घरात घुसून महिलेला शिवीगाळ, मोबाईल व रोकड लंपास; गडचांदूर पोलिसांत गुन्हा दाखल

चंद्रपूर जिल्ह्यातील कोरपना तालुक्यातील आव्हाळपूर गावात एका महिलेला घरात घुसून शिवीगाळ करत मोबाईल आणि रोख रक्कम लंपास केल्याची घटना घडली आहे. या प्रकरणी गडचांदूर पोलीस ठाण्यात आरोपी प्रकाश वामन दुर्गे (रा. तळोधी, ता. कोरपना) याच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, तळोधीची मूळ रहिवासी असलेली ३३ वर्षीय महिला पती आणि पाच वर्षांच्या मुलासोबत आव्हाळपूर येथील दूध डेअरी परिसरात भाड्याच्या खोलीत राहते. तिचे पती अल्ट्राटेक सिमेंट कंपनीत कंत्राटी कामगार म्हणून काम करतात. आरोपी प्रकाश दुर्गे याच्या आणि तक्रारदार महिलेच्या कुटुंबात गेली १२ ते १३ वर्षे कौटुंबिक कारणावरून वाद सुरू आहे, दोघांचे एकमेकांशी अजिबात पटत नाही.

मंगळवार, ८ सप्टेंबर रोजी सकाळी ८ वाजता महिलेचे पती कामावर निघून गेले होते. त्यानंतर सकाळी १० वाजण्याच्या सुमारास महिला घराच्या मागील अंगणात मुलासोबत कचरा जाळत होती. त्याच वेळी घरात कोणीतरी शिरल्याचा आवाज तिला ऐकू आला. ती लगेच घरात गेली असता आरोपी प्रकाश दुर्गे थेट घरात उभा असल्याचे तिला दिसले.

अचानक घरात कसा आलास, अशी विचारणा महिलेने केली असता आरोपीने उलट तिच्यावरच संशय घेतला. तू कोणासोबतही का बोलतेस, असा जाब विचारत त्याने महिलेला अत्यंत खालच्या भाषेत शिवीगाळ केली. घाबरलेल्या महिलेने पतीला फोन करण्यासाठी कपाटावर ठेवलेला आकाशी रंगाचा विवो मोबाईल शोधला, पण तो जागेवर मिळाला नाही. तेवढ्यात आरोपीच्या खिशात तिचाच फोन दिसल्याने तिने तो परत मागितला, मात्र आरोपी फोन न देताच तिथून पळून गेला.

यानंतर महिलेने स्वयंपाकघरातील भिंतीवर लटकवलेली पर्स तपासली असता त्यातील छोट्या पर्समध्ये ठेवलेले १० हजार रुपये रोकडही गायब असल्याचे तिच्या लक्षात आले. तिने शेजारच्या महिलेच्या घरी जाऊन तिच्या मोबाईलवरून पतीला घडलेला प्रकार सांगितला. पतीने आरोपी प्रकाश दुर्गे याला फोन करून चोरलेले पैसे आणि मोबाईल परत करण्यास सांगितले, पण आरोपीने चोरी केल्याचे साफ नाकारले. मी फोन घेतला नाही, तुला जे काही करायचे ते कर, अशी उलट धमकीची भाषा त्याने वापरली.

घरातून एकूण २३ हजार रुपयांचा ऐवज म्हणजे १३ हजारांचा मोबाईल आणि १० हजार रुपये रोकड गेल्याने महिला व तिचे पती गडचांदूर पोलीस स्टेशनला पोहोचले आणि त्यांनी घडलेली सर्व हकिकत सांगितली. ठाणे प्रभारी अधिकारी व पोलीस निरीक्षक यांच्या मार्गदर्शनाखाली पोलिसांनी आरोपी प्रकाश वामन दुर्गे याच्याविरुद्ध भारतीय न्याय संहिता (बीएनएस) २०२३ च्या कलम ३०५(अ) म्हणजे घरात घुसून चोरी आणि कलम ३५२ म्हणजे शांतता भंग करण्याच्या उद्देशाने शिवीगाळ व अपमान या कलमांखाली गुन्हा दाखल केला आहे. या प्रकरणाचा पुढील तपास पोलीस हवालदार विजयकुमार मुंडे करत आहेत.