नागपुरात सुरक्षारक्षकांच्या वेतनात कोट्यवधींचा अपहार; विकास ठाकरे यांची गुन्हा दाखल करण्याची मागणी

नागपुरात कचरा संकलनाचे काम करणाऱ्या एजी एन्व्हायरो या कंपनीने सुरक्षा एजन्सी आणि मनपा अधिकाऱ्यांशी हातमिळवणी करून १७ सुरक्षारक्षकांच्या नावे परस्पर बँक खाती उघडली आणि त्यांच्या वेतनावर डल्ला मारला, असा गंभीर आरोप काँग्रेसचे आमदार विकास ठाकरे यांनी केला आहे. या सुरक्षारक्षकांची कोणतीही परवानगी न घेता ही खाती उघडण्यात आली होती आणि त्यातून कोट्यवधी रुपयांचे संशयास्पद व्यवहार झाल्याचेही ठाकरे यांचे म्हणणे आहे.

कंत्राटाच्या अटींनुसार प्रत्येक सुरक्षारक्षकाला दरमहा २५,६०० रुपये वेतन देणे बंधनकारक होते. मात्र प्रत्यक्षात कर्मचाऱ्यांच्या हातात दरमहा फक्त १५,५०० रुपयेच पडत होते. यामुळे १७ सुरक्षारक्षकांचे मिळून दरमहा १,७१,७०० रुपये आणि वर्षाकाठी तब्बल २०,६०,४०० रुपये हडपले गेल्याचा आरोप आहे.

या गैरप्रकाराने त्रस्त झालेल्या सुरक्षारक्षकांच्या एका शिष्टमंडळाने आमदार विकास ठाकरे यांची भेट घेत हे प्रकरण त्यांच्यासमोर मांडले. नोव्हेंबर २०१९ पासून आर्मर सिक्युरिटी इंडिया लिमिटेड या एजन्सीने सूर्योदय स्मॉल फायनान्स बँकेच्या बडीं शाखेत या सुरक्षारक्षकांची कसलीही संमती न घेता त्यांच्या नावाने खाती उघडली होती, असे शिष्टमंडळाने सांगितले.

आमदार ठाकरे यांनी यासंदर्भात काही ठोस मागण्या केल्या आहेत. संपूर्ण कंत्राट कालावधीत झालेल्या सर्व आर्थिक व्यवहारांचे विशेष ऑडिट तात्काळ करण्यात यावे, अशी त्यांची पहिली मागणी आहे. याशिवाय बनावट खाती उघडणारी सुरक्षा एजन्सी, एजी एन्व्हायरो कंपनी, सूर्योदय बँक आणि यात सामील असलेले मनपाचे दोषी अधिकारी यांच्यावर तात्काळ गुन्हे दाखल करावेत, अशीही मागणी त्यांनी केली आहे. तसेच कर्मचाऱ्यांना त्यांच्या हक्काच्या वेतनाची थकीत रक्कम व्याजासह लगेच द्यावी, असेही ठाकरे म्हणाले.

मे २०२६ मध्ये सुरक्षारक्षकांनी या अन्यायाविरोधात आवाज उठवला. त्याला प्रत्युत्तर म्हणून एजन्सीने सुडाच्या भावनेने त्यांचे वेतनच रोखून धरले. यामुळे पगार न मिळाल्याने जून २०२६ पासून या कर्मचाऱ्यांवर काम बंद करण्याची वेळ आली.

या प्रकरणात मनपाच्या भूमिकेवरही आमदार ठाकरे यांनी प्रश्नचिन्ह उपस्थित केले आहे. मनपा ही मुख्य नियोक्ता असतानाही कंत्राटदार कंपनी कामगार कायद्यांचे पालन करत आहे की नाही, याची कोणतीही तपासणी अधिकाऱ्यांनी केली नाही, असे ते म्हणाले. एवढेच नव्हे तर वाद निर्माण झाल्यानंतर एजी एन्व्हायरोने जुन्याच मालकांशी संबंधित असलेल्या एलिट सिक्युरिटास या दुसऱ्या एजन्सीला कंत्राट देऊन टाकले. केवळ एजन्सीचे नाव बदलून तोच गैरप्रकार पुढे सुरू ठेवण्यात आल्याचा संशय आमदार ठाकरे यांनी व्यक्त केला आहे.