नागपूर मनपा कचरा ठेक्यात नवा घोटाळा, 17 गार्डांच्या नावे बनावट बँक खाती उघडून वेतन हडपल्याचा आरोप

नागपूर महानगरपालिकेच्या कचरा संकलन ठेक्याबाबत आणखी एक गंभीर गैरव्यवहार समोर आला आहे. कचरा संकलनाचे काम करणारी एजी एन्व्हायरो इन्फ्रा प्रोजेक्ट्स प्रायव्हेट लिमिटेड ही कंपनी, तिच्याशी संबंधित सुरक्षा एजन्सी आणि मनपाचे काही अधिकारी यांच्या संगनमताने सुरक्षा गार्डांची आर्थिक पिळवणूक झाल्याचा आरोप काँग्रेस आमदार विकास ठाकरे यांनी केला आहे.

आमदारांच्या म्हणण्यानुसार, 17 सुरक्षा गार्डांना कल्पना नसताना आणि त्यांची अधिकृत संमती न घेता त्यांच्या नावाने बँक खाती उघडण्यात आली. सन 2019 पासून या खात्यांमधून विविध आर्थिक व्यवहार झाल्याचाही आरोप आहे. ही खाती उघडण्यासाठी कोणती कागदपत्रे वापरली गेली, या खात्यांवर नियंत्रण कोणाचे होते आणि यातून झालेल्या व्यवहारांचा प्रत्यक्ष फायदा कोणाला झाला, असे प्रश्न आता उपस्थित होत आहेत.

वेतनाबाबतही गंभीर आरोप करण्यात आले आहेत. ठाकरे यांच्या म्हणण्यानुसार करारातील अटी आणि निश्चित दरानुसार प्रत्येक सुरक्षा गार्डाला दरमहा 25,600 रुपये मिळणे अपेक्षित होते, पण प्रत्यक्षात त्यांना फक्त 15,500 रुपये दिले जात असल्याचा आरोप आहे. 17 गार्डांच्या हिशेबाने हा वेतनातील फरक दरमहा 1,71,700 रुपये आणि वर्षभरात 20,60,400 रुपये इतका होतो. संपूर्ण ठेका कालावधीतील आर्थिक व्यवहारांचे विशेष लेखापरीक्षण (ऑडिट) करण्याची मागणी ठाकरे यांनी केली आहे.

सुरक्षा गार्डांच्या शिष्टमंडळाने आमदार विकास ठाकरे यांची भेट घेऊन लेखी तक्रार दिली. तक्रारदारांच्या म्हणण्यानुसार त्यांनी मे 2026 मध्ये या कथित अनियमिततांविरोधात आवाज उठवला होता. त्यानंतर संबंधित सुरक्षा एजन्सीने त्यांचे वेतन रोखून धरले. वेतन न मिळाल्याने कर्मचाऱ्यांनी जून 2026 पासून कामावर जाणे बंद केले. कर्मचाऱ्यांना थकीत वेतन आणि वेतनातील फरकाची संपूर्ण रक्कम व्याजासह देण्याची मागणी आमदारांनी केली आहे.

नोव्हेंबर 2019 मध्ये कचरा संकलनाचा ठेका सुरू झाल्यानंतर एजी एन्व्हायरोने आपल्या अखत्यारीतील पाच झोनमधील कचरा हस्तांतरण केंद्रे आणि वाहनतळांवर सुरक्षा गार्ड पुरवण्याचे काम आर्मर सिक्युरिटी इंडिया लिमिटेड या कंपनीला दिले होते. या ठेका व्यवस्थेत मनपाची भूमिका 'प्रिन्सिपल एम्प्लॉयर' म्हणजेच मुख्य नियोक्त्याची असल्याचा हवाला देत, कामगार कायदे, वेतन नियम आणि कराराच्या अटींचे पालन होते की नाही, याची प्रभावी देखरेख मनपाने का केली नाही, असा सवाल आमदारांनी उपस्थित केला आहे.

तक्रारीनंतर सुरक्षा गार्डांनी असाही आरोप केला की एजी एन्व्हायरोने पुढे एलिट सिक्युरिटास प्रायव्हेट लिमिटेड या कंपनीचे सुरक्षा गार्ड नेमले. या नव्या एजन्सीचे संबंध आर्मर सिक्युरिटीशी जोडलेल्या लोकांशी असल्याचा दावा तक्रारदारांनी केला आहे. नव्या एजन्सीच्या नियुक्तीत निविदा प्रक्रिया, पात्रतेच्या अटी आणि नागपूर मनपाची पूर्वपरवानगी यांचे पालन झाले की नाही, याचीही चौकशी करण्याची मागणी आमदार ठाकरे यांनी केली आहे. या संपूर्ण प्रकरणात उच्चस्तरीय चौकशी आणि जबाबदार व्यक्तींवर कारवाई करण्याची मागणी करण्यात आली आहे.