देशातील सर्वात स्वस्त मेडिकल कॉलेज; इथे ५ वर्षांची MBBS फी समोसा-चहापेक्षाही कमी

भारतात डॉक्टर होण्याचं स्वप्न बघणाऱ्या अनेक मुलांसाठी सगळ्यात मोठा अडथळा असतो तो पैशांचा. वैद्यकीय शिक्षण म्हणजे MBBS घेणं हे भारतात अत्यंत महाग मानलं जातं. खाजगी मेडिकल कॉलेजमध्ये एमबीबीएसच्या एका वर्षाची फी दहा ते वीस लाख रुपयांपर्यंत जाते. इतकी मोठी रक्कम दरवर्षी भरणं हे मध्यमवर्गीय किंवा गरीब घरातल्या कुटुंबांना शक्य होत नाही. त्यामुळे मुलांना डॉक्टर व्हायचं असलं तरी हे स्वप्न अनेकदा अर्धवटच राहतं आणि पूर्ण होत नाही.

पण याच देशात असंही एक कॉलेज आहे जिथे नामांकित आणि दर्जेदार शिक्षण मिळूनही पाच वर्षांच्या संपूर्ण एमबीबीएस कोर्सची फी अवघी ५,८५६ रुपये आहे. म्हणजे महिन्याला शंभर रुपयांपेक्षाही कमी खर्चात इथले विद्यार्थी डॉक्टर बनतात. हे कॉलेज म्हणजे दुसरं तिसरं कुठलं नसून देशातली सगळ्यात नामांकित वैद्यकीय संस्था, एम्स दिल्ली आहे.

एम्स दिल्ली ही फक्त भारतातलीच नाही तर आशियातल्या सर्वोत्तम मेडिकल संस्थांपैकी एक मानली जाते. एनआयआरएफ रँकिंगमध्ये ही संस्था कायम पहिल्या क्रमांकावर असते, यावरूनच या संस्थेचा दर्जा किती उंचावर आहे हे लक्षात येतं.

आता इथल्या फीचा संपूर्ण तपशील बघितला तर पाच वर्षांची एकूण एमबीबीएस फी फक्त ५,८५६ रुपये इतकी आहे. यातली ट्यूशन फी संपूर्ण कोर्ससाठी साधारण १,३५० रुपये इतकी आहे. याशिवाय इथे राहणाऱ्या विद्यार्थ्यांसाठी हॉस्टेल आणि मेसची सुविधाही अतिशय अल्प दरात उपलब्ध आहे, त्यामुळे शिक्षणासोबतच राहण्याचा खर्चही परवडणारा आहे.

एम्स दिल्ली सोडून पुडुचेरीतील जिपमर आणि देशातल्या इतर राज्यांमधली सरकारी मेडिकल कॉलेजेसमध्येही फी तशी माफकच असते. पण या सगळ्या सरकारी कॉलेजांमध्ये एम्स दिल्लीची फी सर्वात कमी आहे.

इतकी कमी फी असूनही एम्स दिल्लीत प्रवेश मिळवणं तितकंच अवघड मानलं जातं. इथे प्रवेशासाठी विद्यार्थ्यांना आधी राष्ट्रीय स्तरावरची नीट यूजी ही प्रवेश परीक्षा द्यावी लागते. त्यानंतरही फक्त टॉप रँक मिळालेल्या विद्यार्थ्यांनाच इथे जागा मिळते. साधारणपणे सातशेहून अधिक गुण मिळवणारे आणि ऑल इंडिया रँकमध्ये पहिल्या पन्नास क्रमांकांत असणारे टॉपर विद्यार्थीच एम्स दिल्लीत एमबीबीएसला प्रवेश घेऊ शकतात.

फी इतकी कमी असली तरी शिक्षणाचा दर्जा मात्र अजिबात कमी नाही. इथे विद्यार्थ्यांना जागतिक दर्जाच्या लॅब्ज, आंतरराष्ट्रीय पातळीवरचे प्राध्यापक आणि प्रत्यक्ष रुग्णांवर उपचार करण्याचा मोठा अनुभव मिळतो. त्यामुळेच कमी फी आणि उत्तम दर्जाचं शिक्षण या दोन्ही गोष्टींमुळे एम्स दिल्ली हे देशातील विद्यार्थ्यांचं सगळ्यात पसंतीचं ठिकाण ठरतं.