफाट शक्ती देवो, हीच प्रार्थना."

माजी भारतीय क्रिकेटपटू आणि सध्याच्या भारतीय संघाचे मुख्य प्रशिक्षक गौतम गंभीर यांनीही 'एक्स'वरून मोदींना शुभेच्छा दिल्या. गंभीर म्हणाला, "पंतप्रधान नरेंद्र मोदी यांना वाढदिवसाच्या हार्दिक शुभेच्छा! ईश्वर तुम्हाला उत्तम आरोग्य आणि दीर्घायुष्य प्रदान करो. तुम्ही भारताला एका अत्यंत उज्ज्वल, सशक्त आणि समृद्ध भविष्याकडे असेच मार्गदर्शक म्हणून पुढे घेऊन जावे, हीच प्रार्थना."

भारतीय क्रिकेटचा महान माजी फलंदाज आणि भारतरत्न सचिन तेंडुलकर यानेही सोशल मीडियाच्या माध्यमातून पंतप्रधान मोदींना वाढदिवसाच्या अत्यंत खास शैलीत शुभेच्छा दिल्या. सचिनने आपल्या अधिकृत एक्स हँडलवरून पंतप्रधान नरेंद्र मोदींना शुभेच्छा देणारा संदेश शेअर केला. देशसेवेप्रती पंतप्रधानांची निष्ठा आणि मेहनत कौतुकास्पद असल्याचे सचिनने आपल्या पोस्टमध्ये नमूद केले.

युवा क्रिकेटपटू वैभव सूर्यवंशीनेही पंतप्रधान मोदींना वाढदिवसाच्या शुभेच्छा दिल्या. वैभवने आपल्या पोस्टमध्ये लिहिले, "माननीय पंतप्रधान श्री नरेंद्र मोदी जी यांना वाढदिवसाच्या हार्दिक शुभेच्छा! मी आपल्या उत्तम आरोग्याची, सदैव आनंदाची आणि देश व जनसेवेसाठी समर्पित अशा अनेक यशस्वी वर्षांची प्रार्थना करतो."

पंतप्रधान नरेंद्र मोदी यांच्या कार्यकाळात 'खेलो इंडिया'सारख्या उपक्रमांमुळे देशातील अनेक लहान आणि ग्रामीण भागातील तरुण खेळाडूंना मोठी व्यासपीठे उपलब्ध झाली आहेत. सचिन तेंडुलकर, गौतम गंभीर, पी. टी. उषा आणि इतर अनेक खेळाडूंनी अशा प्रकारे पंतप्रधान मोदींना वाढदिवसाच्या शुभेच्छा दिल्या आहेत.