NTA परीक्षा कॅलेंडर 2026-27: मोठ्या परीक्षांच्या तारखा जाहीर, कोणती परीक्षा कधी होणार ते वाचा
नॅशनल टेस्टिंग एजन्सीने डिसेंबर २०२६ ते मार्च २०२७ या कालावधीतील प्रमुख परीक्षांचे वेळापत्रक जाहीर केले आहे.
नॅशनल टेस्टिंग एजन्सीने म्हणजे NTA ने डिसेंबर २०२६ ते मार्च २०२७ या काळात होणाऱ्या अनेक महत्त्वाच्या प्रवेश आणि पात्रता परीक्षांचे अधिकृत एग्झाम कॅलेंडर जाहीर केले आहे. देशभरातील लाखो विद्यार्थी दरवर्षी या परीक्षांना बसतात आणि त्यामुळे या कॅलेंडरला मोठे महत्त्व आहे. UGC NET, CSIR UGC NET, JEE Main, CMAT आणि CUET PG या प्रमुख परीक्षांच्या संभाव्य तारखा या कॅलेंडरमध्ये देण्यात आल्या आहेत.
हे कॅलेंडर जाहीर झाल्यामुळे या स्पर्धा परीक्षांची तयारी करणाऱ्या विद्यार्थ्यांना त्यांच्या अभ्यासाचे आणि नियोजनाचे टप्पे आधीपासूनच ठरवणे आता सोपे होणार आहे. कोणत्या महिन्यात कोणती परीक्षा येणार आहे हे आधीच कळल्याने विद्यार्थ्यांना त्यानुसार अभ्यासाचे वेळापत्रक आखता येईल. मात्र या सगळ्या तारखा संभाव्य असून गरजेनुसार त्यात बदल केला जाऊ शकतो, असे NTA ने स्पष्ट केले आहे. त्यामुळे अंतिम तारखांसाठी विद्यार्थ्यांनी पुढे येणाऱ्या अधिकृत नोटिफिकेशनकडे लक्ष ठेवणे गरजेचे आहे.
UGC NET ची डिसेंबर २०२६ ची परीक्षा १४ ते १९ डिसेंबर २०२६ या कालावधीत होणार असून २० आणि २१ डिसेंबर या तारखा बफर डेट्स म्हणून राखीव ठेवण्यात आल्या आहेत. म्हणजेच मूळ नियोजित तारखांना काही अडचण आल्यास या दोन दिवसांचा वापर करता येईल. Joint CSIR UGC NET ही परीक्षा २० आणि २१ डिसेंबर २०२६ रोजी होणार आहे.
JEE Main 2027 च्या पहिल्या सत्राची परीक्षा २२, २३, २४ आणि २८, २९, ३० जानेवारी २०२७ रोजी होणार आहे, तर ३१ जानेवारी ही बफर डेट म्हणून ठेवण्यात आली आहे. Army Cadets College ची परीक्षा ४ जानेवारी २०२७ रोजी घेतली जाणार आहे.
CMAT 2027 ची परीक्षा ७ फेब्रुवारी २०२७ रोजी होणार आहे. NITTT या परीक्षेचा पहिला भाग २६ आणि २७ फेब्रुवारी २०२७ रोजी घेतला जाणार आहे, तर याच परीक्षेचा दुसरा भाग ५ आणि ७ मार्च २०२७ रोजी होणार आहे. CUET PG 2027 ची परीक्षा मार्च २०२७ मध्ये सलग १७ दिवसांच्या कालावधीत पार पडणार आहे.
या प्रमुख परीक्षांशिवाय NTA च्या या कॅलेंडरमध्ये आर्मी कॅडेट्स कॉलेज, निफ्ट म्हणजे NIFT ची एन्ट्रन्स एक्झाम आणि सैनिक शाळा प्रवेश परीक्षा यांसारख्या इतर विविध राष्ट्रीय स्तरावरील परीक्षांचाही समावेश करण्यात आला आहे. यामुळे या सर्व परीक्षा देणाऱ्या विद्यार्थ्यांनाही एकाच ठिकाणी सर्व तारखा पाहता येणार आहेत.
हे कॅलेंडर केवळ परीक्षेच्या कालावधीचे नियोजन दाखवणारे आहे, त्याला अधिकृत नोटिफिकेशन मानू नये असे NTA ने स्पष्ट केले आहे. प्रत्येक परीक्षेसाठी अर्ज करण्याची तारीख, परीक्षा केंद्रे, ॲडमिट कार्ड, आन्सर की आणि निकालाबाबतची सविस्तर माहिती देणारे इन्फॉर्मेशन बुलेटिन स्वतंत्रपणे प्रसिद्ध केले जाईल, असेही एजन्सीने सांगितले आहे. त्यामुळे संबंधित परीक्षेचे स्वतंत्र नोटिफिकेशन प्रसिद्ध झाल्यानंतरच विद्यार्थ्यांनी अर्जाची प्रक्रिया पूर्ण करावी.
