नागपुरात आरोग्य सेवांचा कायापालट, 3 महिन्यांत भरणार डॉक्टर व आशा वर्करांची रिक्त पदे

नागपूर जिल्ह्याच्या दक्षिण-पश्चिम विधानसभा मतदारसंघातील आरोग्य व्यवस्था अधिक मजबूत करण्यासाठी एक एकात्मिक आरोग्य समिती स्थापन करण्यात आली आहे. या समितीची पहिली बैठक सिव्हिल लाइन्समधील हैदराबाद हाउस येथे आमदार डॉ. परिणय फुके यांच्या अध्यक्षतेखाली पार पडली. या मतदारसंघातील नागरिकांना भेडसावणाऱ्या आरोग्यविषयक समस्यांचा एकत्रित आढावा घेऊन त्यावर तोडगा काढणे हा या समितीच्या स्थापनेमागील उद्देश आहे.

मुख्यमंत्री देवेंद्र फडणवीस यांच्या मार्गदर्शनाखाली ही समिती तयार करण्यात आली होती. बैठकीत आरोग्य केंद्रांमधील अडचणींचा आढावा घेण्यात आला आणि रिक्त पदे तसेच आशा वर्करांची नियुक्ती तीन महिन्यांत पूर्ण करण्याचे निर्देश देण्यात आले. परिसरातील आरोग्य संस्थांमध्ये डॉक्टर, वैद्यकीय अधिकारी, नर्स, तंत्रज्ञ, फार्मासिस्ट आणि इतर आवश्यक कर्मचाऱ्यांच्या रिक्त जागांची संस्थानिहाय माहिती या बैठकीत घेण्यात आली, जेणेकरून कोणत्या केंद्रात नेमकी किती कर्मचाऱ्यांची कमतरता आहे हे स्पष्ट व्हावे.

महानगरपालिकेची थेट भरती प्रक्रिया सध्या बंद असल्याने नियमानुसार आउटसोर्सिंगच्या माध्यमातून मनुष्यबळ उपलब्ध करून देण्याची कार्यवाही करण्यास संबंधित अधिकाऱ्यांना सांगण्यात आले. तसेच आशा वर्करांच्या रिक्त पदांसाठी तातडीने प्रस्ताव सादर करून भरती प्रक्रिया वेगाने पुढे नेण्याचे निर्देशही या बैठकीत देण्यात आले.

बैठकीत दक्षिण-पश्चिम विधानसभा मतदारसंघातील नगरसेवकांनी आपापल्या प्रभागातील आरोग्यविषयक अडचणी सविस्तरपणे मांडल्या. यामध्ये औषधांचा नियमित पुरवठा, आवश्यक वैद्यकीय उपकरणांची कमतरता, अपूर्ण बांधकामे, आरोग्य केंद्रांची दुरुस्ती आणि सुरक्षारक्षकांची गरज असे मुद्दे उपस्थित करण्यात आले. डॉ. परिणय फुके यांनी अधिकाऱ्यांना तातडीने कार्यवाही करण्याचे निर्देश देत सांगितले की, औषधे, उपकरणे किंवा कर्मचाऱ्यांच्या कमतरतेमुळे नागरिकांना उपचारांपासून वंचित राहावे लागू नये.

एकात्मिक आरोग्य समितीने आरोग्य व्यवस्थेसाठी एकूण चार प्रमुख प्राधान्यक्रम निश्चित केले. यामध्ये आरोग्य केंद्रांत औषधांची पुरेशी उपलब्धता आणि नियमित पुरवठा, रिक्त पदे व आशा वर्करांची नियुक्ती तीन महिन्यांत पूर्ण करणे, आवश्यक वैद्यकीय उपकरणे व साधने उपलब्ध करून देणे आणि आरोग्य केंद्रांच्या पायाभूत सुविधा मजबूत करणे यांचा समावेश आहे.

याशिवाय आरोग्य केंद्रांची दुरुस्ती लवकर पूर्ण करणे, गरजेनुसार सुरक्षारक्षक उपलब्ध करून देणे तसेच कमी जागेत किंवा भाड्याच्या इमारतींमध्ये सुरू असलेली केंद्रे अधिक सोयीच्या ठिकाणी स्थलांतरित करण्याचे निर्देशही या बैठकीत देण्यात आले. सोबतच आयजीआर रुग्णालयासाठी आवश्यक साहित्याचे मागणीपत्रही डॉ. फुके यांच्याकडे सुपूर्द करण्यात आले.