IND vs AFG: सलामीला कोण? वैभव, संजू की अभिषेक, श्रेयसने दिले उत्तर

अफगाणिस्तानविरुद्धच्या पहिल्या टी-२० सामन्याआधी भारतीय संघाचा कर्णधार श्रेयस अय्यर एका मोठ्या द्विधा मनःस्थितीत सापडला आहे. सामन्यापूर्वी झालेल्या पत्रकार परिषदेत अय्यरला विचारलेला पहिला प्रश्नच होता, तो डावाची सुरुवात नेमकी कोणाकडून करून घेणार. यावर अय्यरने स्पष्टपणे कबूल केले की, सध्याच्या भारतीय सलामीच्या पर्यायांमधून कोणालाही वगळणे हे सोपे काम नसणार आहे.

सध्या भारतीय टी-२० संघात वैभव सूर्यवंशी, संजू सॅमसन आणि अभिषेक शर्मा असे तीन सलामीवीर आहेत आणि तिघेही उत्तम फॉर्मात आहेत. त्यामुळे कर्णधारासमोर या तिघांपैकी एकाला अंतिम ११ जणांच्या संघातून वगळण्याचा मोठा पेच उभा राहिला आहे. सलामीच्या जोडीबाबत बोलताना अय्यर म्हणाला, "हा निर्णय खूप कठीण असणार आहे, कारण ते सातत्याने चांगली कामगिरी करत आहेत. जे खेळाडू संघाबाहेर राहतील, त्यांच्याशी मी प्रशिक्षकासोबत चर्चा करणे आणि त्यांना आश्वासन देणे महत्त्वाचे आहे की, काहीही झाले तरी योग्य वेळी त्यांना संधी नक्कीच मिळेल."

या तिघांपैकी संजू सॅमसनला तडजोड करावी लागण्याची शक्यता जास्त आहे, कारण प्लेइंग इलेव्हनमध्ये अभिषेक शर्मा डावाची सुरुवात करण्याची दाट शक्यता आहे. गेल्या दोन वर्षांपासून अभिषेक हा भारताचा सर्वोत्तम टी-२० फलंदाज राहिला आहे आणि किमान ५०० टी-२० धावा करणाऱ्या खेळाडूंमध्ये त्याचा स्ट्राइक रेट सर्वाधिक आहे. दुसरीकडे वैभव सूर्यवंशीची फलंदाजीची शैली पाहता त्याला संघातून वगळणे हा कठीण निर्णय ठरेल. त्यामुळे या परिस्थितीत संजूला बाहेर बसावे लागण्याची शक्यता उरते.

हे लक्षात घेण्यासारखे आहे की इंग्लंड दौऱ्यादरम्यान संजू सॅमसनच्या जागी वैभव सूर्यवंशीला प्लेइंग इलेव्हनमध्ये स्थान देण्यात आले होते. वैभवची पदार्पणाची मालिका फारशी प्रभावी नसली, तरी त्याने झिम्बाब्वेविरुद्ध चांगली छाप पाडली होती. यानंतर नुकत्याच संपलेल्या दुलीप ट्रॉफीतही वैभवने दमदार फलंदाजी केली होती. यामुळेच वैभव आणि अभिषेक हे दोघे मिळून डावाची सुरुवात करण्याची शक्यता अधिक दिसत आहे.

वैभव सूर्यवंशी नुकताच दुलीप ट्रॉफी खेळून आला असून अभिषेक शर्माने अलीकडेच शेर ए पंजाब टी-२० लीगमध्ये कमालीची कामगिरी केली आहे. त्यामुळे या दोघांनाच संधी मिळण्याची शक्यता अधिक वर्तवली जात आहे. चाहत्यांनाही वैभव आणि अभिषेकला पुन्हा एकदा मैदानावर खेळताना पाहायची इच्छा आहे. मात्र, श्रेयस नेमका कोणाला संधी देणार, हे सामन्याच्या वेळीच स्पष्ट होणार आहे.