नव्या पिढीतील टाटा नेक्सॉन 2027 मध्ये पूर्ण बदललेल्या रुपात, एटलस प्लॅटफॉर्मवर येणार
टाटा मोटर्सची सर्वाधिक खपाची एसयूव्ही नेक्सॉन आता पूर्णपणे नव्या पिढीत बाजारात येण्याच्या तयारीत आहे.
सब-4 मीटर कॉम्पॅक्ट एसयूव्ही सेगमेंटमध्ये आघाडीवर असलेली टाटा मोटर्स आता आपल्या सर्वात लोकप्रिय गाडी नेक्सॉनला मोठा अपग्रेड देण्याच्या तयारीत आहे. टाटा पंचला यंदा मिडलाईफ अपडेट मिळाला होता, पण नेक्सॉनच्या बाबतीत मात्र कंपनी थेट फुल जनरेशन बदल करणार आहे. 2027 मध्ये ही नवी नेक्सॉन बाजारात येईल.
सध्या ही आगामी नेक्सॉन रस्त्यावर चाचणीला दिसते आहे आणि समोर आलेल्या स्पाय फोटोंवरून एक गोष्ट स्पष्ट होते, की गाडीत नवं डिझाईन, अपडेटेड इंटीरियर आणि नवं तंत्रज्ञान एकत्र पाहायला मिळणार आहे.
या नव्या नेक्सॉनचं सर्वात मोठं वैशिष्ट्य असणार आहे ते म्हणजे तिचा नवा एटलस म्हणजेच अॅडॅप्टिव्ह टेक-फॉरवर्ड लाईफस्टाईल आर्किटेक्चर हा प्लॅटफॉर्म. हाच प्लॅटफॉर्म वापरून नुकतीच टाटा कर्व्ह ही एसयूव्हीदेखील तयार करण्यात आली होती. एटलस हा स्केलेबल प्लॅटफॉर्म असून तो वेगवेगळ्या बॉडी स्टाईल, वेगवेगळे पॉवरट्रेन पर्याय आणि क्लाऊड कनेक्टिव्हिटीसारखं पुढच्या काळातलं तंत्रज्ञान सांभाळू शकतो. यामुळेच 2027 च्या नेक्सॉनमध्ये नवी टचस्क्रीन इन्फोटेनमेंट सिस्टीम, अपडेटेड युझर इंटरफेस, केबिनची नवी थीम, पॉवर्ड आणि व्हेंटिलेटेड फ्रंट सीट तसंच पॅनोरॅमिक सनरूफसारखे प्रीमियम फीचर मिळण्याची शक्यता आहे.
बाहेरून पाहिलं तर गाडीचा मूळ सिल्हूट कायम राहणार आहे. ड्युअल-टोन अलॉय व्हील, स्लोपिंग रूफलाईन आणि बाहेरचे रिअर व्ह्यू मिरर तसेच राहतील. मात्र साईड प्रोफाईलमध्ये काही बदल दिसतील, जसं की जास्त शार्प ए-पिलर, नवे रिअर डोअर आणि नवा स्पॉयलर. या टॉप सेलिंग एसयूव्हीच्या नव्या पिढीत रीडिझाईन केलेले एलईडी टेललॅम्प, सुधारित टेलगेट आणि नवा बंपर असेल, ज्यामुळे गाडीला रस्त्यावर जास्त मस्क्युलर आणि मॉडर्न लूक मिळेल. आकाराच्या बाबतीत मात्र गाडी सध्याच्या मॉडेलप्रमाणेच 3.99 मीटरच्या मर्यादेत राहणार आहे.
इंजिनच्या बाबतीत बोलायचं झालं तर 2027 च्या नेक्सॉनमध्ये सध्याचं 1.2 लीटर टर्बो पेट्रोल आणि 1.5 लीटर टर्बो डिझेल इंजिन तसंच ठेवलं जाण्याची शक्यता आहे. ट्रान्समिशनचे पर्यायही जुन्या मॉडेलसारखेच राहतील. याशिवाय अंडरबॉडी सीएनजी टँक असलेलं सीएनजी व्हर्जनही उपलब्ध असेल, जे 24 किलोमीटर प्रति किलो इतकं एआरएआय प्रमाणित मायलेज देतं.
भारतीय बाजारात सब-4 मीटर कॉम्पॅक्ट एसयूव्ही सेगमेंटमधलं आपलं अव्वल स्थान अधिक भक्कम करण्यासाठी ही गाडी येणार आहे. या सेगमेंटमध्ये नेक्सॉनची थेट स्पर्धा मारुती सुझुकी ब्रेझा, ह्युंडाई वेन्यू, किआ सोनेट, महिंद्रा एक्सयूव्ही 3एक्सओ, स्कोडा कायलाक, निसान मॅग्नाइट आणि रेनो कायगर या गाड्यांशी असणार आहे. किमतीबाबत बोलायचं झालं तर नव्या पिढीतली टाटा नेक्सॉन 8 लाख रुपयांपासून ते 15 लाख रुपयांपर्यंतच्या सुरुवातीच्या किमतीत लाँच होऊ शकते.
