जळगावात बेपत्ता महिलेचा जंगलात मृतदेह, मैत्रीतील वादातून खुनाचा संशय

जळगाव शहरातील रामेश्वर कॉलनी भागातून काही दिवसांपासून बेपत्ता असलेल्या एका महिलेचा मृतदेह पद्मालयच्या जंगलात सापडल्यामुळे परिसरात खळबळ उडाली आहे. मृत महिलेचे नाव कविता अरुण मिस्त्री असे आहे. १३ सप्टेंबर रोजी जंगल परिसरात त्यांचा मृतदेह आढळून आला. सुरुवातीच्या तपासात त्यांच्या डोक्यावर दगडाने वार करून खून केल्याचा संशय पोलिसांनी व्यक्त केला आहे. या प्रकरणात नरेश ऊर्फ आबा अनिल सोनवणे याला पोलिसांनी ताब्यात घेतले आहे.

कविता मिस्त्री ८ सप्टेंबरपासून बेपत्ता होत्या. त्या घरी परत न आल्याने घरच्यांनी शोधाशोध सुरू केली आणि जळगाव एमआयडीसी पोलीस स्टेशनमध्ये अपहरणाची तक्रार दाखल करण्यात आली. यानंतर परिसरातील माहिती आणि तांत्रिक तपासाच्या आधारे पोलिसांनी महिलेचा शोध सुरू केला होता.

तपास सुरू असताना पोलिसांचे लक्ष कविता आणि नरेश सोनवणे यांच्यातील संबंधांकडे गेले. दोघांमध्ये मैत्रीचे संबंध होते, अशी माहिती पोलिसांना मिळाली. कविता बेपत्ता होण्याच्या आदल्या दिवशी दोघांमध्ये वाद झाल्याचेही तपासात उघड झाल्याचे पोलिसांनी सांगितले. ८ सप्टेंबर रोजी नरेशने कविताला दवाखान्यात नेण्याचे सांगितले होते, असा पोलिसांना संशय आहे. त्यानंतर दोघे दुचाकीवरून निघाले. याच वेळी कविताने आपल्या मैत्रिणींना व्हिडिओ कॉल करून आपण नरेशसोबत जात असल्याचे सांगितले होते, हे तपासात समोर आले आहे.

पोलिसांनी कविता आणि नरेश या दोघांच्याही मोबाईलचे लोकेशन तपासले असता, दोन्ही मोबाईलचे शेवटचे लोकेशन म्हसावद परिसरात असल्याचे दिसून आले. त्यानंतर दोन्ही मोबाईल बंद झाल्याने पोलिसांचा संशय आणखी वाढला. दरम्यान, १३ सप्टेंबर रोजी पद्मालय भागातील जंगलात कविता यांचा मृतदेह सापडला. मृतदेहाच्या स्थितीवरून त्यांच्यावर हल्ला झाल्याचे प्राथमिक तपासात स्पष्ट झाले, त्यामुळे आधी दाखल असलेल्या अपहरणाच्या गुन्ह्याचा तपास खुनाच्या दिशेने वळवण्यात आला.

तांत्रिक माहिती आणि पोलीस तपासाच्या आधारे नरेश ऊर्फ आबा सोनवणे याचा शोध घेण्यात आला आणि त्याला जळगाव शहरातूनच ताब्यात घेण्यात आले. जुन्या संबंधातील वादातून हा प्रकार घडल्याचा पोलिसांना संशय आहे.

पोलीस अधीक्षक श्रीकांत धिवरे यांनी प्राथमिक तपासात अनैतिक संबंधाच्या संशयातून हा प्रकार घडल्याची माहिती दिली आहे. मात्र खुनामागचे नेमके कारण काय, घटनेच्या वेळी नेमके काय घडले आणि या गुन्ह्यात आणखी कोणाचा सहभाग आहे का, याचा तपास अजून सुरू आहे. संशयिताविरोधात जळगाव एमआयडीसी पोलीस स्टेशनमध्ये गुन्हा दाखल करण्यात आला असून पुढील तपास सुरू आहे. या घटनेमुळे रामेश्वर कॉलनीसह संपूर्ण जळगाव शहरात खळबळ उडाली आहे.