आमदार किशोर जोरगेवार यांच्या निवासस्थानी बाप्पाचे आगमन; समाजातील दुर्जन शक्तींचा नाश व्हावा - आमदार किशोर

चंद्रपूर शहरात गणेशोत्सवाच्या निमित्ताने उत्साहाचे वातावरण असून, आमदार किशोर जोरगेवार यांच्या राजमाता या निवासस्थानी लाडक्या गणरायाची विधिवत प्रतिष्ठापना करण्यात आली.

जोरगेवार कुटुंबाकडून तब्बल ९६ वर्षांपासून ही परंपरा अखंडपणे जपली जात आहे. त्यांच्या आजोबांनी सुरू केलेला हा धार्मिक आणि कौटुंबिक वारसा आता तिसरी पिढी पुढे नेत आहे. त्यामुळे यंदाचा गणेशोत्सव हा फक्त धार्मिक उत्सव न राहता ९६ वर्षांच्या कौटुंबिक परंपरेचा आणि संस्कारांचा साक्षीदार ठरला आहे.

जोरगेवार कुटुंबात गणेशोत्सवाची सुरुवात आजोबांनी १९३१ साली केली होती. त्या वेळी भक्ती, श्रद्धा आणि कुटुंबातील एकोप्याच्या भावनेतून ही परंपरा सुरू झाली होती आणि काळाच्या ओघात ती अधिकच समृद्ध होत गेली. आजोबांनंतर पुढच्या पिढ्यांनीही ही परंपरा तितक्याच श्रद्धेने जपली असून, आता आमदार किशोर जोरगेवार यांचे कुटुंब ही परंपरा पुढे नेत आहे.

गणरायाच्या आगमनाच्या निमित्ताने राजमाता निवासस्थानी भक्तिमय वातावरण निर्माण झाले होते. कुटुंबीयांनी विधिवत पूजा-अर्चा करून बाप्पाचे स्वागत केले. यावेळी गणपती बाप्पा मोरया, मंगलमूर्ती मोरया अशा जयघोषाने संपूर्ण परिसर दुमदुमून गेला. कुटुंबीय, नातेवाईक आणि आप्तेष्टांनी मोठ्या संख्येने उपस्थित राहून भक्तिभावाने गणरायाचे दर्शन घेतले.

९६ वर्षांपूर्वी सुरू झालेल्या या गणेशोत्सवाच्या परंपरेत अनेक पिढ्यांच्या आठवणी जोडल्या गेल्या आहेत. या ९६ वर्षांच्या काळात परिस्थिती बदलली, काळ बदलला, तरी गणरायावरील श्रद्धा आणि कुटुंबीयांनी जपलेली ही परंपरा मात्र कायम राहिली. त्यामुळे या गणेशोत्सवाला धार्मिकतेसोबतच कौटुंबिक भावबंध आणि संस्कारांचेही विशेष महत्त्व मिळाले आहे.

जोरगेवार कुटुंबातील हा घरगुती गणेशोत्सव फक्त पूजा आणि उत्सवापुरता मर्यादित न राहता कुटुंबाला एकत्र आणणारा संस्कारांचा उत्सव ठरला आहे. ज्येष्ठांनी जपलेली ही परंपरा पुढच्या पिढीपर्यंत पोहोचवणे आणि त्यातून आपल्या संस्कृतीशी असलेले नाते अधिक घट्ट करणे, हेच या ९६ वर्षांच्या गणेशोत्सवाचे वैशिष्ट्य आहे.

समाजातील दुर्जन शक्तींचा नाश व्हावा आणि जनतेच्या आयुष्यातील सगळी विघ्ने दूर व्हावीत, प्रत्येक कुटुंबात सुख, शांती, समाधान आणि समृद्धी नांदावी, समाजात निर्माण होणारी नकारात्मक ऊर्जा दूर होऊन तिचे सकारात्मक ऊर्जेत रूपांतर व्हावे, तसेच प्रत्येक व्यक्तीला नव्या आशेने आणि सकारात्मक विचारांनी पुढे जाण्याची शक्ती मिळावी, अशी मंगलमय कामना आमदार किशोर जोरगेवार यांनी यावेळी गणरायाच्या चरणी केली.